ខេត្តក្រចេះ ៖ បើតាមសេចក្តីរាយការណ៍បានឱ្យដឹងថា នៅជារៀងរាល់យប់ ជាពិសេសពេលព្រលប់ អ្នកធ្វើដំណើរតែងតែឃើញមានភ្នក់ភ្លើង ដែលត្រូវអ្នកភូមិរស់នៅតាមភូមិផ្សេងៗនាំគ្នាគរដុតខាងមុខផ្ទះ នៅអមសងខាងផ្លូវលំ និងផ្លូវកៅស៊ូ ដែលមើលទៅក្រហមដេរដាសពេញភូមិ ប្រៀបដូចជា ប្រទីបដែលគេបណ្តែតទឹកនាថ្ងៃចេញព្រះវស្សា។
ការនាំគ្នាដុតភ្នក់ភ្លើងនៅតាមមុខផ្ទះជារៀងរាល់យប់ របស់អ្នករស់នៅក្នុងភូមិនានានៅខេត្តក្រចេះ ត្រូវគេមើលឃើញថា បានធ្វើឡើងកាលអំឡុងប៉ុន្មានថ្ងៃជាប់ៗគ្នាកន្លងទៅនេះ បន្ទាប់ពីបាតុភាពនៃមេរោគ កូវីដ១៩ កំពុងតែឆ្លងរីករាតត្បាតជាសកល និងបានជះឥទ្ធិពលមកដល់ប្រទេសកម្ពុជាផងដែរ។
អ្នកភូមិបានផ្អើលតៗតាមគ្នានាំគ្នាដុតភ្នក់ បាចអំបិល និងមានខ្លះបានវាយភ្នក់ធ្វើឱ្យបែកផ្កាភ្លើងឡើង ព្រមទាំងបាននិយាយបណ្តេញឲ្យខ្មោចព្រាយបីសាច ពិសេសជំងឺកាចសាហាវ កុំឲ្យឆ្លងចូលក្នុងភូមិរបស់ពួកគាត់។
ពួកគាត់មានជំនឿស្រដៀងគ្នាថា ការធ្វើឧបកិច្ចបែបនេះ គឺភាពឧបទ្រពចង្រៃដែលកំពុងកើតមានមិនមករីករាតត្បាតនៅក្នុងស្រុកភូមិរបស់ពួកគាត់ ដែលកំពុងតែរស់នៅនោះទេ។
ពួកគាត់និយាយថា ពួកគាត់នឹងបន្តដុតភ្នក់ភ្លើងជារៀងរាល់យប់ លុះត្រាស្ថានភាពជំងឺឆ្លងជាសកល ឬកូវីដ១៩ បានធូរស្បើយទើបពួកគាត់ឈប់ដុតភ្នក់ និងបាចអំបិលនេះ។
កំពុងតែឈើមើលភ្នក់ភ្លើងដែលកំពុងដុតឆេះនៅខាងមុខផ្ទះ ពលរដ្ឋរស់នៅឃុំបុសលាវ ស្រុកចិត្របុរី ម្នាក់បានលើកឡើងឲ្យដឹងស្រដៀងគ្នានឹងអ្នកភូមិនៅក្រុងក្រចេះដែរថា ការដុតភ្នក់ភ្លើង បាចអំបិល វាយបំបែកភ្នក់ គឺធ្វើឡើងក្នុងគោលបំណងដេញភាពឧបទ្រពចង្រៃចេញពីភូមិ មិនថា តែជំងឺឆ្លង ក៏ដូចជាខ្មោចព្រាយបីសាចជាដើម។
គាត់និយាយថា កន្លងមក ឲ្យតែមានជំងឺឆ្លងបានឆ្លងរីករាតត្បាតដូចជាការ គ្រុន ឈឺ និងជំងឺរាគរូស គឺអ្នកភូមិតែងតែប្រើវិធីដុតភ្នក់ ឬចង់រូបទីងម៉ូងបែបនេះជាវិធីបង្ការ កុំឲ្យមានបន្តរីករាតត្បាត។
បើទោះបីជាមានការដុតភ្នក់សម្រាប់រំងាប់ផ្លូវអារម្មណ៍ក្នុងជំនឿថា ធ្វើឡើងដើម្បីបណ្តេញភាពឧបទ្រពចង្រៃ កុំឲ្យឆ្លងរីករាតត្បាតយ៉ាងណាក្តី តែក្រុមគ្រូពេទ្យថា នេះមិនមែនជាវិធីបង្ការ នោះទេ ដោយគ្រាន់តែជាជំនឿអរូបិយតែប៉ុណ្ណោះ វិធីដែលបង្ការការពារពីជំអឺឆ្លងនោះបាន គឺ ពលរដ្ឋត្រូវរស់នៅប្រកបដោយអនាម័យខ្ពស់ បរិស្ថានស្អាត ត្រូវលាងដៃសម្អាតខ្លួនប្រាណឲ្យបានញឹកញាប់មុននឹងទទួលហូបចុកចំណីអារហារប្រចាំថ្ងៃ៕ (កែសម្រួលដោយ ៖ បុប្ផា)
ចែករំលែកព័តមាននេះ