ខេត្តកណ្ដាល ៖ ជនក្លែងជាសង្ឃចំនួន៦នាក់រួមជាមួយអ្នកបើកបររថយន្តម្នាក់ត្រូវបានកម្លាំងនគរបាលនៃអធិការដ្ឋានស្រុកអង្គស្នួលធ្វើការចាប់ខ្លួន ខណៈជនទាំងនេះស្នាក់នៅជុំគ្នាក្នុងបន្ទប់ផ្ទះសំណាក់មួយកន្លែង ហើយកោរសក់កោរពុកមាត់និងចិញ្ចើម រួចស្លៀកស្បង់ចីវរ ប្រដាប់ដោយបាត្រ និងជួលរថយន្ត១គ្រឿងជិះចេញទៅដើរបិណ្ឌបាត្រនៅតាមភូមិនានា។ លុះពេលបិណ្ឌបាត្ររួចបានប្ដូរសម្លៀកបំពាក់ជាគ្រហស្ថវិញ និងយកលុយ ព្រមទាំងរបស់របរដែលបិណ្ឌបាត្របានទៅចាយវាយនិងផឹកសុីយ៉ាងសប្បាយ ដោយមិនគិតពីការប្រព្រឹត្តខុសច្បាប់ឡើយ។
ការចាប់ខ្លួនជនក្លែងជាសង្ឃខាងលើនោះបានធ្វើឡើងកាលពីវេលាម៉ោង៧និង៣០នាទីយប់ថ្ងៃទី២៧ ខែមិនា ឆ្នាំ២០២០ នៅចំណុចក្នុងផ្ទះសំណាក់មួយកន្លែង ដែលមានទីតាំងស្ថិតនៅក្នុងភូមិព្រៃក្រឡាញ់ ឃុំលំហាច ស្រុកអង្គស្នួល ខេត្តកណ្តាល។
នគរបាលដកហូតបានវត្ថុតាងមួយចំនួនមានដូចជា ស្បង់ចីវរចំនួន៦កំប្លេរ, បាត្រចំនួន៥, ឆ័ត្រចំនួន៤,ទូរស័ព្ទចំនួន៣គ្រឿង, រថយន្តមួយគ្រឿងម៉ាកកាមរី ពណ៌សំបកឪឡឹក ស៊េរីឆ្នាំ១៩៩៥ ពាក់ស្លាកលេខភ្នំពេញ ៣E-៧៩៨៨, កូនកាំបិតចុងស្រួច១, កាបូបស្ពាយ(សាក់កាដូ)ចំនួន៧ និងឧបករណ៍សម្រាប់ប្រើប្រាស់សារធាតុញៀនមួយចំនួនទៀត។
នគរបាលបានឲ្យដឹងថា បុរសជាជនសង្ស័យទាំង៧នាក់ខាងលើនោះមាន ១-ឈ្មោះទៀប សុខម៉ៅ អាយុ៣៥ឆ្នាំ មានទីលំនៅក្នុងភូមិខ្នុរ ឃុំកំពង់សឹង ស្រុកបាភ្នំ ខេត្តព្រៃវែង ២-ឈ្មោះសេះ ឌី អាយុ២៥ឆ្នាំមានទីលំនៅក្នុងភូមិវាលត្បាល ឃុំមានជ័យ ស្រុកឈូក ខេត្តកំពត ៣-ឈ្មោះសន ឆឺត អាយុ២០ឆ្នាំជនជាតិខ្មែរ
៤-ឈ្មោះច្រឹប មាន អាយុ១៩ឆ្នាំជនជាតិខ្មែរ ៥-ឈ្មោះហ៊ុន រុន ភេទប្រុសអាយុ១៨ឆ្នាំជនជាតិខ្មែរ៦-ឈ្មោះសន ទីន អាយុ២៦ឆ្នាំជនជាតិខ្មែរអ្នកទាំ៤នាក់នេះមានទីលំនៅក្នុងភូមិព្រៃពី ឃុំស្រែជាខាងជើងស្រុកដងទង់ ខេត្តកំពត និង៧-ឈ្មោះឈៀង ឆវី អាយុ៣៩ឆ្នាំ ជនជាតិខ្មែរជាអ្នកបើកបររថយន្តជូនជនក្លែងខ្លួនជាសង្ឃខាងលើដើរបិណ្ឌបាត្រ ជននេះមានទីលំនៅក្នុងភូមិអូតាគី ឃុំអូតាគី ស្រុកថ្មគោល ខេត្តបាត់ដំបង។
