ខេត្តរតនគិរី ៖ លោកសុខ សំណាង ចាងហ្វាងកាសែតដំណឹងថ្មី បានសំដែងអំណរគុណដល់សប្បុរសជនដែលបានជួយឧបត្ថម្ភជាប្រាក់សំរាប់ការព្យាបាលដល់រូបលោកឱ្យធូរស្បើយ មួយកំរិត ខណៈដែលរូបលោកបានរងគ្រោះដោយជំងឺដាច់សរសៃឈាមក្នុងខួរក្បាល ក្រោយពេលដែលរូបលោកបានដួលសន្លប់ក្នុងបន្ទប់ទឹកសណ្ឋាគារនៅខេត្តព្រះសីហនុកន្លងមក ពេលទៅបំពេញការងារនៅទីនោះ ហើយត្រូវបានបញ្ជូនទៅព្យាបាលនៅប្រទេសវៀតណាម ។ រហូតមកដល់ពេលនេះ រូបលោកបានធូរស្រាលអាចនិយាយបានខ្លះៗ និងអង្គុយបាន ប៉ុន្តែលោកស្ថិតក្នុងភាពឯកោជាពន់ពេក ។
លោកគ្រី អូន អាយុ៥០ឆ្នាំ ដែលត្រូវជាប្អូនបង្កើតលោកសុខ សំណាង បានរៀបរាប់អំពីទុក្ខលំបាកឯកោរបស់លោកសុខ សំណាង ដែលកំពុងជួបប្រទះសព្វថ្ងៃ ។ លោកគ្រី អូន រៀបរាប់ថា បងប្រុសរបស់លោក មានអាយុ៥៧ឆ្នាំ ហើយមានប្រពន្ធឈ្មោះឈុន កេតសារ៉ា និងមានកូនប្រុសម្នាក់ ស្រីម្នាក់ក្នុងបន្ទុក ។ លោកសុខ សំណាង កាលពីអតីត ធ្វើការនៅអង្គភាព AKP បន្ទាប់មកធ្វើជាចាងហ្វាងកាសែតដំណឹងថ្មី ។ ប៉ុន្តែជាអកុសលកាលពីពេលកន្លងមកនេះ ខណៈលោកទៅបំពេញការងារនៅខេត្តព្រះសីហនុ ក៏ជួបគ្រោះថ្នាក់ដួលក្នុងបន្ទប់ទឹក ហើយដាច់សរសៃឈាមក្នុងខួរក្បាល ត្រូវក្រុមគ្រួសារបញ្ជូនទៅព្យាបាលនៅមន្ទីរពេទ្យឯប្រទេសវៀតណាម ។ ក្នុងពេលបញ្ជូនទៅប្រទេសវៀតណាមភ្លាមនោះ ក៏មានការឧបត្ថម្ភប្រាក់៥០០ដុល្លារ ភ្លាមៗពីលោកឧកញ៉ាថុង អ៊ុយប៉ាង មុនគេបង្អស់ផងដែរ ។
លោកគ្រី អូន បានបង្ហាញបញ្ជីឈ្មោះសប្បុរសជនដែលមានសប្បុរសធម៌ជួយឧបត្ថម្ភប្រាក់សំរាប់ការព្យាបាល ហើយក្នុងនោះក៏មានអំណោយដ៏ថ្លៃថ្លាបំផុតមិនអាចកាត់ថ្លៃបានពី លោកជំទាវបណ្ឌិតប៊ុន រ៉ានី ហ៊ុន សែន ដែលលោកជំទាវតែងតែយកចិត្តទុកដាក់មិនថាឡើយតែចាងហ្វាងកាសែត ឬអ្នកសិល្បៈនោះទេ សូម្បីតែប្រជាពលរដ្ឋជួបប្រទះនូវទុក្ខលំបាកគ្រោះទុរភិក្ស ឬមហន្តរាយផ្សេងៗ ក៏លោកជំទាវជួយដោយមិនរើសអើង មិនប្រកាន់និន្នាការ ឬគណបក្សនយោបាយឡើយ ។ ក្រៅពីនោះ ក៏នៅមានសប្បុរសជនជាច្រើនទៀតមាន ១-លោកជំទាវនាយឧត្តមសេនីយ៍ម៉ែន សំអន ឧបនាយករដ្ឋមន្ត្រីប្រចាំការ តាមរយៈលោកយូ តារាវុធ ២-ឯកឧត្តមទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងលោកជំទាវ ៣-ឯកឧត្តមស៊ូ ភិរិន្ទ អភិបាលខេត្តសៀមរាប ៤-ឯកឧត្តមគន់ គីម និងលោកជំទាវ ៥-ឯកឧត្តមស៊ុំ សំណាង និងលោកជំទាវ ៦-ឯកឧត្តមប៉ុល