ជំរុញអាជ្ញាធរមូលដ្ឋានតាមដានសុខភាពពលករដែលទើបមកពីក្រៅប្រទេស
- ប៉ៃលិន
ខេត្តប៉ៃលិន ៖ ក្នុងកិច្ចប្រជុំគណៈកម្មការប្រយុទ្ធនឹងជំងឺកូវីដ-១៩ ខេត្ត នាថ្ងៃទី២៦ ខែមីនា ឆ្នាំ២០២០ លោក ផាន់ ចាន់ធុល…
ខេត្តប៉ៃលិន ៖ ក្នុងកិច្ចប្រជុំគណៈកម្មការប្រយុទ្ធនឹងជំងឺកូវីដ-១៩ ខេត្ត នាថ្ងៃទី២៦ ខែមីនា ឆ្នាំ២០២០ លោក ផាន់ ចាន់ធុល អភិបាលខេត្តប៉ៃលិន បានជំរុញ និងដាក់ចេញនូវវិធានការយ៉ាងម៉ឺងម៉ាត់ ដល់អាជ្ញាធរ មូលដ្ឋានគ្រប់ជាន់ថ្នាក់ត្រូវគ្រប់គ្រងពលករដែលទើបត្រឡប់មកពីក្រៅប្រទេសឱ្យបានច្បាស់លាស់ ជា ពិសេសត្រូវអប់រំណែនាំ និងតាមដានសុខភាពរបស់ពួកគាត់ឱ្យបានជាប្រចាំ ដើម្បីរួមគ្នាបង្ការ និងទប់ស្កាត់ ការរីករាលដាលនៃជំងឺកូវីដ-១៩។
លោកអភិបាលខេត្តបានមានប្រសាសន៍លើកឡើងថា នៅក្នុងប្រទេសកម្ពុជាត្រូវបានគេរកឃើញមានអ្នកផ្ទុកជំងឺនេះក៏ដោយ ប៉ុន្តែសម្រាប់ខេត្តប៉ៃលិន រហូតមកដល់ពេលនេះ នៅមិនទាន់រកឃើញមានអ្នកផ្ទុកជំងឺនេះនៅឡើយទេ ប៉ុន្តែរយៈពេលប៉ុន្មានថ្ងៃមកនេះ មានពលករចំណាកស្រុកទាំងក្នុង និងក្រៅប្រទេស រាប់ពាន់នាក់បានវិលត្រឡប់ចូលមកកាន់ស្រុកកំណើតវិញ ដោយមិនបានដឹងថា ក្នុងចំណោមមនុស្សទាំងអស់នោះមានអ្នកផ្ទុកមេរោគ COVID-19 ឬអត់នោះទេ។
លោកអភិបាលខេត្តបានបន្តថា ដូច្នេះដើម្បីទប់ស្កាត់កុំអោយមានការចម្លងជំងឺប្រភេទនេះ ក៏ដូចជាដើម្បីជួយសង្គ្រោះ និងព្យាបាលដល់អ្នកដែលមានផ្ទុកជំងឺនេះឲ្យបានទាន់ពេលវេលា គណៈកម្មការប្រយុទ្ធ នឹងជំងឺ COVID-19 ខេត្តប៉ៃលិន បានដាក់ចេញនូវវិធានការយ៉ាងម៉ឺងម៉ាត់ ដើម្បីអនុវត្តន៍តាមការណែនាំរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងក្រសួងសុខាភិបាល ដោយទាំងអាជ្ញាធរមូលដ្ឋានគ្រប់ជាន់ថ្នាក់ មន្ត្រីជំនាញពាក់ពន្ធ និងកងកម្លាំងប្រដាប់អាវុធទាំងអស់ ត្រូវរួមគ្នា ចុះផ្សព្វផ្សាយនៅតាមភូមិ និងតាមខ្នងផ្ទះ ដើម្បីឲ្យប្រជាពលរដ្ឋបានយល់ដឹង និងចូលរួមបង្ការ និងទប់ស្កាត់ជំងឺ COVID-19នេះទាំងអស់គ្នា។
