ប្រជាជន ក៏ដូចជាប្រជាជននៅក្នុងពិភពលោកដែរ កំពុងតែប្រឈមុខនឹងវិបត្តិនៃកូវីដ១៩ ដែលគំរាមកំហែងសុខភាព និងជីវិតរបស់មនុស្ស ព្រមទាំងសេដ្ឋកិច្ចពិភពលោកទាំងមូល។ មានការសង្កេតឃើញថា ការភ័យខ្លាចរបស់ប្រជាជន ក៏ត្រូវបានគេចម្រាញ់ចេញជាផលប្រយោជន៍សេដ្ឋកិច្ច និងនយោបាយដោយធ្វើការបំភ័យបន្ថែម…
ប្រជាជន ក៏ដូចជាប្រជាជននៅក្នុងពិភពលោកដែរ កំពុងតែប្រឈមុខនឹងវិបត្តិនៃកូវីដ១៩ ដែលគំរាមកំហែងសុខភាព និងជីវិតរបស់មនុស្ស ព្រមទាំងសេដ្ឋកិច្ចពិភពលោកទាំងមូល។
មានការសង្កេតឃើញថា ការភ័យខ្លាចរបស់ប្រជាជន ក៏ត្រូវបានគេចម្រាញ់ចេញជាផលប្រយោជន៍សេដ្ឋកិច្ច និងនយោបាយដោយធ្វើការបំភ័យបន្ថែម ដើម្បីជាផលប្រយោជន៍លុយកាក់ និងនយោបាយ។ នេះជាអ្វីដែលមនុស្សទាំងអស់ត្រូវចៀសវាងការកេញចំណេញពីប្រជាជននៅក្នុងគ្រាលំបាកមួយនេះ។ ជំនួសមកវិញ យើងត្រូវតែ រួមគ្នាជាកម្លាំងតែមួយ ជាប្រជាជាតិមួយដែលពោរពេញដោយ ការស្រឡាញ់គ្នា និងជួយគ្នា។
វាសាហាវណាស់ និងខ្វះភាពជាមនុស្ស នៅពេលដែលនរណាម្នាក់ធ្វើអ្វីមួយដែលនាំអោយប៉ះពាល់ដល់ សេចក្តីសុខ សុខភាព និងជីវិតរបស់ប្រជាជនកម្ពុជា នៅក្នុងគ្រាមួយដែលកម្ពុជា កំពុងត្រូវការសាមគ្គីភាពជាធ្លុងមួយ ដើម្បីឆ្លងផុតពីវិបត្តិពិភពលោកមួយនេះ។
គេគិតថា មានការដំឡើងថ្លៃទំនិញ ការផ្សព្វផ្សាយព័ត៌មានមិនពិត ដើម្បីបំភ័យមនុស្ស ឬក៏ការលក់ផលិតផលបោកប្រាស់ដោយអះអាងថា អាចព្យាបាលជំងឺកូវីដ១៩ យ៉ាងសាកសិទ្ធិ។ ការធ្វើដូច្នេះ វាមិនត្រឹមត្រូវទេ។ វានឹងធ្វើអោយប្រជាជនដ៏ស្លូតត្រង់របស់យើងកាន់តែរងគ្រោះ ខណៈដែលពួកគេកំពុងតែបារម្ភស្រាប់ពីបញ្ហាកូវីដ១៩។
ដូច្នេះបើយើងមានបេះដូងជាខ្មែរ យើងស្រឡាញ់ប្រជាជនខ្មែរ និងប្រទេសកម្ពុជារបស់យើងនោះ យើងត្រូវតែចៀសវាងការធ្វើអំពើមិនត្រឹមត្រូវទាំងនេះ ដើម្បីកុំអោយវាធ្វើអោយប៉ះពាល់ដល់ជីវិតរស់នៅរបស់ប្រជាជនកម្ពុជា។
អបិយជំនឿមួយចំនួនក៏បានកើតមានផងដែរ នៅកន្លែងខ្លះដូចជាការស្រោចទឹក ការបន់ស្រន់ ការសែនអ្នកតាជាដើម ដើម្បីការពារពីការឆ្លងមេរោគក៏វីដ១៩។ ខណៈដែលអបិយជំនឿអាចជួយពង្រឹង ស្មារតីមនុស្សនៅក្នុងកម្រិតណាមួយនោះ វាមិនអាចជួយ មនុស្ស អោយរួចផុតពីការឆ្លងមេរោគកូវីដ១៩ទេ បើសិនជាយើងមិនចេះវិធានការបង្ការខ្លួនពីមេរោគនេះ។
