រាជធានីភ្នំពេញ ៖ ទន្ទឹមនឹងវីរុសកូវីដ១៩បាននឹងកំពុងឆ្លងរីករាលដាលជាសកលនៅទូទាំងពិភពលោក និងការរកឃើញវត្តមានវីរុសកូវីដ១៩ នៅកម្ពុជាកើនឡើងដល់ ៩៣ ករណីគិតត្រឹមព្រឹកថ្ងៃទី ២៥ ខែមីនាឆ្នាំ ២០២០ នៅកម្ពុជានោះ បានធ្វើឲ្យតម្លៃម៉ាស់និងតម្រូវការអាកុល ក៏ដូចជាជែលលាងដៃក្លាយផលិតផលពេញនិយមបំផុត រហូតមានធ្វើឲ្យតម្លៃម៉ាស់ត្រូវបានដាក់លក់ថ្លៃកប់ពពក ។
ក្នុងន័យទប់ស្កាត់នូវឈ្មួញ ឬម្ចាស់ឱសថស្ថានណាមួយដាក់លក់ម៉ាស់ក្នុងតម្លៃថ្លៃហួសហេតុនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានព្រមាននៅព្រឹកថ្ងៃទី ២៥ មីនានេះថាសម្តេចគ្រោងនឹងរឹបយកម៉ាស់ពីឱសថស្ថាននិងហាងលក់ម៉ាស់ណា លក់ម៉ាស់ថ្លៃហួសហេតុ ហើយសម្តេចក៏បានព្រមានផងដែរថា សម្តេចកំពុងសិក្សាផ្លូវច្បាប់ ដែលអាចនឹងបិទឱសថស្ថានណាមួយដែលបន្តលក់ម៉ាស់ឡើងថ្លៃហូសកម្រិត សម្តេចតេជោ ហ៊ុន សែនបានបញ្ជាក់ថា «មិនត្រឹមដកម៉ាស់ទេ គឺបិទមួយជីវិត ឲ្យរាងចាល » ដែលហ៊ានលក់ម៉ាស់ថ្លៃហូសហេតុ ។ ជាមួយគ្នានោះផងដែរ សម្តេចតេជោបានបញ្ជារទៅក្រសួងសុខាភិបាលឲ្យប្រមូលព័ត៌មានថាមានឱសថស្ថានប៉ុន្មានដែលពាក់ព័ន្ធនឹងការលក់ម៉ាស់ថ្លៃហូសហេតុ ។
យ៉ាងណាមិញ វាប្រៀបដូចជាដំណឹងល្អមួយទៀតសម្រាប់កម្ពុជាផងដែរ ស្របពេលដែលក្រុមប្រឹក្សាអភិវឌ្ឍន៍កម្ពុជាហៅកាត់ថា (CDC) បានសម្រេចចេញវិញ្ញាបនបត្រចុះបញ្ជីជាស្ថាព័រដល់ក្រុមហ៊ុនមួយដែលមានគម្រោងផលិតកាបូបនិងម៉ាស់គ្រប់ប្រភេទដែលមានទុនវិនិយោគជាង៣លានដុល្លារអាមេរិក។ ក្រុមហ៊ុនដែលទទួលបានការសម្រេចពី CDCថ្មីៗនេះត្រូវបានប្រធានសហជីពក្នុងស្រុកមួយមើលឃើញថាបើរោងចក្រនេះអាចដំណើរការផលិតម៉ាស់លក់ក្នុងស្រុកបាននៅពេលកូវីដ១៩រីករាលដាលនោះនឹងធ្វើឱ្យតម្លៃម៉ាស់លើទីផ្សារចុះថ្លៃ ហើយអាចទប់ស្កាត់ការរីករាលដាលបាន។ យោងតាមបណ្តាញទំនាក់ទំនងសង្គមហ្វេសប៊ុករបស់ក្រុមប្រឹក្សាអភិវឌ្ឍន៍កម្ពុជាឬហៅថា CDCកាលពីថ្ងៃទី២៤មីនាបានឱ្យដឹងថា តាមសំណើសុំវិនិយោគលើគម្រោងបង្កើតរោងចក្រផលិតកាបូប និងម៉ាស់គ្រប់ប្រភេទ របស់ក្រុមហ៊ុន HK BURLTEX MANUFACTORY CO., LTD. គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានសម្រេចចេញ «វិញ្ញាបនបត្រចុះបញ្ជីជាស្ថាពរ» ជូនដល់ក្រុមហ៊ុនខាងលើ ដែលមានទីតាំងវិនិយោគស្ថិតនៅសួនឧស្សាហកម្មវឌ្ឍនៈ ២ អគារលេខ ៩ ផ្លូវជាតិលេខ៣ ភូមិព្រៃសំព័រ សង្កាត់ក្រាំងពង្រ ខណ្ឌដង្កោ រាជធានីភ្នំពេញ។
