WHO ៖ មន្ត្រីអង្គការសុខភាពពិភពលោក បានព្រមានកាលពីថ្ងៃសុក្រ(ត្រូវនឹងថ្ងៃទី០៤ មេសានេះ)ថា មនុស្សវ័យក្មេងកាន់តែច្រើនឡើងៗ កំពុងតែធ្លាក់ខ្លួនឈឺ និងស្លាប់ ដោយសារជំងឺកូវីដ១៩នេះ ដែលបានរាលដាលដល់ស្ទើរតែគ្រប់ប្រទេស…
WHO ៖ មន្ត្រីអង្គការសុខភាពពិភពលោក បានព្រមានកាលពីថ្ងៃសុក្រ(ត្រូវនឹងថ្ងៃទី០៤ មេសានេះ)ថា មនុស្សវ័យក្មេងកាន់តែច្រើនឡើងៗ កំពុងតែធ្លាក់ខ្លួនឈឺ និងស្លាប់ ដោយសារជំងឺកូវីដ១៩នេះ ដែលបានរាលដាលដល់ស្ទើរតែគ្រប់ប្រទេស នៅទូទាំងពិភពលោក ។
លោកស្រីវេជ្ជបណ្ឌិត ម៉ារីយ៉ា វ៉ាន់ ខឺតឃូវ (Dr. Maria Van Kerkhove) ប្រធានផ្នែកជំងឺឆ្លង(ហ្សូណូស) របស់អង្គការសុខភាពពិភពលោក បានមានប្រសាសន៍ថា “យើងកំពុងតែឃើញយុវជនក្មេងៗ កាន់តែច្រើនឡើងៗ ដែលកំពុងមានជំងឺធ្ងន់ធ្ងរ” ។ យើងបានឃើញទិន្នន័យមួយចំនួន ពីបណ្តាប្រទេសនៅទូទាំងទ្វីបអ៊ឺរ៉ុប ដែលជាកន្លែងដែលមានមនុស្សវ័យក្មេងស្លាប់ច្រើន ។ បុគ្គលមួយចំនួន ក្នុងចំណោមអ្នកស្លាប់ទាំងនោះ ខ្លះមានជំងឺប្រចាំកាយ ប៉ុន្តែអ្នកខ្លះមិនមានទេ ។
លោកស្រី វ៉ាន់ ខឺតឃូវ បានបន្តថា យុវជនភាគច្រើនមិនទាន់ដឹងអំពីវីរុសនេះនៅឡើយទេ ដែលក្នុងនោះរួមមានមូលហេតុដែលជំងឺនេះវិវត្តទៅជាជំងឺធ្ងន់ធ្ងរលើយុវវ័យមួយចំនួន ប៉ុន្តែមិនមែនទាំងអស់នោះទេ ។
លោកស្រី បានបន្ថែមទៀតថា នៅពេលវីរុសរាលដាលដល់ប្រទេសជាច្រើន ហើយទិន្នន័យកាន់តែច្រើន ត្រូវបានប្រមូលតាមបណ្តាលប្រទេសទាំងនោះ អ្នកស្រាវជ្រាវកំពុងសិក្សាអំពី ភាពសកម្មរបស់វីរុសនេះ ។
លោកស្រី បាននិយាយថា ភាគច្រើននៃអ្នកជំងឺកូវីដ១៩ ដែលធ្ងន់ធ្ងរ មានវ័យចំណាស់ ឬមានជំងឺប្រចាំកាយ ប៉ុន្តែអ្វីដែលWHO សង្កេតឃើញនៅក្នុងប្រទេសខ្លះ គឺថា មានអ្នកជំងឺអាយុខ្ទង់៣០ឆ្នាំ អាយុជាង៤០ឆ្នាំ និងអាយុ៥០ឆ្នាំ ដែលស្ថិតក្នុងបន្ទប់សង្គ្រោះបន្ទាន់ និងអ្នកដែលបានស្លាប់ទៅហើយ ។