លោកអភិបាលខេត្តបានមានប្រសាសន៍បញ្ជាក់ថា ដើម្បីរួមគ្នាបង្ការ និងទប់ស្កាត់ការរីករាលដាលជំងឺ COVID-19 នៅប្រទេសកម្ពុជា ក្រសួងសុខាភិបាលបានបញ្ចេញសារអប់រំ ជាអាទិភាពសំខាន់ៗចំនួន៤ សម្រាប់ប្រជាពលរដ្ឋអនុវត្តន៍ រួមមាន ៖
ទី១-អ្នកមកពីបរទេស សូមនៅតែក្នុងផ្ទះក្នុងរយៈពេល១៤ថ្ងៃ ដើម្បីការពារការឆ្លងជំងឺ COVID-19 ចាប់ពីថ្ងៃចូលមកប្រទេសកម្ពុជាវិញ, ទី២-ប្រសិនបើលោកអ្នកមានរោគសញ្ញាណាមួយក្នុងចំណោមរោគសញ្ញាដូចជា គ្រុនក្តៅយ៉ាងតិច៣៨អង្សាសេ ក្អក ហៀរសំបោរ ឈឺបំពង់ក ពិបាកដកដង្ហើម និងមានប្រវត្តិធ្វើដំណើរមកពីប្រទេសផ្សេងទៀត សូមទាក់ទងលេខទូរស័ព្ទ១១៥ជាបន្ទាន់។
ទី៣-ប្រសិនបើលោកអ្នកមានរោគសញ្ញាយ៉ាងតិចមួយក្នុងចំណោមសញ្ញាដូចជា គ្រុនក្តៅយ៉ាងតិច៣៨អង្សាសេ ក្អក ហៀរសំបោរ ឈឺបំពង់ក ពិបាកដក ដង្ហើម និងមានប្រវត្តិធ្វើដំណើរមកពីប្រទេសផ្សេងទៀត ក្នុងអំឡុងពេល១៤ថ្ងៃ មុនចេញរោគសញ្ញា សូមទាក់ទងទូរស័ព្ទ ១១៥ជាបន្ទាន់។
ទី៤-ប្រសិនបើលោកអ្នកបានប៉ះពាល់ ឬមានប្រវត្តិប៉ះពាល់ជាមួយអ្នកជំងឺ COVID-19 ដែលបញ្ជាក់ពីមន្ទីរពិសោធន៍ថាវិជ្ជមាន សូមទាក់ទងទូរស័ព្ទលេខ ១១៥ ជាបន្ទាន់ ដើម្បីទទួលការពិភាក្សាយោបល់ថែទាំសុខភាព ។
ក្នុងឱកាសនោះដែរ លោក ផាន់ ចាន់ធុល អភិបាលខេត្តប៉ៃលិន និងជាប្រធានគណៈកម្មការប្រយុទ្ធនឹងជំងឺ COVID-19 ខេត្ត ក៏បានប្រគល់ម៉ាស់ចំនួន៤០០០ម៉ាស់ និងអាល់កុលសំរាប់លាងដៃចំនួន២០០ដប ដល់មន្ទីរសុខាភិបាលខេត្ត ដើម្បីរួមគ្នាបង្ការ និងទប់ស្កាត់ការរីករាលដាលនៃជំងឺ COVID-19។
សូមបញ្ជាក់ថា គិតត្រឹមព្រឹកថ្ងៃទី២៦ ខែមីនា ឆ្នាំ២០២០នេះ នៅខេត្តប៉ៃលិនមានពលករទើបត្រឡប់មកពីក្រៅប្រទេសចំនួន៣០៥នាក់ ស្រី១៦២នាក់ ដោយក្នុងនោះ ក្រុងប៉ៃលិនចំនួន១៨៣នាក់ ស្រី១០០នាក់ និងស្រុកសាលាក្រៅចំនួន១២២នាក់ ស្រី៦២នាក់ ៕ (កែសម្រួលដោយ ៖ ធីតា)
ចែករំលែកព័តមាននេះ