ខេត្តប៉ៃលិន ៖ អ្នកទេសចរជាច្រើននាក់ ដែលបើករថយន្តទៅកម្សាន្តនៅរមណីយដ្ឋានទឹកធ្លាក់ភ្នំខៀវ មានចម្ងាយពីទីរួមខេត្តប៉ៃលិនប្រហែល៦ទៅ៧គីឡូម៉ែត្រ ស្ថិតនៅក្នុងភូមិខ្លុង សង្កាត់អូរតាវ៉ៅ ក្រុងប៉ៃលិន បានរអ៊ូរទាំ និងរិះគន់ថា ក្នុងអំឡុងពេលបុណ្យភ្ជុំបិណ្ឌកន្លងទៅ ថ្មីៗនេះ អ្នកយាមច្រកចូលទឹកធ្លាក់ភ្នំខៀវយកថ្លៃលើសសៀវភៅបន្ទុក ពោលគឺយកលើសអ្វីដែលបានសរសេរកំណត់នៅលើស្លាកសញ្ញានៅមុខខ្លោងទ្វារ ។
អ្នកទេសចរជាច្រើននាក់កាលពីថ្ងៃទី២២ កញ្ញា ២០១៤ និយាយថា នៅក្នុងរដូវបុណ្យភ្ជុំបិណ្ឌមានអ្នកទេសចររាប់សិបនាក់ធ្វើដំណើរតាមម៉ូតូ និងរថយន្តទៅលេងកម្សាន្តនៅទឹកធ្លាក់ភ្នំខៀវដោយសារនៅឆ្នាំនេះអត់សូវមានភ្លៀងធ្លាក់ខ្លាំងដូចឆ្នាំមុនដែលបង្កភាពងាយស្រួលព្រោះផ្លូវមិនរអិលទេ ។ ខណៈពួកគាត់បើករថយន្តទៅដល់មុខខ្លោងទ្វាររមណីយដ្ឋានត្រូវអ្នកលក់សំបុត្រ ទារថ្លៃលើសសៀវភៅបន្ទុកដែលតម្រូវឱ្យយកថ្លៃ ម៉ូតូ១គ្រឿង៣ពាន់រៀល រថយន្តតូច១គ្រឿង១ម៉ឺនរៀល រថយន្តទួរីស១ម៉ឺន៥ពាន់រៀល រថយន្តក្រុង២ម៉ឺន៥ពាន់រៀល។ អ្នកយាមបានទារថ្លៃពីរថយន្តតូច១គ្រឿង១ម៉ឺន៥ពាន់រៀល រថយន្តទួរីស២ម៉ឺនរៀល និងរថយន្តក្រុង៣ម៉ឺនរៀល ។ បើទោះបីជាម្ចាស់រថយន្តមួយចំនួនតវ៉ាក្ដី អ្នកលក់សំបុត្រនៅតែលក់លើសតម្លៃកំណត់ដដែល ដោយអះអាងថា រដូវភ្ជុំបិណ្ឌមានតែម្តង ។
នារីប្រធានក្រុមអ្នកលក់សំបុត្រឈ្មោះលឿង ហុង អាយុ៣៣ឆ្នាំ និយាយថា ការលក់សំបុត្រមិនអនុញ្ញាតឱ្យបុគ្គលិកណាម្នាក់យកលើសពីសៀវភៅបន្ទុកទេ ព្រោះបុគ្គលិកដែលធ្វើការនៅទីនោះ ចំនួន១០នាក់ ស៊ីប្រាក់ខែពីថៅកែទឹកធ្លាក់ ឈ្មោះពៅ សេងហាក់ ។
ទាក់ទិនទៅនឹងរឿងបុគ្គលិកនៅច្រកទ្វារចូលរមណីយដ្ឋានលក់សំបុត្រលើសពីសៀវភៅបន្ទុកអ្នកស្រីលឿង ហុង និយាយថា អត់បានដឹងទេ។ ចំណែកអ្នកលក់សំបុត្រក៏បដិសេធដែរថា មិនបានលក់លើសពីតម្លៃកំណត់ទេ ៕
ចែករំលែកព័តមាននេះ