ខេត្តព្រៃវែង ៖ ស្របពេលដែលវីរុសកូវីដ-១៩កំពុងរីករាលលើពិភពលោក ហើយនៅក្នុងប្រទេសកម្ពុជាត្រូវបានគេរកឃើញមានអ្នកផ្ទុករហូតដល់ទៅ៨៧ករណីក៏ដោយ ប៉ុន្តែសម្រាប់ខេត្តព្រៃវែងរហូតមកដល់ពេលនេះនៅមិនទាន់រកឃើញមានអ្នកឆ្លងវីរុសកូវីដ-១៩នេះនៅឡើយទេ។
ទោះបីជាយ៉ាងនេះក្តី រយៈពេល២-៣ថ្ងៃកន្លងមកនេះ គេសង្កេតឃើញពលករចំណាកស្រុកទាំងក្នុងនិងក្រៅប្រទេសរាប់ពាន់នាក់បានវិលត្រឡប់ចូលមកស្រុកកំណើតក្នុងខេត្តព្រៃវែងវិញ ដោយគេមិនបានដឹងថា ក្នុងចំណោមមនុស្សទាំងអស់នោះមានអ្នកផ្ទុកវីរុសកូវីដ-១៩នេះ ឬក៏អត់នោះទេ។
ដូច្នេះដើម្បីទប់ស្កាត់កុំអោយមានការឆ្លងជំងឺប្រភេទនេះ ក៏ដូចជាដើម្បីជួយសង្គ្រោះនិងព្យាបាលដល់អ្នកជំងឺដែលមានផ្ទុកជំងឺប្រភេទនេះអោយបានទាន់ពេលវេលា អាជ្ញាធរខេត្តព្រៃវែងបានដាក់ចេញនូវយុទ្ធនាការថ្មីមួយដោយអោយមន្ត្រីជំនាញពាក់ពន្ធ័ទាំងអស់ រួមទាំងអាជ្ញាធរនិងសមត្ថកិច្ចមូលដ្ឋាន ត្រូវចុះផ្សព្វផ្សាយនៅតាមភូមិនិងតាមខ្នងផ្ទះ ដើម្បីអោយប្រជាពលរដ្ឋបានយល់ដឹង និងចូលរួមការពារទប់ស្កាត់វីរុសកូវីដ-១៩នេះទាំងអស់គ្នា។
នៅក្នុងខ្លឹមសារនៃយុទ្ធនាការផ្សព្វផ្សាយនេះ បានណែនាំអោយប្រជាពលរដ្ឋដែលជាពលករទើបវិលត្រឡប់មកដល់ផ្ទះវិញ ត្រូវរស់នៅដាច់ដោយឡែកពីក្រុមគ្រួសាររយៈពេល១៤ថ្ងៃសិន ដើម្បីអោយប្រាកដថា ខ្លួនមិនមានផ្ទុកវីរុសកូវីដ-១៩ និងដើម្បីកុំអោយឆ្លងទៅក្រុមគ្រួសារ ក្នុងករណីដែលខ្លួនមានផ្ទុកជំងឺប្រភេទនេះ។
ដោយឡែក អ្នកដែលមានអាការៈគួរអោយសង្ស័យ ដូចទៅនឹងរោគសញ្ញានៃជំងឺកូវីដ-១៩ ត្រូវប្រញាប់រាយការណ៍ទៅមន្ត្រីសុខាភិបាលតាមរយៈទូរសព្ទ័លេខ១១៥ ឬទៅកាន់មណ្ឌលសុខភាពផ្ទាល់ ដែលនៅជិតផ្ទះរបស់ខ្លួន ដើម្បីអោយក្រុមគ្រូពេទ្យពិនិត្យនិងព្យាបាល អោយទាន់ពេលវេលា។ ក្រៅពីនេះ ក៏បានណែនាំអោយបងប្អូនប្រជាពលរដ្ឋទាំងអស់ គោរពតាមសារចរណ៍ណែនាំរបស់រាជរដ្ឋាភិបាល ស្តីពីវិធានការបង្ការ និងទប់ស្កាត់ការរាតត្បាតនៃជំងឺកូវីដ-១៩ផងដែរ។
ក្រៅពីការដាក់ចេញនូវយុទ្ធនាការផ្សព្វផ្សាយនៅតាមភូមិ និងតាមខ្នងផ្ទះខាងលើនេះ អាជ្ញាធរខេត្តព្រៃវែង ក៏បានបង្កើតទីតាំងសម្រាប់ពិនិត្យ និងព្យាបាលអ្នកជំងឺដែលសង្ស័យ ឬមានផ្ទុកជំងឺកូវីដ-១៩នេះចំនួន៣ទីតាំងនៅក្នុងក្រុងព្រៃវែង ដែលទីតាំងទី១-គឺនៅអាគារសណ្ឋាគារចុងប៉ម មានចំនួន៤៨បន្ទប់ ទីតាំងទី២-គឺនៅអគារផ្ទះសំណាក់ ដែលមានចំនួន២២បន្ទប់ និងទីតាំងទី៣-គឺនៅអគារសាលាបឋមសិក្សាសម្តេចតេជោ ហ៊ុន សែន ព្រៃវែងក្រុង ដែលមានចំនួន៣៣បន្ទប់ ហើយក្នុងបន្ទប់និមួយៗមានបំពាក់ទៅដោយសម្ភារៈបរិក្ខា និងប្រពន្ធ័ទឹកភ្លើងគ្រប់បន្ទប់ទាំងអស់ផងដែរ។
គូរបញ្ជាក់ផងដែរថា គិតត្រឹមថ្ងៃទី២១ មីនា ឆ្នាំ២០២០នេះ ខេត្តព្រៃវែ មានពលករបានវិលត្រឡប់មកវិញសរុបចំនួន៣៨៧៥នាក់ ស្រី១៨៩១នាក់ ក្នុងនោះចំណាកស្រុកក្នុងប្រទេសមានចំនួន៣៤៩៩នាក់ ស្រី១៧៤០នាក់ និងក្រៅប្រទេសមានចំនួន៣៧៦នាក់ ស្រី១៥១នាក់ ហើយប្រទេសដែលពួកគាត់បានចាកចេញរួមមាន ប្រទេសថៃចំនួន៣២៧នាក់ ស្រី១៣៣នាក់, ប្រទេសម៉ាឡេស៊ី៦នាក់ ស្រី៣នាក់, ប្រទេសកូរ៉េ១៥នាក់ ស្រី៥នាក់, ប្រទេសជប៉ុន២នាក់ និងប្រទេសចិន១នាក់ ប៉ុន្តែរហូតមកដល់ពេលនេះ ពលករទាំងនោះ គេនៅមិនទាន់រកឃើញមាននរណាម្នាក់មានអាការៈគួរឱ្យសង្ស័យ ឬមានផ្ទុកវីរុសកូវីដ-១៩នៅឡើយទេ៕ (កែសម្រួលដោយ ៖ ធីតា)
ចែករំលែកព័តមាននេះ