សារឿន និងលោកជំទាវ ៧-ឯកឧត្តមសូរ ឃុន និងលោកជំទាវ ៨-ឯកឧត្តមប៉ែន សំអាត ៩-ឯកឧត្តមខៀវ កញារីទ្ធ រដ្ឋមន្ត្រីក្រសួងព័ត៌មាន ១០-ឯកឧត្តមច័ន្ទ សារុន រដ្ឋមន្ត្រីក្រសួងកសិកម្ម ១១-មេបញ្ជាការប៉េអឹមខេត្តព្រះសីហនុ ១២-មេបញ្ជាការប៉េអឹម ខេត្តសៀមរាប ១៣-លោកជំទាវម្ចាស់ភោជនីយដ្ឋានសូរិយា (រាជធានីភ្នំពេញ) ។
លោកសុខ សំណាង ក៏បានថ្លែងអំណរគុណតាមរយៈលិខិតដល់សប្បុរសជនទាំងអស់ដែលបានជួយឧបត្ថម្ភជាប្រាក់ និងជួយយកចិត្តទុកដាក់អស់ពីកំលាំងកាយចិត្ត ។ លោកមិនអាចបំភ្លេចបាននូវគុណូបការៈដ៏ថ្លៃថ្លារបស់សប្បុរសជន និងសូមជូនពរបវរសួស្តីជូនចំពោះឯកឧត្តម លោកជំទាវ អស់លោក លោកស្រី អ្នកនាង កញ្ញា ជាពិសេសសម្តេចអគ្គមហាសេនាបតីតេជោ ហ៊ុន សែន និងលោកជំទាវបណ្ឌិតប៊ុន រ៉ានី ហ៊ុន សែន សូមមានជន្មាយុយ៉ឺនយូរ និងកំលាំងពំលំខ្លាំងក្លា ដើម្បីដឹកនាំប្រទេសកម្ពុជាឆ្ពោះទៅរកការអភិវឌ្ឍរុងរឿង ។
ចំពោះស្ថានភាពជំងឺរបស់លោកសុខ សំណាង បច្ចុប្បន្នត្រូវបានលោកគ្រី អូន រៀបរាប់ថា ដោយសារបានការឧបត្ថម្ភជាប្រាក់ពីសប្បុរសជនទាំងអស់នោះហើយ ទើបលោកបានធូរស្រាលបន្តិច ប៉ុន្តែនៅមិនអាចដើរបាន ឬកាន់របស់អ្វីមួយ ព្រមទាំងនិយាយស្តីបានច្រើននោះទេ ដោយសារជើងស្តាំមិនអាចកំរើកបាន ជាពិសេសខួរក្បាលមិនអាចចងចាំអ្វីបានច្រើនឡើយ ។ មិនតែប៉ុណ្ណោះ ជាមួយនឹងការធ្លាក់ខ្លួនមានជំងឺនេះ ថែមទាំងមានភាពឯកោថែមទៀត ដោយសារតែភរិយា និងកូនដែលជាទីស្រលាញ់របស់លោកមិនបាននៅថែរក្សារូបលោកនោះទេ ។ ប្រពន្ធ និងកូនរបស់លោកសុខ សំណាង ក្នុងពេលដែលឪពុក និងប្តីមានជំងឺបែបនេះ ក៏នាំគ្នាប្រមែប្រមូលទ្រព្យសម្បត្តិផ្ទាល់ខ្លួនមួយចំនួនទៅរស់នៅឯប្រទេសកាណាដាបាត់ ដោយពុំបានប្រាប់ប្តី និងសាច់ញាតិខាងប្តីដឹងឡើយ ដោយបន្សល់ទុករូបលោកសុខ សំណាង ឱ្យរស់នៅឯកោជាមួយ និងម្តាយជរាអាយុ៨៤ឆ្នាំ និងប្អូនស្រីជាអ្នកមើលថែបញ្ចុកបាយ និងបោកគក់ទៅវិញ ។
លោកសុខ សំណាង សព្វថ្ងៃកំពុងសំរាកនៅផ្ទះម្តាយបង្កើតស្ថិតនៅក្នុងភូមិព្រែកតាគង់ ផ្ទះលេខ១៣៤៣ ក្នុងសង្កាត់ចាក់អង្រែងលើ ខណ្ឌមានជ័យ រាជធានីភ្នំពេញ រួចក៏កំពុងដង្ហោយរកសប្បុរសជនបន្ថែមដើម្បីជួយរំលែកក្នុងការព្យាបាលជំងឺរបស់ខ្លួនបន្តទៀតឱ្យបានធូរស្បើយ ក្រែងមានជីវិតរស់នៅបន្តទៀត ។ ជីវិតចុងក្រោយមានរសជាតិបែបនេះ ពិតជាភាពទារុណមួយ ៕
ចែករំលែកព័តមាននេះ