ខេត្តមណ្ឌលគិរី ៖ ក្នុងឱកាសបុណ្យភ្ជុំបិណ្ឌនាពេលកន្លងទៅ ថ្មីៗនេះ អ្នកទេសចរទៅលេងកម្សាន្តនៅខេត្តមណ្ឌលគិរីរាប់ពាន់នាក់ ដោយសារតែខេត្តមួយនេះសម្បូរទៅដោយភ្នំតូចធំ រមណីយដ្ឋានធម្មជាតិជាច្រើនកន្លែង ពិសេសគឺមានអាកាសធាតុត្រជាក់ជាងបណ្តាខេត្តដទៃទៀត ។
ខេត្តមណ្ឌលគិរី ៖ ក្នុងឱកាសបុណ្យភ្ជុំបិណ្ឌនាពេលកន្លងទៅ ថ្មីៗនេះ អ្នកទេសចរទៅលេងកម្សាន្តនៅខេត្តមណ្ឌលគិរីរាប់ពាន់នាក់ ដោយសារតែខេត្តមួយនេះសម្បូរទៅដោយភ្នំតូចធំ រមណីយដ្ឋានធម្មជាតិជាច្រើនកន្លែង ពិសេសគឺមានអាកាសធាតុត្រជាក់ជាងបណ្តាខេត្តដទៃទៀត ។
ចំពោះរមណីយដ្ឋានទឹកជ្រោះប៊ូស្រា គឺជាគោលដៅទីមួយសម្រាប់អ្នកទេសចរទៅលេងកម្សាន្ត ដោយរមណីយដ្ឋាននេះមានទឹកធ្លាក់ដែលអាចងូតលេងកម្សាន្តយ៉ាងសប្បាយ ។ ក្រៅពីនោះខេត្តមណ្ឌលគិរីនៅមានរមណីយដ្ឋានធម្មជាតិ និងវប្បធម៌ចំនួន១៧កន្លែងទៀត ដែលមានភាពស្រស់ប្រណីត ខ្យល់អាកាសបរិសុទ្ធ និងទឹកជ្រោះ រង់ចាំអ្នកទេសចរគ្រប់ពេលវេលា ។
លោកងិន សុវិមាន ប្រធានមន្ទីរទេសចរណ៍ខេត្ត ឱ្យដឹងកាលពីថ្ងៃទី២៥ កញ្ញា ឆ្នាំ ២០១៤ ថា ក្នុងរយៈពេល៣ថ្ងៃចុងក្រោយ គឺថ្ងៃទី២២-២៣ និងទី២៤ មានអ្នកទេសចរទៅលេងកម្សាន្តនៅខេត្តមណ្ឌលគិរីចំនួន៨.០៤៤នាក់ ក្នុងនោះអ្នកទេសចរជាតិចំនួន៧.៩៨៨នាក់ និងអ្នកទេសចរអន្តរជាតិចំនួន៥៦នាក់ ។ តួលេខនេះ បើធៀបទៅនឹងរយៈពេលដូចគ្នាកាលពីឆ្នាំ២០១៣ មានការថយចុះចំនួន៩៦នាក់ ស្មើនឹង១,១៧% ក្នុងនោះអ្នកទេសចរជាតិថយចុះ១,៤៩% តែដោយទ្បែក អ្នកទេសចរអន្តរជាតិកើនទ្បើង៨០,៦៤% ។
លោកប្រធានមន្ទីរបញ្ជាក់ថា កត្តាដែលធ្វើឱ្យអ្នកទេសចរក្នុងឱកាសភ្ជុំបិណ្ឌនេះថយចុះ គឺអាចមកពីភ្លៀងធ្លាក់ច្រើនពេក ។ ម្យ៉ាងទៀត អ្នកខ្លះយល់ច្រទ្បំថា ផ្លូវទៅខេត្តមណ្ឌលគិរីលំបាក តែតាមការពិតផ្លូវងាយស្រួលធ្វើដំណើរ ។
អ្នកទេសចរដែលធ្វើដំណើរទៅលេងខេត្តមណ្ឌលគិរី ចាប់ពីស្រុកអូររាំង ឆ្ពោះទៅក្រុងសែនមនោរម្យ ប្រាកដជាប្លែកភ្នែកមិនខាន ដោយបានឃើញភ្នំតូចធំខៀវស្រងាត់ លោតសន្ធឹងដាច់កន្ទុយភ្នែក ៕
ចែករំលែកព័តមាននេះ