រាជធានីភ្នំពេញ៖ បន្ទាប់ពីកម្ពុជារ រកឃើញករណីអ្នកឆ្លងជំងឺកូវីដ-១៩ កាន់តែកើនឡើង បណ្ដាអាជីវកម្មមួយចំនួនបានផ្អាកបណ្ដើរៗហើយ ជាក់ស្ដែងផ្សារទំនើប ភោជនីយដ្ឋាន ហាងអាហារតូចៗជាដើម ដើម្បីទប់ស្កាត់ ឬដោយសារតែខ្លាចការឆ្លងរាលដាល បន្តបន្ទាប់ ទៀត ។
បុគ្គលិកធ្វើការតាមក្រុមហ៊ុននានា បាននិយាយពីផលលំបាករបស់ខ្លួន ដោយសារតែស្វែង រកហាងអាហារសម្រាប់ទទួលទានដូចសព្វដងមិនបាន ព្រោះតែគេបានបិទបណ្ដើរៗហើយ ជាក់ស្ដែងហាងមាតុភូមិមួយកន្លែងនៅតាមបណ្ដោយផ្លូវ ៣៦០សង្កាត់បឹងកេងកងបី បាន បិទទ្វារដោយមិនបញ្ជាក់ពីមូលហេតុ ហើយភោជនីយដ្ឋានផ្សេងទៀត ក៏បានបិទទ្វារដូចគ្នា គឺប្រៀបបីដូចជារដូវចូលឆ្នាំ ឬភ្ជុំបិណ្ឌរាល់ឆ្នាំ ព្រោះរដូវទាំងពីរនេះ ពលរដ្ឋនៅភ្នំពេញបាន បិទអាជីវកម្មរបស់ខ្លួន រួចហើយទៅលេងស្រុកកំណើតរបស់ខ្លួន ឬធ្វើដំណើរកម្សាន្តទៅ តំបន់ទេសចរណ៍នានាជាដើម តែនេះមិនទាន់ដល់រដូវចូលឆ្នាំ ផងក៏បិទទ្វារបណ្ដើរៗទៅ ហើយ ។
ភោជនីយដ្ឋានមួយកន្លែងទៀតឈ្មោះ សម្ផស្សបុកល្ហុង នៅម្ដុំទួលស្វាយព្រៃ រាជធានី ភ្នំពេញ មិនបានបិទទ្វារទេ គឺនៅចំអិនអាហារជូនភ្ញៀវធម្មតា គ្រាន់តែមិនបម្រើភ្ញៀវ នៅក្នុង ហាងប៉ុណ្ណោះ ពោលគឺភ្ញៀវអាចកុម្ម៉ង់អាហារខ្ចប់យកទៅទទួលទាននៅគេហដ្ឋាន ឬនៅ ការិយាល័យរបស់ពួកគាត់បាន តែមិនឱ្យភ្ញៀវចូលបរិភោគក្នុងហាងដូចមុនៗឡើយ និង ធ្វើឱ្យបាត់បង់ភ្ញៀវកាន់តែច្រើន ។
បុគ្គលិកភោជនីយដ្ឋានមួយនេះបាននិយាយថា ថៅកែមិនឱ្យទទួលភ្ញៀវទេ តែភ្ញៀវអាច ទិញម្ហូបកុម្ម៉ង់ទៅហូបបាន គឺដើម្បីការពារសុវត្ថិភាពភ្ញៀវផង និងសុវត្ថិភាពបុគ្គលិកបម្រើ ការក្នុងភោជនីយដ្ឋានផងដែរ ។ តែបើសិនជានៅតែទទួលភ្ញៀវធម្មតានោះ ហានិភ័យនៃ ការរាលដាលជំងឺឆ្លងអាចនឹងខ្ពស់ ដោយសារតែភ្ញៀវមកច្រើន ហើយមិនដឹងថានរណា មានជំងឺនេះ ឬអត់ ។
