រាជធានីភ្នំពេញ ៖ តារាពហុជំនាញ និងកូនប្រុសកំពូលតារាចម្រៀង២នាក់ទៀត គឺសុវត្ថិ មុន្នីនាគ និងសុវត្ថិ មុន្នីវណ្ណ បានទទួលក្របខណ្ឌជាទាហាន ក្នុងនាមជាអ្នកបម្រើសិល្បៈនៅវង់តន្ត្រីយោធាភិរម្យ…
រាជធានីភ្នំពេញ ៖ តារាពហុជំនាញ និងកូនប្រុសកំពូលតារាចម្រៀង២នាក់ទៀត គឺសុវត្ថិ មុន្នីនាគ និងសុវត្ថិ មុន្នីវណ្ណ បានទទួលក្របខណ្ឌជាទាហាន ក្នុងនាមជាអ្នកបម្រើសិល្បៈនៅវង់តន្ត្រីយោធាភិរម្យ ខណៈពេលដែលមានអ្នកសិល្បៈជាច្រើនរូបទៀត ក៏ទទួលបានក្របខណ្ឌតំណាលគ្នានេះដូចគ្នាផងដែរ។
អ្នកនាង ខាត់ សុឃីម បានសម្តែងក្តីសប្បាយរីករាយក្រៃលែង ត្បិតនេះគឺជាសេចក្តីបំណងប៉ងប្រាថ្នារបស់នាងតាំងពីតូច ដែលចង់បម្រើកងទ័ព បើទោះបីជាក្នុងផ្នែកសិល្បៈនេះក៏ដោយ ប៉ុន្តែនាងបានបម្រើកងទ័ពនេះអស់ជាច្រើនឆ្នាំ និងក្នុងនាមជាកូនទាហានធម្មតាមួយរូប។
អ្នកនាង ខាត់ សុឃីម បានអះអាងប្រាប់តាមសារអេឡិចត្រូនិចថា នាងបានទទួលក្របខណ្ឌនាពេលនេះ ដោយសារតែអ្នកនាងបានបម្រើការជានាយទាហានមួយរូបក្នុងវង់តន្ត្រីយោធាភិរម្យ ហើយអ្នកនាងក៏បានបម្រើកងទ័ពនេះ ដូចជាកូនទាហានម្នាក់ផងដែរ។
អ្នកនាងបញ្ជាក់ថា ការទទួលបានក្របខណ្ឌទាហាននាពេលនេះ គឺក្រោយពេលដែលនាងបានចូលបម្រើក្នុងផ្នែកសិល្បៈក្នុងវង់តន្ត្រីយោធាភិរម្យលើកទី២ ដែលត្រូវបានជ្រើសរើស បន្ទាប់ពីក្របខណ្ឌលើកទីមួយ ដែលមានអ្នកសិល្បៈយើងបានចាស់ៗអស់ទៅ។
នាងបន្តថា ពួកគាត់ចាស់ៗទាំងអស់បានក្លាយទៅជាគ្រូអស់ហើយ ហើយថ្នាក់ដឹកនាំដែលគ្រប់គ្រងវង់តន្ត្រីយោធាភិរម្យ បានស្នើសុំទៅរាជរដ្ឋាភិបាល ដើម្បីជ្រើសរើសកងទ័ពថ្មីដែលបម្រើឲ្យផ្នែកសិល្បៈនេះគ្រប់ផ្នែក ហើយត្រូវបានថ្នាក់អនុញ្ញាតឲ្យកាលពីពេលថ្មីៗនេះប៉ុណ្ណោះ។
បើតាមអ្នកនាង ខាត់ សុឃីម អ្នកសិល្បៈដែលបានទទួលក្របខណ្ឌនាពេលនេះ គឺមានរូបនាង និងកូនលោកព្រាប សុវត្ថិ ២រូបទៀត រួមទាំងអ្នកសិល្បៈគ្រប់ផ្នែកផ្សេងទៀតប្រមាណជា៤០រូប ហើយម្នាក់ៗទទួលបានឋាន្តរស័ក្តត្រឹមជាពលទោប៉ុណ្ណោះ។
យ៉ាងណាម៉ិញ អ្នកនាងបានសម្តែងក្តីសប្បាយរីករាយយ៉ាងខ្លាំង ក្នុងពេលដែលរាជរដ្ឋាភិបាលបានសម្រេចជ្រើសរើសរូបនាង និងអ្នកសិល្បៈជាច្រើនទៀត ឲ្យទទួលបានក្របខណ្ឌនាពេលនេះ ក្នុងពេលដែលនាងបានបម្រើសិល្បៈផ្នែកកងទ័ពនេះអស់ជាច្រើនឆ្នាំ ហើយវាក៏ជាសេចក្តីប៉ងប្រាថ្នារបស់ខ្លួនតាំងពីក្មេងមកដែរ។
គួរបញ្ជាក់ថា ការទទួលបានក្របខណ្ឌជានាយទាហានពីអ្នកនាង ខាត់ សុឃីម នាពេលនេះ មិនមែនជារឿងមួយថ្មី និងប្លែកនោះទេ ពោលគឺមានអ្នកសិល្បៈល្បីៗជាច្រើនទៀតក៏ទទួលបានតំណែង និងទទួលនាទីនៅក្នុងជួរកងទ័ពនេះដូចគ្នា ក្នុងនាមជាអ្នកបម្រើផ្នែកសិល្បៈ៕ (កែសម្រួលដោយ ៖ បុប្ផា)
ចែករំលែកព័តមាននេះ