ខេត្តកំពង់ចាម ៖ ក្រោយពីមានហេតុការណ៍ផ្ទុះជំងឺកូវីដ-១៩ បានធ្វើឱ្យអាជីវករលក់ដូរនៅផ្សារធំកំពង់ចាម និងផ្សារបឹងកុក ក្នុងក្រុងកំពង់ចាម នាំគ្នាត្អូញត្អែថា រាល់ថ្ងៃនេះលក់មិនសូវដាច់នោះទេ ព្រោះមនុស្សម្នាក្មេងចាស់ប្រុសស្រី ក៏មិនសូវនាំគ្នាមកផ្សារទិញទំនិញ ដូចកាលពីមុនទៀតហើយ ។ ហើយបើនៅតែស្ងាត់បែបនេះ ពួកគាត់សម្រេចចិត្តផ្អាកលក់ជាបណ្តោះអាសន្ន ។
ជួបជាមួយកោះសន្តិភាព បុរសវ័យជាង២០ឆ្នាំម្នាក់ ជាអ្នកលក់ផ្លែឈើបានឱ្យដឹងថា ដំបូងឡើយខ្លួនបានជួយលក់ផ្លែឈើឱ្យម្ដាយមីង ដែលគាត់បានឲ្យកម្រៃខ្លះសម្រាប់ចាយវាយ ក្រោយមកទៀត ខ្លួនក៏បានចេះពីរបៀបលក់ដូរយល់កាន់តែច្បាស់ ក៏ចាប់ផ្ដើមបើករបរលក់ផ្លែឈើដោយខ្លួនឯងក្នុងមួយថ្ងៃ គេអាចលក់បានរហូតទៅដល់៥០ម៉ឺនរៀល ចាប់តាំងពីពេលព្រឹករហូតដល់ម៉ោងជាង៨យប់ ទើបសម្រាក ។ ប៉ុន្តែក្រោយពីមានការភ្ញាក់ផ្អើលជំងឺកូវីដ-១៩នេះមក ធ្វើឱ្យប្រាក់ចំណូលនៃការលក់ដូរផ្លែឈើបានធ្លាក់ចុះប្រមាណជា៣០ភាគរយ ។
អ្នកស្រីហន សំណាង វ័យ៤២ ឆ្នាំរស់នៅសង្កាត់វាលវង់ ក្រុងកំពង់ចាម ជាអ្នកលក់ផ្លែឈើគ្រប់មុខនៅ ផ្សារបឹងកុក បានរៀបរាប់ប្រាប់ឲ្យដឹងនាព្រឹកថ្ងៃទី២៤ មីនា នេះថា មុនពេលដែលមានហេតុការណ៍ជំងឺកូវីដ-១៩ផ្ទុះឡើង ក្នុងមួយថ្ងៃគាត់អាចរកចំណូលបានក្នុងចន្លោះពី៤០ទៅ៥០ម៉ឺនរៀល ។ តែក្រោយពីមានជំងឺនេះផ្ទុះឡើង ប្រជាពលរដ្ឋមានការខ្លាចរអាមិនសូវមានអ្នកដើរមកផ្សារប៉ុន្មាននោះទេ ជាក់ស្ដែងនៅថ្ងៃទី២៣ មីនា គាត់លក់បានតែជាង២០ម៉ឺនរៀលប៉ុណ្ណោះ ។ ប្រសិនពេលខាងមុខ មានសភាពស្ងាត់មនុស្សកាន់តែមានការថមថយដូច្នេះ ការលក់ដូររបស់គាត់ក៏នឹងត្រូវផ្អាកជាបណ្ដោះអាសន្នមួយរយៈ ។
ដោយឡែក អ្នកលក់ភេសជ្ជៈនៅក្រោមស្ពានគីហ្សុណាបានឲ្យដឹងដែរថា កាលពីមុនអ្នកលក់ដូរមានជាច្រើនកន្លែង នៅក្រោមស្ពានជាប់មាត់ទន្លេមេគង្គនាពេលល្ងាច ហើយថែមទាំងសម្បូរមនុស្សក្មេងចាស់ប្រុសស្រីបាននាំគ្នាធ្វើដំណើរកម្សាន្តលេងស្រូបយកខ្យល់ អាកាសតាមម៉ូតូនិងរថយន្តជាច្រើនហើយការលក់ដូរក៏ដាច់ទៀតផង។ តែក្នុងរយៈពេល១០ថ្ងៃចុងក្រោយនេះ ប្រជាពលរដ្ឋមានការភ្ញាក់ផ្អើលនិងខ្លាចរអារពីជំងឺខាងលើ ពេលល្ងាចៗមានមនុស្សដើរចំនួនតិច ហើយអ្នកលក់ក៏លក់មិនដាច់ មួយចំនួនធំបាននាំគ្នាផ្អាកលក់ជាបណ្ដោះអាសន្ន ។
ដោយឡែក នៅខាងត្បូងផ្សារធំសម្បូរមនុស្សលក់បាយសម្ល តែនៅថ្ងៃទី ២៣មីនាមានអ្នកលក់តិច ។កន្លែងចំណតរថយន្តក្រុងកំពង់ចាម នៅយប់ថ្ងៃទី២៣ មីនា ឃើញមានតែតុនឹងជើងម៉ាមិនបានឃើញមនុស្សចូលហូបនោះទេ ដោយឡែកនៅផ្សាររាត្រីក្រុងកំពង់ចាមសំបូរតែអ្នកលក់តែអ្នកទិញមានតិចតួច ។ សូមបញ្ជាក់ថា ចាប់តាំងពីពេលដែលមានការភ្ញាក់ផ្អើលផ្ទុះជំងឺកូវីដ-១៩ មានហាងលក់ដូរមួយចំនួននៅមាត់ទន្លេក្រុងកំពង់ចាម បានបិទទ្វារផ្អាកលក់ជាបណ្ដោះអាសន្ន ហើយហាងមួយចំនួនទៀត ដែលលក់ដូររាល់ថ្ងៃក៏មិនសូវមានភ្ញៀវចូលហូបប៉ុន្មានទេ។
ចែករំលែកព័តមាននេះ