CDC បានបញ្ជាក់ថា « រោងចក្រដែលមានគម្រោងផលិតកាបូបនិងម៉ាស់គ្រប់ប្រភេទខាងលើនវ មានទុនវិនិយោគប្រមាណ ៣,១លានដុល្លារអាមេរិក និងអាចបង្កើតការងារបានចំនួន ៩១៥កន្លែង»។ពាក់ព័ន្ធនិងរោងចក្រផលិតកាបូបនិងម៉ាស់គ្រប់ប្រភេទទទួលបានការសម្រេចពី CDC បើអាចដំណើរការបានកំឡុងពេលដែលកម្ពុជាកំពុងមានការរីករាលដាលនៃកូវីដ១៩បាន ប្រធានសហជីពក្នុងស្រុកមួយយល់ថាជារឿងល្អ ព្រោះតម្រូវការម៉ាស់ក្នុងស្រុកធ្វើឱ្យម៉ាស់ឡើងថ្លៃ។
លោក អាត់ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា«តាមខ្ញុំយល់ប្រសិនជារាជរដ្ឋាភិបាលសម្រួលឯកសាររហូតដល់គេអាចបើករោងចក្របាន ខ្ញុំគិតថាវាប្រហែលមិនយូរទេអាចដំណើរការបាន។រឿងនេះល្អប្រសិនជារោងចក្រអាចផលិតម៉ាស់បាន ព្រោះឥលូវតម្រូវការម៉ាស់ក្នុងស្រុកវាថ្លៃ អាចលក់បាននៅក្នុងទីផ្សារក្នុងស្រុកបាន ឬរាជរដ្ឋាភិបាលទិញចែកឱ្យពលរដ្ឋបានខ្ញុំគិតថាវាជារឿងល្អ បើរោងចក្រមួយនេះអាចដំណើរការបានពេលដែលកូវីដ១៩កំពុងរីករាលដាលនៅកម្ពុជា»។ លោកបានសង្កត់ធ្ងន់ថា « បើរោងចក្រមានគម្រោងផលិតកាបូបនិងម៉ាស់គ្រប់ប្រភេទអាចដំណើរការបានទាន់ពេលនៅពេលកម្ពុជាមានការរីករាលដាលនៃកូវីដ១៩នេះបាន គឺអាចជួយកាត់បន្ថយការចំណាយផ្សេងៗ ហើយប្រមុខរាជរដ្ឋាភិបាលអាចទិញចែកដល់ពលរដ្ឋខ្ញុំគិតអាចទប់ស្កាត់ការរីករាលដាលបានមួយចំនួនធំ»។
ប្រធានសហជីពរូបនេះបានបន្តថា ការរីករាលដាលនៃកូវីដ១៩ កម្មករកាត់ដេរមានការបារម្ភខ្លាំងមែនទែន ទោះបីនៅពេលបច្ចុប្បន្នមិនទាន់មានឆ្លងពីមួយទៅមួយក៏ដោយ គាត់មានការបារម្ភខ្លាំងណាស់ ។ក្នុងនាមជាសហជីពបានធ្វើការច្រើនដើម្បីជួយពន្យល់ណែនាំកម្មករ ។លើសពីនេះយើងបានចរចារជាមួយក្រុមហ៊ុនដើម្បីដាក់ប្រដាប់ស្ទង់កំដៅនិងការលាងដៃជាមួយសាប៊ូនិងអាកុលនេះមាននៅគ្រប់កន្លែង។យើងណែនាំឱ្យគាត់ពេលត្រឡប់ទៅផ្ទះវិញឬជួបកម្មករដទៃដែលមកពីក្រៅប្រទេសបើគាត់មានការក្តៅខ្លួនឬរោគសញ្ញាមិនស្រួលគឺកុំឱ្យគាត់នៅជិតអ្នកនោះ។ តាមប្រធានសហជីពរូបនេះនៅពេលបច្ចុប្បន្នដូចជានៅមិនទាន់មានផ្ទុះកូវីដ១៩នៅតាមសហគមន៍ដែលកម្មកររស់នៅទេ៕ កែសម្រួលដោយ ៖ សុឃាក់
ចែករំលែកព័តមាននេះ