ខេត្តបាត់ដំបង ៖ ប្រជានេសាទរាប់រយនាក់បានភ្ញាក់ផ្អើលទៅចោមរោមមើល ពូជត្រីម្យ៉ាង ដ៏កម្របំផុតដែលចូលលបអ្នកនេសាទម្នាក់ កាលពីយប់ថ្ងៃទី២២ តុលា នៅតំបន់ក្បែបឹងទន្លេសាបស្ថិតនៅភូមិដូនឥន្ទ ឃុំព្រែកហ្លួង ស្រុក
ឯកភ្នំ។ ពូជត្រីដ៏កម្រមួយក្បាលនេះពុំមានអ្នកនេសាទណាម្នាក់ស្គាល់ឈ្មោះឡើយ ប៉ុន្តែយោងតាមសៀវភៅឯកសារមន្ត្រីជលផលបញ្ជាក់ថា នេះជាត្រី «ឆ្នុក» ជាប្រភេទត្រីទឹកសាប ហើយកម្រជួបប្រទះណាស់។ ប្រជានេសាទឈ្មោះលី ភ័ណ្ឌ អាយុ២៩ឆ្នាំ និងប្រពន្ធឈ្មោះលក មុំ អាយុ២៦ឆ្នាំ ដែលជាអ្នកនេសាទបានត្រី«ឆ្នុក» ប្រាប់កោះសន្តិភាពថា ត្រីនេះពួកគេមិនធ្លាប់ឃើញឬស្គាល់ឈ្មោះទេ។
លោកលី ភ័ណ្ឌ បាននិយាយថា លោកបានងើបពីយប់ទៅលើកលបដ៏ធំដែលដាក់តាមបណ្តោយដងស្ទឹងសង្កែជាប់បឹងទន្លេសាប ហើយស្រាប់តែប្រទះឃើញត្រីចម្លែកនេះតែមួយក្បាលប៉ុណ្ណោះនៅក្នុងលប។ លោកនិយាយថា ធ្លាប់នេសាទត្រីរាប់សិបឆ្នាំមកហើយ តែមិនស្គាល់ត្រីនេះទេ។ ត្រីចម្លែកនេះមានដងខ្លួនដូចត្រីអណ្តែង ប៉ុន្តែមានសម្បុរដូចត្រីខ្ជឹង គ្មានស្រកា និងមានក្បាលដូចត្រីរ៉ស់ ឬស្រដៀងក្បាលអន្ទង់មានដងខ្លួនប្រវែង១,៤ម៉ែត្រ និងទំងន់១២គីឡូក្រាម។ មន្ត្រីជលផលសង្កាត់ព្រែកកញ្ច្រែងស្រុកឯកភ្នំប្រាប់ថា បើយោងតាមឯកសារត្រីនេះឈ្មោះ ត្រីឆ្នុកជាប្រភេទត្រីដ៏កម្របំផុត។ វារស់នៅក្នុងទឹកសាប។
គេកំរប្រទះឃើញពូជត្រីនេះណាស់។ កាលពីជាង១០ឆ្នាំមុនមានអ្នកនេសាទចាប់បានត្រីឆ្នុកនេះម្តងដែរ។ ពូជត្រីឆ្នុកដ៏កម្រនេះអាចធំធាត់រហូតមានទំងន់រាប់រយគីឡូក្រាម បើយើងអភិរក្សបានល្អ។ លោកបញ្ជាក់ថា លោកចង់ទិញត្រីឆ្នុកនេះយកទៅលែងនៅតំបន់អភិរក្ស តែត្រូវចរចាជា មួយម្ចាស់ត្រីសិន។ ត្រីឆ្នុកនេះត្រូវបានគេយក ទៅរក្សាទុកនៅក្នុងវត្តបាក់អំរែក ដើម្បីរៃអង្គាស ប្រាក់ពីអ្នកទៅទស្សនា។ ការសំរេចយកទៅទុកក្នុងវត្តនេះគឺបន្ទាប់ពីមន្ត្រីជលផលទិញដោយឱ្យថ្លៃទាបពេកគឺចំនួន៦ម៉ឺនរៀល ដូច្នេះមិនត្រូវថ្លៃគ្នាទេជាមួយអ្នកនេសាទ៕
ចែករំលែកព័តមាននេះ