រាជធានីភ្នំពេញ ៖ ជនសង្ស័យ២នាក់ជិះម៉ូតូមួយគ្រឿងធ្វើសកម្មភាពឆក់កាបូបពីជនបរទេសមួយក្រុមមានគ្នា៣នាក់ តែមិនបានសម្រេច ត្រូវកម្លាំងសមត្ថកិច្ចប៉ុស្តិ៍ទន្លេបាសាក់កំពុងល្បាតរួមគ្នាជាមួយកម្លាំងនគរបាលនាយកដ្ឋានព្រហ្មទណ្ឌកម្រិតធ្ងន់ក្នុងមូលដ្ឋានទប់ស្កាត់បទល្មើស ប្រទះឃើញជាក់ស្ដែងក៏ធ្វើការដេញបង្ក្រាបនឹងឃាត់ខ្លួនបានភ្លាមៗ រួចនាំមកកាន់ប៉ុស្តិ៍នគរបាលរដ្ឋបាលទន្លេបាសាក់សួរនាំបន្ត។
ហេតុការណ៍ខាងលើនេះបានកើតឡើងកាលពីវេលាម៉ោង៤និង៤០នាទីរសៀលថ្ងៃទី៥ ខែមេសា ឆ្នាំ២០២០ នៅចំនុចផ្លូវក្រោយស្ថានទូតរុស្ស៊ី កែងនឹងផ្លូវសបិត ក្រុម៧៨ ភូមិ១៤ សង្កាត់ទន្លេបាសាក់ ខណ្ឌចំការមន ។
ជនសង្ស័យទាំងពីរនាក់ដែលសមត្ថកិច្ចឃាត់ខ្លួនបានខាងលើ ក្នុងនោះម្នាក់ឈ្មោះ យ៉ង សុខអូរ ភេទប្រុស អាយុ១៤ឆ្នាំ មុខរបររត់តុការ ស្នាក់នៅផ្ទះជួលភូមិតាង៉ូវ សង្កាត់និរោធ ខណ្ឌច្បារអំពៅ ជាអ្នកអង្គុយពីក្រោយធ្វើសកម្មភាពឆក់កាបូបជនបរទេស និងម្នាក់ទៀត ឈ្មោះ សួន ចន្ថា ភេទប្រុស អាយុ២៥ឆ្នាំ មុខរបរកម្មករសំណង់ ស្នាក់នៅផ្ទះជួល ផ្លូវបេតុងភូមិតាង៉ូវ សង្កាត់និរោធ ខណ្ឌច្បារអំពៅ ជាអ្នកបើកម៉ូតូធ្វើសកម្មភាព។ ជនសង្ស័យទាំងពីរនាក់ជិះម៉ូតូមួយគ្រឿងម៉ាក Zoomer X ពណ៌ខ្មៅលាយទឹកក្រូច ពាក់ស្លាកលេខ ភ្នំពេញ ១GH-៨១០៦ ។
យោងតាមប្រភពព័ត៌មានបឋមពីសមត្ថកិច្ចបានប្រាប់អោយដឹង មុនពេលកើតហេតុ គឺកម្លាំងល្បាតប៉ុស្តិ៍ទន្លេបាសាក់ សហការគ្នា ជាមួយកម្លាំងនគបាលនាយកដ្ឋានព្រហ្មទណ្ឌកម្រិតធ្ងន់ល្បាតរួមគ្នា ទប់ស្កាត់បទល្មើសក្នុងមូលដ្ឋាន ក៏ប្រទះឃើញជនបរទេសចំនួន៣នាក់ (ប្រុស២នាក់ និងស្ត្រីម្នាក់) កំពុងដើរតាមបណ្ដោយផ្លូវក្រោយស្ថានទូតរុស្ស៊ី ទិសដៅពីជើងទៅត្បូង ។
តាមប្រភពដដែលបានបន្តថា ពេលនោះក៏លេចមុខជនសង្ស័យទាំងពីរនាក់ខាងលើ ជិះម៉ូតូមួយគ្រឿង ក្នុងបញ្ច្រាសទិសគ្នាបានធ្វើសកម្មភាពឆក់កាបូបយួដៃ ពណ៌ខ្មៅពីស្ត្រីជនបរទេសម្នាក់នោះ តែមិនបានសម្រេច ក៏បន្ថែមល្បឿនម៉ូតូព្យាយាមរត់គេច ។ ភ្លាមៗនោះកម្លាំងល្បាតប៉ុស្តិ៍ទន្លេបាសាក់ និងកម្លាំងនគរបាលនាយកដ្ឋានព្រហ្មទណ្ឌកម្រិតធ្ងន់ ដែលកំពុងល្បាតប្រទះឃើញក៏បានដេញតាមរហូតដល់ស្តុបផ្សារអ៊ីអន មុខវត្តថាន់ ផ្លូវសុធារស ទើបឃាត់ខ្លួនបានរួចនាំមកកាន់ប៉ុស្តិ៍នគរបាលរដ្ធបាលទន្លេបាសាក់ចាត់ការបន្តតាមច្បាប់។
នៅចំពោះមុខសមត្ថកិច្ច ជនសង្ស័យទាំងពីរនាក់ខាងលើបានសារភាពថា ពួកខ្លួនពិតជាបានធ្វើសកម្មភាពជិះម៉ូតូឆក់កាបូបស្ត្រីជនបរទេសនោះពិតមែន តែមិនបានសម្រេច ក៏ត្រូវសមត្ថកិច្ចឃាត់ខ្លួនបានតែម្តង។ ក្រោយឃាត់ខ្លួន ជនសង្ស័យទាំងពីរនាក់នោះត្រូវបានសមត្ថកិច្ចធ្វើតេស្ដទឹកនោម ជាលទ្ធផលរកឃើញមានសារធាតុញៀនផងដែរ ។
បច្ចុប្បន្ន ជនសង្ស័យទាំងពីរនាក់នោះ ត្រូវបានសមត្ថកិច្ចកសាងសំណុំរឿងបញ្ជូនទៅកាន់អធិការរដ្ឋានខណ្ឌចំការមនដើម្បីចាត់ការបន្តតាមនីតិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