ខេត្តបន្ទាយមានជ័យ ៖ បើតាមសេចក្តីរាយការណ៍បឋមបានឱ្យដឹងថា ជនសង្ស័យម្នាក់ធ្លាប់ត្រូវបានកម្លាំងនគរបាល ចាប់ខ្លួនបញ្ជូនទៅតុលាការពីបទប្រព្រឹត្តអំពើរំលោភលើសេចក្តីទុកចិត្ត ហើយត្រូវតុលាការកាត់ទោសឲ្យជាប់ពន្ធនាគាររយៈពេល១ឆ្នាំកន្លះ ប៉ុន្តែពេលចេញមកវិញ ទើបតែបាន១ខែកន្លះ ក៏ទៅឆបោកយកម៉ូតូរបស់បងប្អូនក្នុងភូមិចំនួន២គ្រឿងយកទៅបញ្ជាំលេងល្បែង និងទិញគ្រឿងញៀនជក់អស់ទៀត ក៏ត្រូវកម្លាំងនគរបាលចាប់ឃាត់ខ្លួន កសាងសំណុំរឿងបញ្ជូនទៅសាលាដំបូងខេត្តបន្ទាយមានជ័យ ដើម្បីចាត់ការតាមផ្លូវច្បាប់ ។
លោកវរសេនីយ៍ឯក ខែម សោភ័ណ នាយការិយាល័យនគរបាល ព្រហ្មទណ្ឌកំរិតស្រាល បានឲ្យដឹងថា ជនសង្ស័យខាងលើឈ្មោះ ទួង រាសី ភេទប្រុស អាយុ២៧ឆ្នាំ នៅភូមិប៉ោយចារ ឃុំប៉ោយចារ ស្រុកភ្នំស្រុក ខេត្តបន្ទាយមានជ័យ ។
លោកវរសេនីយ៍ឯក ខែម សោភ័ណ បន្តទៀតថា ជននេះបានប្រព្រឹត្តិបទល្មើសរំលោភលើសេចក្តីទុកយកម៉ូតូមិត្តភក្តិយកទៅបញ្ជាំចំនួន២ករណី ហើយត្រូវជនរងគ្រោះប្តឹងឲ្យចាប់ខ្លួនតែម្តង។
លោកវរសេនីយ៍ ឯក ខែម សោភ័ណ បានបន្តថា ករណីទី១- នៅថ្ងៃទី១១ ខែកញ្ញា ឆ្នាំ២០១៩ វេលាម៉ោង៦និង១៥នាទីយប់ ជនសង្ស័យបានខ្ចីម៉ូតូម៉ាក ZOOMER ពណ៌ស លាយទឹកក្រូច ពាក់ស្លាកលេខ ពោធិ៍សាត់ 1E-7277 ជារបស់ជនរងគ្រោះឈ្មោះធុង ឆៃយ៉ា ភេទប្រុស អាយុ២០ឆ្នាំ នៅភូមិប៉ោយចារ ឃុំប៉ោយចារ ស្រុកភ្នំស្រុក ខណៈពេលកំពុងអង្គុយផឹកស៊ីជាមួយគ្នាថា ជិះទៅទិញសាច់ក្លែម ប៉ុន្តែបែរជាជិះយកទៅបាត់រហូត មិនត្រឡប់មកវិញនោះទេ។
ចំណែកករណីទី២- នៅម៉ោង១១និង៥០នាទីយប់រំលងអធ្រាតថ្ងៃទី១៥ ខែតុលា ឆ្នាំ២០១៩ ជនសង្ស័យបានយកម៉ូតូម៉ាកហុងដាឌ្រីម សេរីឆ្នាំ២០១៤ ពណ៌ខ្មៅ ពាក់ស្លាកលេខ 1I-8743 ជារបស់ឈ្មោះសុខ សុផល ភេទប្រុស អាយុ៤៩ឆ្នាំ នៅភូមិបឹងវែង ឃុំតាឡំ ស្រុកមង្គលបូរី ដោយនិយាយថា ខ្ចីទៅទិញទឹកផឹក ហើយក៏ជិះទៅបាត់មិនត្រឡប់មកវិញដូចគ្នា។
លោកនាយការិយាល័យនគរបាលព្រហ្មទណ្ឌកំរិតស្រាល បានបញ្ជាក់ថា ជនសង្ស័យរូបនេះ ធ្លាប់ត្រូវកម្លាំងនគរបាលចាប់បញ្ជូនទៅសលាដំបូងខេត្តបន្ទាយមានជ័យ ពីបទរំលោភលើសេចក្តីទុកចិត្ត ហើយត្រូវតុលាការកាត់ទោសឲ្យជាប់ពន្ធនាគារអស់រយៈពេល១ឆ្នាំកន្លះ។ ក្រោយមកទើបតែចេញពីពន្ធនាគារបានរយៈពេល១ខែកន្លះ ក៏បានប្រព្រឹត្តបទល្មើស២ករណីទៀត ហើយក៏ត្រូវកម្លាំងនគរបាលស្រុកភ្នំស្រុក ចាប់ឃាត់ខ្លួនបាននៅថ្ងៃទី២៥ ខែមីនា ឆ្នាំ២០២០ វេលាម៉ោង៣និង១៥នាទីរសៀល នៅនឹងផ្ទះរបស់ខ្លួន ។
នៅចំពោះមុខសមត្ថកិច្ចជនសង្ស័យបានសារភាពថា ខ្លួនគេពិតជាបានយកម៉ូតូរបស់ឈ្មោះធុង ឆៃយ៉ា និងឈ្មោះសុខ សុផល ពិតប្រាកដមែន ក្រោយពីយកទៅបញ្ជាំបានលុយ រួចក៏ទៅលេងល្បែងនៅកាស៊ីណូ និងទិញគ្រឿងញៀនជក់អស់ហើយ។
ដោយផ្អែកទៅលើបណ្តឹងរបស់ជនរងគ្រោះជាម្ចាស់ម៉ូតូ និងចម្លើយសារភាពរបស់ជនសង្ស័យ បច្ចុប្បន្នកម្លាំងនគរបាលជំនាញព្រហ្មទណ្ឌកំរិតស្រាលខេត្ត បានរៀបចំសំណុំរឿងបញ្ជូនខ្លួនទៅសាលាដំបូងខេត្តបន្ទាយមានជ័យ នៅថ្ងៃទី២៧ ខែមីនា ឆ្នាំ២០២០នេះ ដើម្បីចាត់ការតាមផ្លូវច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