ដូច្នេះ អ្វីដែលប្រជាជនត្រូវធ្វើ គឺការលាងសម្អាតដៃអោយបានញឹកញាប់ជាមួយទឹកស្អាត និងសាប៊ូ ឬក៏ជែលសម្លាប់មេរោគ មិនធ្វើការជួបជុំមនុស្សច្រើន មិននៅជិតអ្នកជំងឺមានមេរោគកូវីដ១៩ និងមិនធ្វើដំណើរទៅកាន់កន្លែងដែលមានការឆ្លងមេរោគច្រើន។ ទន្ទឹមនោះ រស់នៅប្រកបដោយអនាម័យ និងបរិភោគអាហារដែលនាំមកនូវសុខភាពល្អ។
មធ្យោបាយទាំងនេះ គឺជាអាវុធដែលយើងអាចប្រើបានដើម្បីប្រយុទ្ធនឹងមេរោគកូវីដ១៩។
នៅពេលដែលយើងមានរោគសញ្ញាក្តៅខ្លួន ក្អក កណ្តាស ឬពិបាកដង្ហើម ហើយធ្លាប់នៅជិតអ្នកឆ្លងមេរោគកូវីដ១៩ និងធ្លាប់ទៅកាន់កន្លែងដែលមានការរាលដាលមេរោគនោះ យើងមិនត្រូវធ្វើដំណើរឡើយ ផ្ទុយទៅវិញយើងត្រូវទាក់ទងរកជំនួយពីគ្រូពេទ្យ ឬក៏យើងត្រូវដាក់ខ្លួនឯងអោយនៅឆ្ងាយពីអ្នកដទៃសិន។ ការធ្វើដូច្នេះ គឺដើម្បីចៀសវាងការចម្លងមេរោគពីមនុស្សម្នាក់ទៅមនុស្សម្នាក់។
ប្រជាជនកម្ពុជាទាំងអស់ ក៏ត្រូវតែប្រយ័ត្នប្រយែងខ្លួន ដើម្បីកុំអោយចាញ់បោកការបោកប្រាស់ណាមួយរបស់ជនខិលខូចតាមរយៈការតាមដានព័ត៌មានដែលគួរទុកចិត្តនិងតាមការណែនាំរបស់ក្រសួងសុខាភិបាលនិងរដ្ឋាភិបាល។
នៅក្នុងដំណាក់កាលនេះ ប្រជាជនចាំបាច់ចូលរួមជាមួយរដ្ឋាភិបាល និងអនុវត្តន៍តាមគោលនយោបាយ ដែលដាក់ចេញដោយរដ្ឋាភិបាល និងក្រសួងសុខាភិបាល ដើម្បីចូលរួមយ៉ាងទទួលខុស ត្រូវក្នុងការប្រយុទ្ធនឹងមេរោគកូវីដ១៩។ កម្ពុជាត្រូវបង្កើតប្រព័ន្ឋការពារមួយដែលជាកម្លាំងមនុស្សទូទាំងប្រទេស។
បច្ចុប្បន្ន កម្ពុជា មានអ្នកឆ្លងមេរោគកូវីដ១៩ចំនួន៩៨នាក់ ដោយជាងពាក់កណ្តាលជាជនបរទេស។ ដូច្នេះ បើសិនជាប្រជាជនកម្ពុជាទាំងអស់ មានការយល់ដឹងអំពីអ្វីដែលត្រូវធ្វើ និងអ្វីដែលមិនត្រូវធ្វើនោះ ពួកគេនឹងអាចចូលរួមយ៉ាងមានប្រសិទ្ធភាពជាមួយរដ្ឋាភិបាល ដើម្បីប្រយុទ្ធនឹងមេរោគកូវីដ១៩។
ជាថ្មីម្តងទៀត សូមអង្វរថា បើសិនជានរណាម្នាក់មិនបានជួយអ្វីដល់កិច្ចការប្រឆាំងនឹងមេរោគកូវីដ១៩នេះ សូមកុំរំខានដល់កិច្ចប្រឹងប្រែងនេះ ហើយសូមកុំធ្វើអ្វីមួយដែលនាំការលំបាក ដល់ប្រជាជន និងរដ្ឋាភិបាលដែលកំពុងតែដុតដៃដុតជើងប្រឹងអស់កម្លាំងកាយចិត្ត ដើម្បីយកឈ្នះសមរភូមិជាមួយនឹងសត្រូវគ្មានរូបកូវីដ១៩៕ (កែសម្រួលដោយ ៖ បុប្ផា)
ចែករំលែកព័តមាននេះ