ខេត្តស្ទឹងត្រែង ៖ នៅរសៀលថ្ងៃទី២ កញ្ញា អំណោយជាថវិការបស់សប្បុរសជនជាលើកទី២ ត្រូវបាននាំយកទៅប្រគល់ដល់កូនភ្លោះកំព្រាពិការ២នាក់បងប្អូនផ្ញើខ្លួនរំពឹងលើជីដូនជរា ដែលផ្តល់តាមរយៈកោះសន្តិភាព ។ ប្រាក់អំណោយទាំងនេះ គឺបានទទួលពី១-លោកសេង គី ផ្ទះលក់ទារខ្វៃច្បារអំពៅ ៣ម៉ឺនរៀល ២-លោកវ៉ាន់ សឿន អនុប្រធានក្រុមការងារស្រុកចំរោង ខេត្តតាកែវ ១០ម៉ឺនរៀល ៣-បុគ្គលិកទាំងអស់នៃក្រុមហ៊ុន HOYEAR (CAMBODIA) GARMENJ-LTD ចំនួន៨៩.០០០រៀល និង២២ដុល្លារ ។
កូនភ្លោះកំញ្រពិការទាំង២នាក់នេះ មានអាយុ១៤ឆ្នាំ ឈ្មោះដួង ហួ និងដួង ហៃ ពិការស្វិតដៃ ជើងតាំងពីរកំណើត រស់នៅជាមួយជីដូនជរាឈ្មោះទូ គីមឡេង អាយុ៧៩ឆ្នាំ រស់នៅក្នុងវត្តភ្នំ ភូមិរាជានុកូល សង្កាត់ស្ទឹងត្រែង ក្រុងស្ទឹងត្រែង ដែលមានម្តាយឈ្មោះច្រឹប បានស្លាប់តាំងពីឆ្នាំ១៩៩៦ ក្រោយពីវះកាត់បង្កើតពួកគេទាំងពីរនាក់ រួចបានរយៈពេលតែ៨ថ្ងៃប៉ុណ្ណោះ និងមានឪពុកឈ្មោះដួង យូ ជាយោធា ហើយបានស្លាប់តាំងពីឆ្នាំ២០០៦ ដោយជំងឺគ្រុនចាញ់ ។
អំណោយជាថវិកាដែលយកទៅប្រគល់ឱ្យក្មេងកំញ្រទាំងពីរនាក់នោះ ក៏មានការនិមន្តចូលរួមពីសំណាក់ព្រះតេជគុណ អ៊ិត វីន ព្រះចៅអធិការវត្តភ្នំស្ទឹងត្រែង ។ ដួង ហួ និងដួង ហៃ ក្រោយពីទទួលអំណោយរួចក៏បានលើកដៃទាំងពីរប្រណមឡើងដោយសេចក្តីរីករាយអំណរគុណដល់សប្បុរសជនទាំងអស់ដែលជួយជាថវិកាដើម្បីដោះស្រាយជីវភាព និងទិញថ្នាំលេប ព្រោះសព្វថ្ងៃកុមារពិការទាំង២នាក់កំពុងមានជំងឺជាប់កាយ ហើយពីមួយថ្ងៃទៅមួយថ្ងៃដៃ ជើងចេះតែស្វិតទៅៗ ។
ជំនួសមុខឱ្យកូនភ្លោះកំព្រាទាំងពីរនាក់នេះព្រះតេជគុណ អ៊ិត វីន ព្រះចៅអធិការវត្តភ្នំស្ទឹងត្រែង បានថ្លែងអំណរគុណដល់សប្បុរសជនដែលមានទឹកចិត្តអាណិតអាសូរ យកចិត្តទុកដាក់លើការរស់នៅរបស់ក្មេងទាំងពីរនាក់នេះ ដែលកន្លងមកពួកគេមិនសូវជាមានពន្លឺប៉ុន្មានទេ តែឥឡូវនេះពួកគេបានទទួលការយកចិត្តទុកដាក់ពី សប្បុរសជននានា ជាពិសេសសារព័ត៌មានកោះសន្តិភាពបានលាតត្រដាងពីជីវិតពិតរបស់ពួកគេ ។ ព្រះអង្គសូមជូនពរដល់សប្បុរសជនជាម្ចាស់អំណោយ ឱ្យជួបតែសេចក្តីសុខ សេចក្តីចំរើន និងទទួលបានជោគជ័យគ្រប់ការងារទាំងពួងទាំងឡាយ ៕
ចែករំលែកព័តមាននេះ