រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ផ្ទះល្វែងមួយកន្លែងត្រូវបានអគ្គិភ័យឆាបឆេះ បណ្ដាលឲ្យរងការខូចខាត រួមជាមួយទ្រព្យសម្បត្តិនៅក្នុងផ្ទះផងដែរ ដូចជាសម្ភារៈសម្រាប់ប្រើប្រាស់ គ្រឿងបន្លាស់ម៉ូតូជាច្រើន ព្រមទាំងម៉ូតូ៣គ្រឿង ប៉ុន្តែមិនបានបណ្ដាលឲ្យមានគ្រោះថ្នាក់ដល់ម្ចាស់ផ្ទះឡើយ ។
សេចក្តីរាយការណ៍បន្តថា ចំពោះមូលហេតុបង្កឡើងដោយម្ចាស់ផ្ទះខាងលើ ដុតភ្លើងចង្ក្រានរម្ងាស់ស៊ុបឲ្យផុយនៅក្បែរដបប្រេងសាំង ហើយស្រាប់មានការឆាបឆេះឡើងយ៉ាងសន្ធោរសន្ធៅតែម្ដង ខណៈនោះអ្នកជិតខាងជួយពន្លត់ឱ្យរលត់ទៅវិញ។ ហេតុការណ៍នោះ បង្កឲ្យមានភ្ញាក់ផ្អើលកាលពីម៉ោង១និង៣០នាទីរសៀល ថ្ងៃទី២៦ ខែមីនា ឆ្នាំ២០២០ នៅចំណុចក្នុងផ្ទះខាងលើ ដែលមានទីតាំងស្ថិតនៅតាមផ្លូវបេតុខាងក្រោយវត្តគោកបញ្ជាន់ ក្នុងភូមិចោមចៅទ២ សង្កាត់ចោមចៅទី២ ខណ្ឌពោធិ៍សែនជ័យ ។
តាមប្រភពព័ត៌មានបានឲ្យដឹងថា ផ្ទះខាងលើ គឺជាផ្ទះល្វែងសាងសង់ពីថ្ម ហើយមិនត្រូវបានស្គាល់អត្តសញ្ញាណម្ចាស់ផ្ទះនោះឡើយ ។ ហើយផ្ទះនេះត្រូវបានពួកគាត់បើករកស៊ីលក់សាំងដប និងហ្គាស់ ព្រមទាំងជួសជុលម៉ូតូផងដែរ ។ ខណៈនៅមុនពេលកើតហេតុ នោះ ម្ចាស់ផ្ទះបានដុតភ្លើងចង្ក្រានរំងាស់ឆ្នាំងស៊ុបនៅក្បែរដបសាំងដែលតាំងលក់នោះ។
ប្រភពដដែលបន្តថា ខណៈនោះមេឃក៏ក្តៅខ្លាំងថែមទៀត ក្រោយមកក៏ស្រាប់តែភ្លើងចង្ក្រានស៊ុបនោះឆាបឆេះដបសាំង បណ្តាលឲ្យផ្ទុះក្លាយជាអណ្ដាតភ្លើងឡើងយ៉ាងសន្ធោសន្ធៅតែម្ដង។ ពេលនោះបានបង្កឲ្យមានការភ្ញាក់ផ្អើលយ៉ាងខ្លាំង ហើយម្ចាស់ផ្ទះ និងអ្នកជិតខាង ក៏នាំគ្នាយកទុយោទឹក និងបំពង់ពន្លត់អគ្គីភ័យទៅបាញ់ពន្លត់ទប់ស្កាត់ មួយសន្ទុះធំទើបភ្លើងរលត់ទៅវិញ និងមិនឆេះរីករាលឆ្លងទៅដល់ផ្ទះអ្នកជិតខាងនោះទេ។
ប្រភពដដែលបន្តថា ប៉ុន្តែទ្រព្យសម្បត្តិ និងសម្ភារៈប្រើប្រាស់ រួមទាំងគ្រឿងបន្លាស់ម៉ូតូ ព្រមជាមួយនឹងម៉ូតូចំនួន៣គ្រឿងផង ត្រូវបានភ្លើងឆាបឆេះអស់ ចំណែកឯម្ចាស់ផ្ទះមិនបានរងរបួសនោះឡើយ ហើយក៏មិនមានរថយន្តពន្លត់អគ្គិភ័យទៅពន្លត់ដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