ខេត្តបាត់ដំបង ៖ ថៅកែគ្រឿងចក្រដ៏មហិមាម្នាក់ដែលអ្នកភូមិតែងអួតសរសើរថា «ជាជនមិនខ្លាចញញើតច្បាប់» ពេលនេះ ត្រូវកម្លាំងកងរាជអាវុធហត្ថឃាត់ខ្លួន និងកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធី នៅព្រឹកថ្ងៃទី២៧ មីនា…
ខេត្តបាត់ដំបង ៖ ថៅកែគ្រឿងចក្រដ៏មហិមាម្នាក់ដែលអ្នកភូមិតែងអួតសរសើរថា «ជាជនមិនខ្លាចញញើតច្បាប់» ពេលនេះ ត្រូវកម្លាំងកងរាជអាវុធហត្ថឃាត់ខ្លួន និងកសាងសំណុំរឿងបញ្ជូនទៅសាលាដំបូងខេត្ត ចាត់ការតាមនីតិវិធី នៅព្រឹកថ្ងៃទី២៧ មីនា បន្ទាប់ពីឃាត់ខ្លួនពាក់ព័ន្ធនឹងការប្រើគ្រឿងចក្រឈូសឆាយរំលោភបំពានលើដីរបស់រដ្ឋ ដែលហាមឃាត់ដោយច្បាប់ នៅក្នុងតំបន់ «ពហុបំណងសេកសក» ស្ថិតក្នុងភូមិសាស្ត្រ ភូមិស្រែស្ដៅ ឃុំមាជ័យ ស្រុកសំឡូត ហើយថែមទាំងរឹបអូសនូវគ្រឿងចក្រជាច្រើនគ្រឿងផងដែរ ។
លោកឡាច វ៉ាន់ នាយការិយាល័យបង្ក្រាបបទល្មើសព្រហ្មទណ្ឌនៃបញ្ជាការកងរាជអាវុធហត្ថខេត្ត បានឲ្យដឹងថា ជនសង្ស័យនោះ ឈ្មោះ ស៊ុត ទូន ភេទប្រុស អាយុ៥៧ឆ្នាំ ជាថៅកែគ្រឿងចក្រឈូសឆាយដី រស់នៅភូមិអូរសំរិល ឃុំអូរសំរិល ស្រុកសំឡូត ។ លោកបានប្រាប់ថា ជននេះ ត្រូវកម្លាំងកងរាជអាវុធហត្ថ សហការជាមួយមន្ត្រីជំនាញ នៃមន្ទីរធនធានទឹកនិងឧតុនិយមខេត្ត ចុះទៅបង្ក្រាបនិងឃាត់ខ្លួន កាលពីវេលាម៉ោង១០ព្រឹក ថ្ងៃទី២៥ មីនា ខណៈដែលកំពុងបញ្ជាឲ្យកម្មកររបស់ខ្លួន ប្រើប្រាស់គ្រឿងចក្រជាច្រើនគ្រឿង ធ្វើសកម្មភាពឈូសឆាយរំលោភបំពានលើដីរដ្ឋ នៅក្នុងតំបន់ហាមឃាត់ «ពហុបំណងសេកសក» ដែលស្ថិតក្នុងភូមិសាស្ត្រ ភូមិ-ឃុំខាងលើនេះ។
បើតាមរបាយការណ៍បានឲ្យដឹងដែរថា ជាមួយនឹងការឃាត់ខ្លួនលោកថៅកែគ្រឿងចក្រនេះ មន្ត្រីជំនាញ ក៏បានរឹបអូសគ្រឿងចក្រមួយចំនួនដូចជា៖ អេស្កាទ័រចំនួន០២គ្រឿង អាប៊ុលស័រចំនួន០១គ្រឿង រថយន្តសម្រាប់ដឹកអេស្កាទ័រចំនួន០១គ្រឿង និងរថយន្តដឹកដីចំនួន០៣គ្រឿង។ វត្ថុតាងទាំងនេះ ត្រូវបានរឹបអូសនិងបានរក្សាទុកបណ្ដោះអាសន្ន នៅមូលដ្ឋានកងរាជអាវុធហត្ថស្រុករតនមណ្ឌល ។ ដោយឡែក លោកថៅកែគ្រឿងចក្រ ដែលជាជនសង្ស័យឈ្មោះ ស៊ុត ទូន ត្រូវបានមន្ត្រីកងរាជអាវុធហត្ថឃាត់ខ្លួននាំទៅកាន់ទីបញ្ជាការខេត្ត ដើម្បីសួរនាំពាក់ព័ន្ធនឹងការប្រព្រឹត្តបទល្មើស ។
