រាជធានីភ្នំពេញ ៖ មីនតោនដែលបន្សល់ទុកតាំងពីជំនាន់សង្គ្រាម ត្រូវបានប្រជានេសាទប្រទះឃើញផុសឡើងនៅមាត់ទឹក ទន្លេសាប ទន្ទឹមផ្សារចាស់ ក្នុងសង្កាត់ជ្រោយចង្វារ ខណ្ឌជ្រោយចង្វារ ហើយប្រាប់នគរបាលមូលដ្ឋានរាយការណ៍ទៅមន្ត្រីស៊ីម៉ាក់ ចុះទៅយកកម្ទេចចោល ។
ហេតុការណ៍ប្រទះឃើញនេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ៨ព្រឹក ថ្ងៃទី២៥ ខែមីនានេះហើយមន្ត្រីស៊ីម៉ាក់ បានចុះទៅយកចេញវិញនៅវេលាម៉ោងប្រមាណ១០ព្រឹក ។
តាមនគរបាលអោយដឹងថា នៅវេលាព្រឹកនោះ មានអ្នកនេសាទជាជនជាតិអ៊ីស្លាម បានចូលទូកឈប់ចតនៅក្បែរច្រាំងទន្លេសាបបានប្រទះឃើញគ្រាប់មីនតោន ខណៈពេលដែលទឹករលកបោកបក់ និងទឹកស្រកផុត ។ បន្ទាប់ពីប្រទះឃើញគ្រាប់បានរាយការណ៍ប្រាប់នគរបាល និងអាជ្ញាធរ នាំគ្នាចោទចំណាំ និងបានរាយការណ៍ទៅមន្ត្រីស៊ីសម៉ាក់ចុះទៅយក ។ គ្រាប់មីនតោនឮនោះត្រូវបានគេដឹងថា ជាប្រភេទគ្រាប់ប្រឆាំងរថគ្រោះ កាលពីសម័យសង្គ្រាមនៅមានគុណភាពល្អគ្រាន់តែច្រេះបន្តិចបន្តួចតែប៉ុណ្ណោះ។ នៅព្រឹកនោះ គេឃើញមន្ត្រីស៊ីម៉ាកចំនួន ២នាក់បានចុះទៅកាយយកគ្រាប់នោះ ដាក់ក្នុងរថយន្ត ដើម្បីយកទៅកម្ទេចចោល ។
តាមមន្ត្រីស៊ីម៉ាក បានអោយដឹងថា គ្រាប់នោះ ម៉ាក TM46 ចំនួន២គ្រាប់ និងម៉ាក TNM46 មួយគ្រាប់ ផលិតនៅប្រទេសសូវៀត។ គ្រាប់នោះសន្សល់ទុកតាំងពីជំនាន់សង្គ្រាមលន់ណុលមកម្ល៉េះ។ តាមព័ត៌មានអោយដឹងថា កន្លងមក មានប្រជាពលរដ្ឋខ្មែរ អ៊ីស្លាម ដែលជាអ្នកនេសាទ បានប្រទះឃើញ គ្រាប់មីនតោន នៅចំណុចនោះជាច្រើនគ្រាប់មកហើយ បន្ទាប់ពីរដូវវស្សាទឹកឡើងបាក់ច្រាំង ហើយនៅពេលទឹកស្រកវិញ ទឹករលក់បោកបក់បានផុសឡើងនូវកំណប់គ្រាប់មីនតោនតែម្តង ។
តាមចាស់ដែលរស់នៅសង្កាត់ជ្រោយចង្វារបានអោយដឹងថា កាលពីជំនាន់លន់ណុលត្រង់ចំណុចនោះ ជាចំណតកប៉ាល់ កងទ័ព ដែលដឹកគ្រាប់មីននិងអាវុធយុទ្ធភណ្ឌសម្រាប់ធ្វើសង្គ្រាមជាហេតុធ្វើអោយគ្រាប់មីនតោនជាច្រើននៅរាយប៉ាយនៅច្រាំងទន្លេសាបនិងកប់ដី ហើយត្រូវបានប្រទះឃើញជាបន្តបន្ទាប់ ៕
ចែករំលែកព័តមាននេះ