រាជធានីភ្នំពេញ ៖ សម្តេចស ខេង ឧបនាយរដ្ឋមន្ត្រី រដ្ឋមន្ត្រីក្រសួងមហាផ្ទៃបានស្នើសមាជិកគ្រួសារ និងអាជ្ញាធរមានសត្ថកិច្ចធ្វើការការរាយការណ៍ពីសមាជិកខ្លួនដែលមកពីប្រទេសថៃ និងប្រទេសផ្សេងៗ ដើម្បីពិនិត្យសុខភាព និងនៅឲ្យឆ្ងាយពីសមាជិករយៈពេល១៤ថ្ងៃ ចូលរួមទប់ស្កាត់ជំងឺកូវីដ១៩ ។ យោងតាមសម្លេងដែលផ្សាយជាសាធារណៈតាមរយៈប្រព័ន្ធតេឡេក្រាមសម្តេច ស ខេង បានឲ្យដឹងយ៉ាងដូច្នេះថា ៖« នៅតាមច្រកដូង នៅច្រលកំរៀង ខេត្តបាត់ដំបង និងខេត្តច័ន្ទ បុរី ហើយមិនដឹងច្រកណាទៀតបងប្អូនពលករខ្មែរបានសម្រុកចូលមកពីថៃ ដោយមនុស្សមិនតិចជាង១ពាន់នាក់ទេ ហើយគ្មានបានត្រួតពិនិត្យ សុខភាពច្បាស់លាស់នោះទេ ដូច្នេះគាត់មកនឹងទៅតាមស្រុកកំណើតនៅតាមខេត្តរៀងខ្លួនហើយ» ។
សម្តេចក្រឡាហោម ស ខេងក៏បានស្នើអភិបាលខេត្ត និងថ្នាក់ដឹកនាំសាម៉ីនីមួយៗ នៅតាមមូលដ្ឋាន ភូមិ ឃុំ ស្រុក ធ្វើការរាយការណ៍ពីអ្នកដែលមកពីថៃ ដើម្បីឲ្យគ្រូពេទ្យទៅពិនិត្យ ។ ជាងនេះ បើមានការសង្ស័យត្រូវទុកឲ្យគាត់នៅ ដោយឡែកពីសមាជិកគ្រួសារសិន ដោយកុំឲ្យគាត់ប៉ះពាល់ជាមួយអ្នកដទៃក្នុងនោះសមាជិកក្នុងផ្ទះក៏កុំឲ្យប៉ះពាល់ដោយទុកគាត់នៅរយៈពេល១៤ថ្ងៃ ហើយបើមានការសង្ស័យត្រូវយកសំណាកទៅវិទ្យាស្ថានប៉ាស្ទ័រ ដើម្បីពិនិត្យ ។ ជាមួយគ្នានោះដែរ សម្តេច ស ខេង ក៏បានបើសិនមានប្រជាពលរដ្ឋមកពីច្រកផ្សេងៗទៀត ត្រូវតែធ្វើវិធានការបែបនេះ ដើម្បីទប់ស្កាត់ការរីករាលដាលជំងឺកូវីដ១៩នេះ ។
ចំណែកលោក ហេង សួរ អ្នកនាំពាក្យក្រសួងការងារ និងបណ្តុះបណ្តាលវិជ្ជាជីៈ បានលើកឡើងថា សូមបងប្អូនដែលទើបវិលត្រឡប់ពីខេត្តឆ្ងាយ ឬបរទេសចូលរួមរក្សាអនាម័យ និងសុខភាពទាំងអស់គ្នា ដើម្បីប្រយុទ្ធប្រឆាំងនឹងជំងឺកូវីដ១៩ ។ លោកបញ្ជាក់ថា ៖«ខ្ញុំយល់ពីអារម្មណ៍របស់បងប្អូនក្នុងកាលៈទេសៈនៃការប្រឈមពេញពិភពលោកនេះ ប៉ុន្តែការគោរពវិធានណែនាំ និងជឿទៅលើការណែនាំរបស់ពេទ្យក៏ដូចជា ការវាយតម្លៃកម្រិតហានិភ័យនៃវិស័យ ឬសកម្មភាពណាមួយរបស់ជំនាញ នៅតែជាជម្រើសដែលល្អបំផុតសម្រាប់បងប្អូន ៕
ចែករំលែកព័តមាននេះ