រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ចាប់តាំងពីមានករណីផ្ទុះឡើងនូវការរីករាលដាលជំងឺឆ្លងកូវីដ១៩ ក្នុងប្រទេសកម្ពុជា លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ចាប់តាំងពីមានករណីផ្ទុះឡើងនូវការរីករាលដាលជំងឺឆ្លងកូវីដ១៩ ក្នុងប្រទេសកម្ពុជា លោកឧត្តមសេនីយ៍ឯក រ័ត្ន ស្រ៊ាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ បានដាក់ចេញនូវផែនការពារប្រឆាំង និងជំងឺឆ្លងវីរុសកូវីដ១៩នេះ ជាបន្តបន្ទាប់ ។
ដើម្បីឲ្យកម្លាំងក្រោមឱវាទទូទាំងរាជធានីភ្នំពេញ អនុវត្តបានយ៉ាងខ្ជាប់ខ្ជួន ដោយផ្តើមចេញពីការថែរក្សាអនាម័យផ្ទាល់ខ្លួន អនាម័យជុំវិញអង្គភាព អនាម័យតាមគ្រួសារអាវុធហត្ថនីមួយៗ និងមានវិធានការប្រុងប្រយ័ត្នផ្សេងៗជាលំដាប់ ស្របតាមសេចក្តីណែនាំ របស់ក្រសួងសុខាភិបាល ថែមទាំងបានចូលរួមផ្សព្វផ្សាយសេចក្តីណែនាំរបស់ក្រសួងសុខាភិបាលជូនដល់ប្រជាជន មហាជន នៅតាមបណ្តាមូលដ្ឋាន ភូមិសង្កាត់ក្នុងខណ្ឌទាំង១៤ នៃ រាជធានីភ្នំពេញផងដែរ ។
ជាងនេះទៀត នៅរសៀលថ្ងៃទី២ ខែមេសា ឆ្នាំ២០២០ លោកឧត្តមសេនីយ៍ឯក រ័ត្ន ស្រ៊ាង បានបន្ថែមនូវវិធានការពារ ដោយបំពាក់ឧបករណ៍ (ទូរបាញ់ថ្នាំ) សម្លាប់មេរោគ នៅតាមច្រក-ចូលទីបញ្ជាការកងរាជអាវុធហត្ថរាជធានីភ្នំពេញ និងបើកចែកនូវធុងបាញ់ថ្នាំសម្លាប់មេរោគឆ្លងកូវីដ១៩ ដល់បណ្តាមូលដ្ឋានកងរាជអាវុធហត្ថខណ្ឌទាំង១៤ ក្នុងរាជធានីភ្នំពេញ និងបើកភ្ជាប់ជាមួយទឹកថ្នាំសម្លាប់មេរោគ សាប៊ូលាងដៃ ក្រដាស់ជូតដៃ ស្រោមដៃ ម៉ាស និងត្រីខ គ្រប់ៗខណ្ឌ។
ជាមួយនោះផងដែរ លោកមេបញ្ជាការកងរាជអាវុធហត្ថរាជធានីភ្នំពេញ បានបញ្ចេញម៉ូតូកង់៣រាប់សឹបគ្រឿង ដែលបំពាក់ដោយឧឃោសនស័ព្វទៅតាមបណ្តាខណ្ឌទាំង១៤ សហការជាមួយអាជ្ញាធរ ដើម្បីចូលរួមផ្សព្វផ្សាយសារាចរណែនាំរបស់ក្រសួងសុខាភិបាល ស្តីពីជំងឺឆ្លងដែលកំពុងរីករាលដាលពាសពេញសកលលោក នូវវីរុសកូវីដ.១៩ នេះ ។
ដើម្បីការពារ និងប្រឆាំងជាមួយជំងឺឆ្លងកូវីដ១៩ ដ៏សាហាវនោះ កងរាជអាវុធហត្ថរាជធានីភ្នំពេញ បង្ខំចិត្តបង្កើនការការពារជំងឺឆ្លងឲ្យកាន់តែខ្ពស់ គឺបានដាក់នូវឧបករណ៍បាញ់ថ្នាំសម្លាប់មេរោគ តាមច្រកចេញចូលធ្វើការ ដែលនេះមិនមែនជារឿងធម្មតាទេ ៕ (កែសម្រួលដោយ ៖ បុប្ផា)
ចែករំលែកព័តមាននេះ