ដោយឡែក លោកវេជ្ជបណ្ឌិត Mike Ryan នាយកប្រតិបត្តិរបស់អង្គការសុខភាពពិភពលោក ក៏បានបន្ថែមអោយដឹងដែរថា វាជាកំហុសមួយក្នុងការដែលយល់ឃើញថា វីរុសនេះ មានឥទ្ធិពលខ្លាំងតែលើមនុស្សវ័យចំណាស់ និងអ្នកដែលមានជំងឺក្នុងខ្លួន លោក-អ្នកយល់ខុសហើយ មើលប្រទេសអ៊ីតាលី ការផ្ទុះដ៏ធំបំផុតមួយនៅលើពិភពលោក ពី១០% ទៅ១៥% នៃប្រជាជនទាំងអស់ដែលស្ថិតក្នុងការព្យាបាល គឺមានអាយុក្រោម៥០ឆ្នាំ ។ នៅប្រទេសកូរ៉េ ម្នាក់ក្នុងចំណោម ៦នាក់ បានស្លាប់ គឺជាមនុស្សដែលមានអាយុក្រោម៦០ឆ្នាំ ។
លោក Mike Ryan បានបន្ថែមថា “មានទំនោរជាច្រើនខែមកហើយ ដែលស្ទើរតែជាអាកប្បកិរិយាដែលស្តែងចេញមកថា “ជំងឺនេះ ធ្ងន់ធ្ងរតែចំពោះមនុស្សចាស់ទេ ហើយវាមិនឆ្លងចំពោះមនុស្សវ័យក្មេង” ។ នោះហើយជាបញ្ហា ដែលមនុស្សរស់នៅក្នុងពិភពលោក បានព្យាយាមបញ្ចុះបញ្ចូលខ្លួនយើងថា ជំងឺនេះ មានលក្ខណៈស្រាល ចំពោះមនុស្សវ័យក្មេង និងធ្ងន់ធ្ងរចំពោះមនុស្សចាស់” ទៅវិញ ។
លោក Ryan បានបញ្ជាក់ជាថ្មីថា តើវាមានសារៈសំខាន់យ៉ាងណាសម្រាប់យុវជន ក្នុងការចាត់វិធានការទប់ស្កាត់ការរីករាលដាលនៃវីរុសនេះ ? មិនត្រឹមតែការពារខ្លួនប៉ុណ្ណោះទេ ប៉ុន្តែថែមទាំងការពារការរីករាលដាល និងការពារអ្នកដទៃដែលងាយរងគ្រោះថែមទៀតផង ។
អង្គការសុខភាពពិភពលោក បានព្រមានដែរថា វីរុសនេះអាចចម្លងទៅមនុស្សគ្រប់វ័យ ខណៈដែលវ័យក្មេង វាអាចមិនសូវជាកើតមាន ប៉ុន្តែវាក៏អាចវិវត្តទៅជាជំងឺធ្ងន់ធ្ងរ និងគំរាមកំហែងដល់អាយុជីវិត បានផងដែរ ។
កាលពីខែមុន មន្ត្រីសុខាភិបាលពិភពលោក យោងតាមការសិក្សាមួយនៅប្រទេសចិន ដែលបានពិនិត្យឃើញ មានករណីកុមារចំនួន ២,១៤៣នាក់ ដែលត្រូវបានគេអះអាងថា បានឆ្លងកូវីដ១៩ នៅចន្លោះថ្ងៃទី១៦ និងថ្ងៃទី៨ ខែមករា ឆ្នាំ២០២០ ។
ការសិក្សានោះ បានបង្ហាញថា ជាង៩០% នៃកុមារទាំងអស់នោះ គឺជាករណីស្រាល ឬមធ្យម ។ ទោះយ៉ាងណា ក៏មានជិត៦ភាគរយ នៃកុមារ គឺធ្ងន់ធ្ងរ ។
លោក Ryan បានបញ្ជាក់ថា “ខ្ញុំគិតថា មានភ័ស្តុតាងនៅគ្រប់ទីកន្លែង បង្ហាញអោយឃើញថា ភាពធ្ងន់ធ្ងរមានទូលំទូលាយណាស់ ហើយវាកាន់តែធ្ងន់ធ្ងរចំពោះក្រុមមនុស្សវ័យចំណាស់ ប៉ុន្តែវាក៏មានភាពធ្ងន់ធ្ងរចំពោះមនុស្សវ័យក្មេងផងដែរ” ៕
ចែករំលែកព័តមាននេះ