រាជធានីភ្នំពេញ ៖ ដើម្បីប្រយុទ្ធ និងយកឈ្នះលើជំងឺកូវីដ១៩ (COVID-19) ដែលពិភពលោកកំពុងខ្លាចរអា ចិនបានប្រកាសប្តេជ្ញាជួយកម្ពុជាប្រយុទ្ធនឹងជំងឺកូវីដ១៩ ធ្វើឡើងដោយលោក Geng Shuang អ្នកនាំពាក្យក្រសួងការបរទេសចិន ក្នុងសន្និសីទព័ត៌មាន នាថ្ងៃទី២៣ ខែមីនា ឆ្នាំ២០២០ម្សិលមិញនេះ ។ ការប្រកាសបានធ្វើឡើង បន្ទាប់ពីក្រុមគ្រូពេទ្យជំនាញ និងសម្ភារៈវេជ្ជសាស្ត្ររបស់ចិន ត្រូវបានបញ្ជូនមកដល់ប្រទេសកម្ពុជា ។
អ្នកនាំពាក្យក្រសួងការបរទេសចិន បានលើកឡើងថា ពេលនេះជាពេលដែលចិនជួយកម្ពុជាវិញម្តង ។ លោក Geng Shuang បានបញ្ជាក់ដូច្នេះ «ឥឡូវនេះ នៅពេលដែលប្រទេសកម្ពុជាកំពុងប្រឈមមុខនឹងការងារដ៏លំបាកក្នុងការទប់ស្កាត់ការរីករាលដាលនៃជំងឺដ៏កាចសាហាវនេះវិញម្តង ប្រទេសចិនបានប្តេជ្ញាចិត្តដោយមិនរារែកថានឹងជួយកម្ពុជាឱ្យអស់សមត្ថភាព និងគ្រប់មធ្យោបាយទាំងអស់ដែលអាចធ្វើទៅបាន» ។
លោកបន្ថែមថា «នេះមិនត្រឹមតែជាការបង្ហាញពីទំនាក់ទំនងដ៏ពិសេសរវាងប្រទេសទាំងពីរប៉ុណ្ណោះទេ តែថែមទាំងបានបង្ហាញពីភាពសាកសមសម្រាប់មិត្តភាពដែកថែប ដែលមានអនាគតរួមគ្នាផងដែរ ។ ប្រទេសចិន នឹងបន្តធ្វើការជាមួយប្រទេសកម្ពុជា ដើម្បីយកឈ្នះលើជំងឺរាតត្បាតសកល ហើយនិងចូលរួមចំណែកដល់សន្តិសុខសុខភាពសាធារណៈក្នុងតំបន់ទាំងមូលផងដែរ»។
សូមបញ្ជាក់ថានៅថ្ងៃទី២៣ ខែមីនា ឆ្នាំ២០២០ ក្រុមគ្រូពេទ្យជំនាញរបស់ចិនចំនួន៧នាក់ បានបញ្ជូនមកដល់ប្រទេសកម្ពុជា ដើម្បីធ្វើសកម្មភាពប្រយុទ្ធប្រឆាំងនឹងជំងឺកូវីដ១៩នៅកម្ពុជា ៕
ចែករំលែកព័តមាននេះ