រាជធានីភ្នំពេញ ៖ ព្រឹកថ្ងៃទី២៥ មីនា ឆ្នាំ២០១១ មានអ្នកភូមិបឹងកក់ ប្រមាណ៥០នាក់ ភាគច្រើនជាស្ត្រីរស់នៅភូមិទី៦, ២១, ២២, ២៣ និងភូមិទី២៤ ក្នុងសង្កាត់ស្រះចក ខណ្ឌដូនពេញ បាននាំគ្នាមកប្រមូលផ្តុំនៅមុខសាលារាជធានី ដើម្បីទាមទារសុំឱ្យអភិបាលរាជធានីភ្នំពេញ ដោះស្រាយដីបឹងកក់ចំនួនប្រាំហិកតា ទុកឱ្យពួកគាត់អភិវឌ្ឍដោយខ្លួនឯង ។ នេះជាការទាមទារច្រើនលើកច្រើនសាមកហើយ ពុំដែលបានទទួលលទ្ធផលឡើយ ព្រោះការទាមទារបែបនេះ វាខុសទៅ នឹងគោលការណ៍ដោះស្រាយរបស់រាជរដ្ឋាភិបាលដែលមានអ្នកយល់ព្រមចាកចេញប្រមាណ៩០% រួចហើយ ប៉ុន្តែពួកគាត់នៅតែព្យាយាមដដែល ។
រាល់បាតុកម្មទាមទារជាច្រើនលើកមកហើយ គេសង្កេតឃើញមានបាតុករភាគច្រើនជាស្ត្រីប្រមាណពី៣០ទៅ៥០នាក់ ជាអ្នកភូមិបឹងកក់ តែត្រូវបានសមត្ថកិច្ចធ្វើការបំបែក។ ប៉ុន្តែអ្វីដែលគួរឱ្យកត់សំគាល់ទៀតនោះ គឺការតវ៉ានាពេលនេះប្លែកជាងពេលណាៗទាំងអស់ ព្រោះឃើញមានសង្ឃមួយអង្គស្នាក់នៅកុដិលេខ៤៥វត្តឧណ្ណាលោមបានចូលរួមថតវីដេអូ និងធ្វើបទសម្ភាសន៍ជាមួយអ្នកកាសែត ព្រមទាំងចូលប្រជ្រៀតក្នុងហ្វូងបាតុករដែលភាគច្រើនជានារី ។ គេមិនបានដឹងច្បាស់ថា តើព្រះសង្ឃអង្គនោះមានផ្ទះ ឬដី ឬញាតិញោមរស់នៅក្នុងតំបន់បឹងកក់ដែរ ឬអត់ទេ ប៉ុន្តែបើតាមច្បាប់ ឬវិន័យព្រះពុទ្ធសាសនា គឺព្រះសង្ឃនោះធ្វើខុសទាំងស្រុង ដែលបញ្ហានេះ អាជ្ញាធររាជធានីភ្នំបេញ បាននិងកំពុងធ្វើលិខិតថ្វាយទៅសម្តេចសង្ឃដើម្បីមានវិធានការតាមវិន័យព្រះពុទ្ធសាសនាហើយ ។
គេបានកត់សម្គាល់ថា ក្នុងរយៈពេលកន្លងមក ប្រជាពលរដ្ឋរស់នៅតំបន់បឹងកក់មួយចំនួនបានព្យាយាមធ្វើការតវ៉ាដើម្បីទាមទារដីអភិវឌ្ឍន៍ដោយខ្លួនឯង ចំណែកមួយចំនួនធំបានឯកភាពទទួលយកគោលនយោបាយដោះស្រាយជាបន្តបន្ទាប់។ តាមការពិនិត្យជាក់ស្តែង ទោះបីជាអ្នកភូមិទាំងនោះបានព្យាយាមធ្វើការប្រមូលផ្តុំ ឬទាមទារនោះ បើពិនិត្យទៅលើ ជំហរខាងអាជ្ញាធរ ឬក្រុមហ៊ុន ហាក់មិនមានការប្រែប្រួលទេ ព្រោះនេះជាគោលការណ៍អភិវឌ្ឍន៍របស់រាជរដ្ឋាភិបាលដែលរាជធានីភ្នំពេញ បានត្រឹមតែជាអ្នកសម្របសម្រួលប៉ុណ្ណោះ ។ ម្យ៉ាងទៀតអ្នករស់នៅ ឬតាំងទីលំនៅក្នុងតំបន់បឹងកក់ត្រូវបានអាជ្ញាធររាជធានីភ្នំពេញ ចាត់ទុកថា ជាអ្នកខុសច្បាប់ ព្រោះជុំវិញបឹងកក់ជាតំបន់ហាមឃាត់ ។ ដោយសារជាតំបន់ហាមឃាត់ និងហាមមិនឈ្នះនេះហើយ ទើបការតាំងទីលំនៅមិនត្រូវបានភូមិបាលទទួលស្គាល់ គឺគ្មានប័ណ្ណ គ្មានប្លង់ដី ។ ចំណែកព្រះសង្ឃមួយអង្គដែលចូលរួមធ្វើបាតុកម្មតាមដំណឹងថា អាចមានបញ្ហាប្រឈមជាមួយនឹងវិន័យសង្ឃក្នុងព្រះពុទ្ធសាសនាទៀតផង។
តាមព័ត៌មានចុងក្រោយឱ្យដឹងទៀតថា វេលាម៉ោងជាង២រសៀល ថ្ងៃទី២៥ មីនា ដដែល ស្ត្រីក្រុមអ្នកតវ៉ាដដែលបានលើកគ្នាទៅតវ៉ានៅមុខសាលារាជធានីភ្នំពេញម្តងទៀត ធ្វើឱ្យស្ទះដល់ការងាររបស់មន្ត្រីការិយាល័យរដ្ឋបាល រហូតដល់បិទទ្វារមិនអាចចូលធ្វើការបាន។ តាមដំណឹងថា ខាងសាលារាជធានីភ្នំពេញ បានទទួលយកលិខិតទាមទារពីក្រុមស្ត្រីទាំងនោះហើយព្រមទាំងមានព័ត៌មានថា ខាងសាលារាជធានីភ្នំពេញ យល់ព្រមឱ្យតំណាងអ្នកតវា៉ចូលជួបពិភាក្សានៅព្រឹកថ្ងៃចន្ទ ទី២៨ មីនា ទើបបន្ទាប់មកដកថយទៅផ្ទះវិញ។ ប្រភពព័ត៌មានពីតំបន់អភិវឌ្ឍន៍បឹងកក់ឱ្យដឹងថា ការអភិវឌ្ឍតាមគម្រោង កំពុងបោះជំហានទៅមុខឥតរាថយឡើយ ។ ដំណោះស្រាយគោលនយោបាយ៣ចំណុចនៅតែបើកចំហនៅឡើយទេ។ ចំណែកការស្ថាបនាមហាវិថីខ្វាត់ខ្វែងក៏កំពុងបោះជំហានទៅមុខគ្មានការរាំងស្ទះដែរ៕
ចែករំលែកព័តមាននេះ