ជុំវិញករណីបង្ក្រាបបទល្មើសឈូសឆាយរំលោភបំពានយកដីរដ្ឋ នៅក្នុងតំបន់ហាមឃាត់ «ពហុបំណងសេកសក» ខាងលើនេះ កោះសន្តិភាពមិនអាចសុំការពន្យល់បន្ថែមពីលោកឡុង ផល្គុន ប្រធានមនន្ទីរធនធានទឹកនិងឧតុនិយមខេត្តបានទេ នៅព្រឹកថ្ងៃទី២៧ មីនា ដោយទូរស័ព្ទរបស់លោក គ្មានអ្នកទទូល ។ ប៉ុន្តែពាក់ព័ន្ធនឹងសកម្មភាពរំលោភបំពានដីរដ្ឋនេះ បើតាមប្រភពព័ត៌មានថា លោកថៅកែគ្រឿងចក្រឈ្មោះ ស៊ុត ទូន នេះ ហាក់មិនខ្លាចញញើតនឹងច្បាប់ឡើយ ។ គេឃើញលោកថៅកែដ៏មហិមានេះ បានប្រើប្រាស់គ្រឿងចក្ររបស់ខ្លួន ចូលធ្វើសកម្មភាពឈូសរំលោភបំពាន់លើដីនៅក្នុងតំបន់ហាមឃាត់ខាងលើនេះ ចាប់តាំងពីខែកុម្ភៈរហូតមក ។
ប្រភពដដែលបានឲ្យដឹងទៀតថា ជាមួយនឹងសកម្មភាពបំពានច្បាប់នេះ គេឃើញមន្ត្រីជំនាញបានចុះទៅហាមឃាត់មួយលើកជាពីរលើកដែរ ប្រាប់ឲ្យម្ចាស់គ្រឿងចក្រនេះ ដកថយឈប់ធ្វើសកម្មភាព តែជននេះមិនស្ដាប់ទេ ។ រហូតនៅលើកចុងក្រោយ មន្ត្រីជំនាញ បានចុះទៅបញ្ឈប់សកម្មភាពគ្រឿងចក្រនេះ ថែមទាំងឲ្យធ្វើកិច្ចសន្យាផ្ដិតមេដៃទៀតផង តែជននេះ នៅតែវិនាសរឹងរុះមិនព្រមឈប់ ទើបមន្ត្រីធនធានទឹក និងកម្លាំងកងរាជអាវុធហត្ថ ប្រើធម៌ក្ដៅ ចុះទៅបង្ក្រាប រឹបអូសគ្រឿងចក្រ និងឃាត់ខ្លួនថៅកែគ្រឿងចក្រនេះ ចាត់ការតាមផ្លូវច្បាប់តែម្ដង។
យ៉ាងណាក៏ដោយ បើតាមលោកឡាច វ៉ាន់ នាយការិយាល័យបង្ក្រាបបទល្មើសព្រហ្មទណ្ឌ នៃមញ្ជាការកងរាជអាវុធហ្ថខេត្ត បានប្រាប់ថា កិច្ចប្រតិបត្តិការនេះ គឺដឹកនាំឲ្យមន្ត្រី មន្ទីរធនធានទឹក និងឧតុនិយមខេត្ត។ ប៉ុន្តែក្រោយពីធ្វើការបង្ក្រាប ដកហូតវត្ថុតាង និងឃាត់ខ្លួនថៅកែគ្រឿងចក្រ មន្ទីរធនធានទឹក ក៏បានប្រគល់កិច្ចការនេះ មកឲ្យខាងកងរាជអាវុធហត្ថ ជាអ្នកសួរនាំ និង កសាងសំណុំរឿងចាត់ការតាមនីតិវិធី ។
លោកឡាច វ៉ាន់ បានបញ្ជាក់ថា ពេលនេះ លោកមេបញ្ជាការខេត្ត បានបញ្ជាឲ្យមន្ត្រីការិយាល័យជំនាញរបស់លោកសួរនាំជនសង្ស័យ និងកសាងសំណុំរឿងបញ្ជូនទៅតុលាការ នៅព្រឹកថ្ងៃទី២៧ មីនា នេះ
ហើយ៕
ចែករំលែកព័តមាននេះ