ខេត្តកំពង់ចាម ៖ បុរសចំនួន២នាក់បានស្លាប់យ៉ាងអាណោចអាធ័ម ដោយសារត្រូវរថយន្តកិនបែកក្បាលធ្លាយខួរ ខណៈជិះម៉ូតូម៉ាកវ៉េវពណ៌ក្រហម ដួលចូលកង់ក្រោយរថយន្តម៉ាកហ៊ីណូក្រឡុកស៊ីម៉ង់ត៍ ១គ្រឿងពាក់ស្លាកលេខ ភ្នំពេញ 5A-0450 កាលពីវេលាម៉ោង៦ល្ងាច ថ្ងៃទី១៩ មីនា ២០១១ នៅចំណុចភូមិអណ្តូងច្រុះ ឃុំអំពិល ស្រុកកំពង់សៀម។
លោកងិន ហេង ប្រធាននគរបាលចរាចរស្រុកកំពង់សៀម បានឲ្យដឹងថា អ្នកដែលស្លាប់ក្នុងឧប្បត្តិហេតុគ្រោះថ្នាក់មិនមានពាក់មួកសុវត្ថិភាពទេ ដែលឈ្មោះនាង ចិត្ត អាយុ២៧ឆ្នាំ រស់នៅភូមិត្រពាំងចារ ឃុំក្រឡា ស្រុកកំពង់សៀម ជាអ្នកឌុប និងម្នាក់ទៀតឈ្មោះទូច ម៉ុប អាយុ២៦ឆ្នាំ រស់នៅភូមិឃុំជាមួយគ្នា ហើយម៉ូតូដែលជិះនោះក៏មិនរងការខូចខាតប៉ុន្មានដែរ។ បុរសរងគ្រោះទាំង២នាក់ជិះម៉ូតូចេញមកពីទិសខាងលិច លុះមកដល់ផ្លូវចុះចំណោតត្រង់ភូមិអណ្តូងច្រុះ ស្រាប់តែមានរថយន្តក្រឡុកស៊ីម៉ង់ត៍១គ្រឿងបើកបរដោយឈ្មោះសោម វណ្ណារិន ភេទប្រុស អាយុ២៩ឆ្នាំ រស់នៅភូមិបឹងស្នាយ សង្កាត់សំបួរមាស ក្រុងកំពង់ចាម មកពីក្រោយស្របទិសគ្នា តែមិនដឹងជាយ៉ាងម៉េច ស្រាប់តែម៉ូតូរេចង្កូតមកចូលកង់ក្រោយរថយន្តក្រឡុកស៊ីម៉ង់ត៍ បណ្តាលឲ្យកិនស្លាប់ទាំង២នាក់យ៉ាងអាណោចអាធ័មបំផុតចំកណ្តាលទ្រូង។ ក្នុងហេតុការណ៍នេះ ម៉ូតូបានខ្ទាតចេញពីមនុស្សចម្ងាយប្រមាណ១ម៉ែត្រ រីឯរថយន្តវិញមិនបានបើកទៅណាឆ្ងាយទេ ដោយអ្នកបើកបររថយន្តត្រូវបានឃាត់ខ្លួន។
ក្រោយពីកើតហេតុគ្រោះថ្នាក់ដ៏រន្ធត់នេះប្រជាពលរដ្ឋនៅក្បែរនោះបានភ្ញាក់ផ្អើលនាំគ្នាមកមើលជាបន្តបន្ទាប់ ហើយមួយសន្ទុះក្រោយមក ទើបគេស្គាល់អត្តសញ្ញាណអ្នកស្លាប់ទាំង២នាក់ និងត្រូវបានរថយន្តសាមុយរបស់មន្ទីរពេទ្យ 7 “D” មកដឹកយកសពទៅកាន់លំនៅឋានរៀងៗខ្លួនដើម្បីរៀបចំធ្វើបុណ្យទៅតាមប្រពៃណី។ តាមប្រជាពលរដ្ឋនៅភូមិអណ្តូងច្រុះបានប្រាប់ថា ក្នុងពេលមានគ្រោះថ្នាក់ដ៏រន្ធត់នេះកើតឡើងគេឃើញលោកវរសេនីយ៍ត្រី ប៉ាក ជាតិ អធិការនគរបាលស្រុកកំពង់សៀម និងលោកមេបញ្ជាការកងរាជអាវុធហត្ថស្រុកកំពង់សៀម បានដឹកនាំកំលាំងចុះទៅដល់កន្លែងកើតហេតុដែលមានសភាពងងឹតផងនោះ និងបានដាក់សញ្ញានៅលើផ្លូវថ្នល់ជួយសំរួលចរាចរណ៍មិនឲ្យមានការកកស្ទះនោះទេ។ ប៉ុន្តែបែរជាមានរថយន្ត១គ្រឿង ចំណុះ១តោនកន្លះដឹកសំបកប៊ីដុងដាក់ប្រេងពេញទ្រុងខាងក្រោយ បើកចេញពីទិសខាងលិចស្ទើរតែបុកមន្ត្រីកងរាជអាវុធហត្ថម្នាក់ និងគ្រោះថ្នាក់ជាក់ជាមិនខានឡើយ។ វត្ថុតាងម៉ូតូនិងរថយន្ត ត្រូវបាននាំយកមកកាន់អធិការដ្ឋាននគរបាលស្រុកកំពង់សៀម ដើម្បីរង់ចាំដោះស្រាយទៅតាមច្បាប់៕
ចែករំលែកព័តមាននេះ