លោក អាន់ ច័ន្ទថ្លា ម្ចាស់ភោជនីយដ្ឋានមួយកន្លែងនៅម្ដុំបូកគោ ក៏បាននិយាយថា លោក បានបិទទ្វារហាងមួយរយៈសិនហើយដើម្បីការពារសុវត្ថិភាពបុគ្គលិកពីការឆ្លងជំងឺមួយនេះ ព្រោះថាភោជនីយដ្ឋាន គឺជាកន្លែងទទួលភ្ញៀវប្លែកៗរហូត មិនមែនភ្ញៀវដដែលនោះឡើយ ។ លោកថា៖ « នៅពេលស្ថានភាពស្ងប់ស្ងាត់វិញយើងនឹងដំណើរការហាងនេះឡើងវិញ ហើយបុគ្គលិកក៏អាចចូលធ្វើការវិញបានជាធម្មតា» ។
លោកបន្តថា មុនពេលបិទជាបណ្ដោះអាសន្ន លោកបានហៅបុគ្គលិកទាំងអស់មកប្រជុំ និងសួរនាំថាគួរតែធ្វើបន្ត ឬផ្អាក ។ ភាគច្រើននៃបុគ្គលិកស្នើសុំឱ្យផ្អាក ដោយសារតែខ្លាច ឆ្លងជំងឺនេះ ហើយពួកគាត់ក៏បានព្រមព្រៀងថា ពួកគាត់យកកម្រៃតែថ្ងៃពួកគាត់ធ្វើការទេ ចំណែកពេលឈប់សម្រាកពួកគាត់មិនយកឡើយ ។ ម្យ៉ាងទៀត ក្នុងពេលជំងឺនេះបាន ចាប់ផ្ដើមរកឃើញករណីនៅកម្ពុជាជាបន្តបន្ទាប់ ភ្ញៀវក្នុងហាងក៏បានធ្លាក់ចុះបន្តបន្ទាប់ដែរ ជាក់ស្ដែងមុនបិទ គឺភ្ញៀវធ្លាក់ចុះរហូតដល់ ៧០ភាគរយឯណោះ ដូច្នេះហើយទើបលោក សម្រេចចិត្តបិទបណ្ដោះអាសន្នតែម្ដងទៅ ។ ទន្ទឹងនឹងករណីរកឃើញកូវីដ-១៩ នេះដែរ ពលរដ្ឋក្នុងរាជធានីភ្នំពេញមូយចំនួនធំក៏បាន ទិញស្បៀងទុកនៅផ្ទះបង្ការក្រែងអាជីវករ នៅតាមផ្សារបិទតូប ឬហាងមិនលក់នៅពេល ដែលរកឃើញជំងឺនេះកាន់តែច្រើន ។
កញ្ញា លក្ខិណា ពលរដ្ឋក្នុងរាជធានីភ្នំពេញមួយរូបបាននិយាយថាកញ្ញា បានទិញស្បៀង ដែលអាចទុកបានយូរបានខ្លះៗហើយ ដើម្បីត្រៀមបង្ការក្រែងអត់មានគេលក់អីញ៉ាំ ហើយ ក៏មិនចង់ឱ្យអ្នកផ្ទះចេញទៅផ្សាររហេតរហូតដែរ ពោលគឺមានស្បៀងនៅផ្ទះអាចធ្វើម្ហូប ញ៉ាំនៅផ្ទះបាន ដូចជាត្រីងៀត សាច់គោងៀត ត្រីខកំប៉ុង និងអង្ករជាដើម ព្រោះស្បៀង ទាំងនេះ អាចទុកបានយូរ និងទិញមុនពេលវាឡើងថ្លៃផងដែរ ។
អាជ្ញាធរកម្ពុជា ក៏បានប្រកាស និងអំពាវនាវផងដែរដល់ពលរដ្ឋកម្ពុជា ដែលមិនចាំបាច់ សូមស្នាក់នៅក្នុងផ្ទះមួយរយៈសិន ដើម្បីទប់ស្កាត់ការឆ្លងរាលដាល ជាពិសេសពលករ ដែលទើបមកពីប្រទេសថៃ គួរតែនៅដាច់ដោយឡែក ១៤ថ្ងៃ ដោយកុំទាន់ស្និទ្ធស្នាល ជាមួយសមាជិកក្នុងគ្រួសារ ៕ កែសម្រួលដោយ ៖ សុឃាក់
ចែករំលែកព័តមាននេះ