តាមប្រភពដដែលបានបន្តថា ជនសង្ស័យខាងលើបានជួលបន្ទប់ផ្ទះសំណាក់មួយកន្លែងខាងលើស្នាក់នៅជុំគ្នា ហើយកោរសក់ កោរពុកមាត់ និងកោរចិញ្ចើម រួចស្លៀកស្បង់ចីវរប្រដាប់ដោយបាត្រនិងឆ័ត្រ ហើយចេញទៅដើរបិណ្ឌបាត្រ ដោយម្នាក់ៗចំណាយប្រាក់២ម៉ឺនរៀលក្នុង១ថ្ងៃសម្រាប់ជួលរថយន្តម៉ាកកាមរីស៊េរីឆ្នាំ១៩៩៥ មួយគ្រឿង ខាងលើជិះដើរបិណ្ឌបាត្រជាប្រចាំថ្ងៃ ។ ចំណែកអ្នកបើកបររថយន្តនេះបានដឹកជនក្លែងជាសង្ឃទាំងនោះចេញពីផ្ទះសំណាក់ទៅដាក់នៅតាមបណ្ដាភូមិឋានអ្នកស្រុក និងទីផ្សារនានាមួយចំនួនចាប់ពីផ្សារថ្នល់ទទឹង ស្ថិតនៅក្នុងភូមិដំណាក់អំពិល ស្រុកអង្គស្នួល ខេត្តកណ្ដាល រហូតដល់ភូមិសាស្ត្រខណ្ឌកំបូល រាជធានីភ្នំពេញ ។
តាមប្រភពពីនគរបាលខាងលើបានបញ្ជាក់បន្ថែមទៀតថា ពេលចេញពីផ្ទះសំណាក់ ជនទាំងនោះបានស្លៀកពាក់ជាគ្រហស្ថជាធម្មតាហើយបានទុកស្បង់ចីវរ បាត្រ និងឆ័ត្រ នៅក្នុងរថយន្ត លុះក្រោយពេលចេញផុតពីផ្ទះសំណាក់ទៅដល់កន្លែងស្ងាត់បានដោះខោអាវចេញប្ដូរស្លៀកស្បង់ចីវនៅក្នុងរថយន្តនោះតែម្ដងរួចហើយទើបអ្នកបើកបររថយន្តដឹកយកទៅដាក់តាមទីតាំងដែលត្រូវបិណ្ឌបាត្រនីមួយៗ។
តាមប្រភពដដែលបានបន្តថា បន្ទាប់ពីបិណ្ឌបាត្របានបាយនំចំណីនិងលុយរួចថ្លៃជួលរថយន្ត និងសល់លុយមួយចំនួន ទើបទូរស័ព្ទរកអ្នកបើករថយន្តឲ្យទៅទទួលយក រួចហើយដោះស្បង់ចីវរចេញនិងស្លៀកពាក់ជាគ្រហស្ថវិញនៅលើរថយន្តរួចរាល់ ទើបត្រឡប់ចូលទៅកាន់ផ្ទះសំណាក់វិញ ។ ប៉ុន្តែទង្វើនេះមិនអាចលាក់ជិតឡើយត្រូវបានអ្នកភូមិប្រទះឃើញមានការសង្ស័យក៏បានលួចរាយការណ៍ជូននគរបាលស្រុកអង្គស្នួល ខណៈនោះលោកវរសេនីយ៍ឯក មាន សំណាង អធិការនគរបាលស្រុកអង្គស្នួលដឹកនាំកម្លាំងចុះទៅធ្វើការឃាត់ខ្លួនទាំងសម្បុករួនាំទៅសាកសួរនិងកសាងសំណុំរឿងចាត់ការតាមច្បាប់តែម្ដង៕ (កែសម្រួលដោយ ៖ ធីតា)
ចែករំលែកព័តមាននេះ