ទស្សនាវដ្ដីថែមបានចេញផ្សាយកាលពីថ្ងៃទី២៩ មេសា នូវបញ្ជីឈ្មោះប្រចាំឆ្នាំនៃមនុស្ស១០០នាក់ ដែលមានឥទ្ធិពលខ្លាំងបំផុតនៃពិភពលោក ។ ប្រធានាធិបតីប្រេស៊ីលលោកល្វីសអ៊ីណា ស៊ីយ៉ូ លូឡា ដាស៊ីលវ៉ា មានចំណាត់ថ្នាក់ទី១ ក្នុងបញ្ជីនេះសំរាប់បណ្ដាមេដឹកនាំ ។ នាយទាហានអាមេរិកឧត្ដមនាវី MIKE MUL-LEN ស្ថិតក្នុងចំណាត់ថ្នាក់លេខ៣ ហើយប្រធានាធិបតីអាមេរិក លោកបារ៉ាក់ អូបាម៉ា ស្ថិតក្នុងលំដាប់លេខ៤ ។ ក្នុងបញ្ជីនេះក៏មានឈ្មោះលោកស្រីសារ៉ាហ៍ ប៉ាលីន ស្ដ្រីអ្នកនយោបាយអាមេរិក និងជាសមាជិកគណបក្សសាធារណរដ្ឋដែលជាបេក្ខនារីអនុប្រធានាធិបតីអមលោកចន ម៉ាក់កេន ក្នុងការបោះឆ្នោតប្រធានាធិបតីអាមេរិកកាលពីឆ្នាំ២០០៨ ។ លោកប៊ីលគ្លីនតុន អតីតប្រធានាធិបតីអាមេរិក ដែលផ្ដល់ការខិតខំប្រឹងប្រែងក្នុងការជួយសង្គ្រោះនៅហៃទីក្រោយការរញ្ជួយដី និងនាងឡេឌី ហ្គាហ្គា តារាចំរៀងអាមេរិក ក៏មានឈ្មោះក្នុងបញ្ជីនេះដែរ ។
ឥស្សរជនដទៃទៀត ដែលទស្សនាវដ្ដី ថែមបញ្ចូលឈ្មោះក្នុងបញ្ជី១០០ រួមមានប្រធានសភាអាមេរិក លោកស្រីណានស៊ី ពីឡូស៊ី និងតារាកំប្លែងអាមេរិក CONAN O’BRIEN ។ ទស្សនាវដ្ដីថែមជារៀងរាល់ឆ្នាំចាប់ពីឆ្នាំ១៩៩៩មក តែងចេញផ្សាយបញ្ជីឈ្មោះមនុស្សមានឥទ្ធិពលជាងគេបំផុត១០០នាក់នៃពិភពលោក ៕
ចែករំលែកព័តមាននេះ