ខេត្តបាត់ដំបង ៖ ការបាញ់សម្លាប់សមាជិកគ្រួសារចំនួន៣នាក់ នៅតំបន់ឆ្ងាយដាច់ស្រយាលមួយកន្លែងក្នុងភូមិត្រាវជូរ ឃុំសិរីមានជ័យ ស្រុកសំពៅលូន កាលពីវេលារំលងអធ្រាត្រឈានចូលថ្ងៃទី១៩ មីនា ២០១១ សមត្ថកិច្ចបានដាក់ការសង្ស័យថា វាកើតចេញពីរឿងគំនុំ និងអាចជាក្រុមពាលស៊ីពាលសុទ្ធសាធ ។
លោកជេត វណ្ណនី ស្នងការរង និងជាប្រធានការិយាល័យកណ្តាលនគរបាលយុត្តិធម៌បានថ្លែងថា ខ្មាន់កាំភ្លើងមួយក្រុមប្រើប្រាស់កាំភ្លើង AK បានបាញ់សម្លាប់សមាជិកគ្រួសារចំនួន៣នាក់ ទាំងកំរោល ក្នុងនោះរួមមាន ១-ឈ្មោះគង់ គី អាយុ៥០ឆ្នាំ ជាឪពុក ២-ឈ្មោះពុំ ច្រិន អាយុ៤៩ឆ្នាំ ជាម្តាយ និង៣-ឈ្មោះគង់ ចាន់នី អាយុ១៧ឆ្នាំ ជាកូនស្រី ។ លោកស្នងការរងបានបញ្ជាក់ថា ក្រោយពេលបាញ់ប្រហារគ្មានទ្រព្យសម្បត្តិបន្តិចណាដែលត្រូវបាត់បង់ទេ ប៉ុន្តែម៉ូតូមួយគ្រឿងរបស់ជនរងគ្រោះត្រូវខ្មាន់កាំភ្លើងបាញ់កម្ទេចម៉ាស៊ីនចោល ហើយប្រាក់ចំនួន៦.០០០ដុល្លារ របស់ជនរងគ្រោះ ត្រូវសាច់ញាតិរកឃើញនៅលើផ្ទះដែលមិនមានបាត់បង់មួយសេនឡើយ ។
លោកជេត វណ្ណនី បានថ្លែងបញ្ជាក់ថា យោងតាមការស្រាវជ្រាវយើងរកឃើញថា ឈ្មោះគង់ គី នេះជាមុខសញ្ញាប្លន់ប្រដាប់អាវុធដែលសមត្ថកិច្ចតាមប្រមាញ់យូរហើយ។ ជននេះ និងគ្រួសារមានស្រុកកំណើតនៅឃុំអូរតាប៉ោង ស្រុកបាកាន ខេត្តពោធិ៍សាត់ ។ ជននេះមានដីកាចាប់ខ្លួនរបស់តុលាការខេត្តពោធិ៍សាត់លេខ០៧ ចុះថ្ងៃទី៣០ មករា ២០០៨ ពីបទប៉ុនប៉ងមនុស្សឃាត ដែលប្រព្រឹត្តនៅភូមិស្រះម្កាក់ ឃុំអូរតាប៉ោង ស្រុកបាកាន ខេត្តពោធ៍សាត់ ចេញដោយលោកគង់ សុខុម ចៅក្រមស៊ើបសួរតុលាការខេត្តពោធិ៍សាត់ ។
លោកជេត វណ្ណនី បានសន្និដ្ឋានថា ករណីឃាតកម្មនេះកើតចេញពីរឿងគំនុំ និងអាចសន្និដ្ឋានទៀតថា ជារឿងពាលស៊ីពាលសុទ្ធសាធ ។ កន្លងមក យើងបានប្រឹងប្រែងយ៉ាងខ្លាំងក្នុងការតាមប្រមាញ់ជននេះ ៕
ចែករំលែកព័តមាននេះ