ខេត្តកំពង់ស្ពឺ ៖ ប្រជាកសិករនៅខេត្តកំពង់ស្ពឺកំពុងជួបបញ្ហារាំងស្ងួតដោយទីកន្លែងខ្លះស្ទើរតែពុំទាន់បានទទួលទឹកភ្លៀងស្ទូងដកមួយតំណក់នៅឡើយ ។ ដោយឡែកការងារមួយចំនួនទៀតដែលសំខាន់បំផុតសំរាប់សន្តិសុខស្បៀងក្នុងរដូវរំហើយ និងប្រឈមមុខរដូវប្រាំងខាងមុខនេះក៏កំពុងជួបបញ្ហាដែរ នោះគឺការដឹកបង្អោងឫស្សីដើម្បីចងដើមត្នោតឡើងកៀបយកទឹកធ្វើជាស្ករដោយសង្ឃឹមថា ជាលទ្ធភាពសំរាប់ការដោះដូរយកអង្ករចិញ្ចឹមឆ្នាំងត្រូវកុងត្រូលជជុះជាច្រើនកន្លែងស្ទាក់យកលុយ ។ ប្រធានសមាគមអន្តរវិជ្ជាជីវៈផ្នែកស្ករត្នោតកំពង់ស្ពឺដែលមានស្នាក់ការនៅឃុំច័ន្ទសែនស្រុកកំពង់ស្ពឺរៀបរាប់ថា បច្ចុប្បន្នគ្រោះរាំងស្ងួតធ្វើឱ្យការធ្វើស្រែវស្សាពុំបានល្អ ដូច្នេះកសិករងាកមករកមុខរបរឡើងត្នោតវិញដើម្បីយកកំរៃជំនួសផលស្រូវឆ្នាំនេះ ។
លោកសំ សារឿន ប្រធានសមាគមលើកកំពស់ស្ករត្នោតកំពង់ស្ពឺមានប្រសាសន៍ទៀតថា សមាគមលើកកំពស់ស្ករត្នោតកំពង់ស្ពឺបានចាប់ដំណើរការពី ឆ្នាំ២០០៨រហូតមកឆ្នាំ២០១០នេះបានផ្តល់ផលស្ករត្នោតដល់អ្នកទទួលទិញចំនួន៣ គឺអង្គការជប៉ុន អង្គការ Europ និងអង្គការ Confirel ។ ចំពោះខេត្តផលិតស្ករត្នោតមានចំនួន៤ គឺខេត្តកំពង់ស្ពឺ កំពង់ឆ្នាំង កណ្តាល និងតាកែវ ។ អ្នកផលិតស្ករត្នោតបានលើកឡើងថា បញ្ហាចំពោះមុខនេះគឺការដឹកបង្អោង ។ បណ្តាឆ្នាំមុនៗពួកគាត់ទិញបង្អោងមួយដើមតំលៃតែ៥.០០០រៀល ទៅ៧.០០០រៀលប៉ុណ្ណោះ ចំណែកឆ្នាំនេះតំលៃលើសជាងឆ្នាំទៅ ព្រោះអ្នកដឹកលក់ត្រូវបង់ឱ្យបណ្តាប៉ុស្តិ៍កុងត្រូលជជុះរាប់សិបកន្លែង ។
លោកសែម វីរៈ តំណាងឱ្យអ្នកឡើងត្នោតនិយាយថា ការដឹកបង្អោងកំពុងជួបបញ្ហាដោយសារមានការដាក់កុងត្រូលជជុះយកលុយក្នុងមួយរទេះ ឬរថយន្តពីតំលៃ៨ម៉ឺនរៀលទៅ១៥ម៉ឺនរៀល ។ កុងត្រូលខុសច្បាប់ក្នុងខេត្តកំពង់ស្ពឺមានចំនួនជាង៥៧កន្លែង ហើយពេលខ្លះដើរជួបតាមផ្លូវក៏ស្ទាក់ចាប់ទារលុយក៏មានដែរ ។ ដូច្នេះក្នុងមួយរទេះ ឬមួយរថយន្តត្រូវចំណាយអស់ប្រាក់ពី១លាន៥០ម៉ឺនរៀលទៅ១លាន៧០ម៉ឺនរៀល ។ លោកសែម វីរៈ ឱ្យដឹងទៀតថា ខេត្ត៣ទៀតគឺកណ្តាល កំពង់ឆ្នាំង និងតាកែវក៏មានកុងត្រូលដែរ តែមានត្រឹមពី៦ទៅ៧កន្លែងប៉ុណ្ណោះមិនធ្ងន់ធ្ងរដូចខេត្តកំពង់ស្ពឺទេ ។ តាមពិតនេះជាប្រយោជន៍សំរាប់បំរើសេចក្តីត្រូវការក្នុងប្រទេសពុំមែននាំបង្អោងលក់ឱ្យអ្នកឡើងត្នោតនៅក្រៅប្រទេសទេ ដូច្នេះមិនគួរមានសមត្ថកិច្ចស្ទាក់ឃាត់ទារលុយតាមផ្លូវច្រើនបែបនេះទេ ។
អ្នកដឹកបង្អោងលក់ដល់ទីកន្លែងឡើងត្នោតរបស់ប្រជាកសិករលោកថិត វ៉ាន់ ហៅហ៊ឹង ឱ្យដឹងថា ការដឹកបង្អោងឫស្សីនេះក្នុងមួយរដូវពី១៥០ទៅ២០០រថយន្ត តែឆ្នាំនេះកសិករមានគំរោងធ្វើត្នោតច្រើនជាងមុន ដូច្នេះត្រូវផ្គត់ផ្គង់បង្អោងច្រើន ព្រោះមិនអាចពឹងលើផលស្រូវបាន ។ ចំពោះបង្អោងមួយដើមលក់ឱ្យកសិករថ្លៃ៧.០០០រៀល ។ លោកសំ សារឿន បានសំណូមពរដល់ប្រមុខរាជរដ្ឋាភិបាល ជាពិសេសសម្តេចតេជោ ហ៊ុន សែន ឱ្យជួយដល់សុខទុក្ខប្រជាកសិករកំពុងជួបប្រទះការរាំងស្ងួតផង ដោយពួកគាត់មានអាជីពឡើងត្នោតជារបរធំទី២ តែជួបប្រទះរឿងកុងត្រូលជជុះច្រើនទារលុយពាក់ព័ន្ធនឹងរបររបស់ពួកគាត់នេះ ។ ប្រសិនបើឫស្សីបង្អោងសំរាប់ឡើងត្នោតពុំទទួលការគាបសង្កត់យកលុយពីសំណាក់កុងត្រូលជជុះទេ កសិករអាចទាញផលស្ករត្នោតបានច្រើនលើសពីតំរូវការ ។ លោកប្រធានសមាគមឱ្យដឹងថា ឆ្នាំកន្លងទៅអ្នកទទួលទិញនៅក្រៅប្រទេសនាំចេញស្ករត្នោតបានចំនួន៣០តោន ។ ចំនួននេះទោះបីតិចតួចក្តីតែជាការផ្តល់ផលប្រយោជន៍ដល់ប្រជាកសិករឱ្យយកចិត្តទុកដាក់នាំគ្នាផលិតស្ករត្នោត និងជាយុទ្ធសាស្ត្រកាត់បន្ថយភាពក្រីក្រ ៕
ចែករំលែកព័តមាននេះ