ខេត្តបាត់ដំបង ៖ ស្ទើរតែគ្មានមនុស្សធ្វើដំណើរនៅតាមដងវិថីនានា លំនៅឋាន ហាងលក់ទំនិញមួយចំនួន និងតូបលក់ដូរភាគច្រើននៅតាមបណ្ដាផ្សារធំៗ ត្រូវបង្ខំបិទទ្វារយ៉ាងស្ងាត់ជ្រងំ ខណៈអ្នកតស៊ូលក់ចំណីអាហារ ត្រី សាច់…
ខេត្តបាត់ដំបង ៖ ស្ទើរតែគ្មានមនុស្សធ្វើដំណើរនៅតាមដងវិថីនានា លំនៅឋាន ហាងលក់ទំនិញមួយចំនួន និងតូបលក់ដូរភាគច្រើននៅតាមបណ្ដាផ្សារធំៗ ត្រូវបង្ខំបិទទ្វារយ៉ាងស្ងាត់ជ្រងំ ខណៈអ្នកតស៊ូលក់ចំណីអាហារ ត្រី សាច់ បន្លែ បានត្អូញត្អែរពីការខាតបង់ ព្រោះគ្មានអតិថិជនទិញ។ នេះជាការពិពណ៌នាអំពីទិដ្ឋភាពក្នុងក្រុងបាត់ដំបង ដែលធ្លាប់តែអ៊ូអរ ស្រាប់តែពេលនេះបែរជាស្ថិតក្នុងស្ថានភាពស្ងប់ស្ងាត់ ស្របពេលដែលជំងឺ «វីរុសកូរ៉ូណាថ្មី ឬកូវីដ.១៩» កំពុងផ្ទុះឡើងយ៉ាងកក្រើក។
ស្ថិតក្នុងកាលៈទេសៈបែបនេះ ប្រជាពលរដ្ឋស្ទើរគ្រប់ទីកន្លែង បានបង្ហាញហេតុផលប្រហាក់ប្រហែលគ្នាអំពីមូលហេតុដែលនាំឲ្យមានការបិទទ្វារសម្ងំនៅក្នុងផ្ទះ បិទទ្វារហាងលក់ទំនិញ ឬបិទតូបលក់ដូរនៅក្នុងផ្សារនានាក្នុងក្រុងបាត់ដំបង។ បើតាមហេតុផលពលរដ្ឋ ឬអាជីវករបានលើកឡើង គឺគ្មានអ្វីក្រៅពីខ្លាចមេរោគ «វីរុសកូរ៉ូណាថ្មី ឬ កូវីដ.១៩» ដែលជាជំងឺឆ្លងយ៉ាងសាហាវនោះទេ។
បើពិនិត្យលើទិដ្ឋភាពជាក់ស្ដែង នៅត្រឹមថ្ងៃទី២២ ខែមីនា ឆ្នាំ២០២០នេះ នៅលើដងផ្លូវនានា ក្នុងក្រុងបាត់ដំបង ហាក់ស្ថិតក្នុងស្ថានភាពស្ងប់ស្ងាត់បំផុត។ គេឃើញមានអ្នកដំណើរតិចទូចបំផុត ពលរដ្ឋមួយចំនួនសម្ងំនៅលំនៅឋាន ហាងលក់ទំនិញខ្លះបិទទ្វារ និងខ្លះទៀតបើកទ្វារតែគ្មានអតិថិជន។ រីឯតូបលក់ដូរភាគច្រើននៅតាមបណ្ដាផ្សារធំៗ នៃទីក្រុងបុរាណមួយនេះ ក៏ត្រូវបង្ខំចិត្តបិទបណ្ដោះអាសន្នស្ងាត់ជ្រៀបដែរ លើកលេងតែអ្នកលក់ដូរចំណីអាហារ ត្រី សាច់ បន្លែ មួយចំនួនប៉ុណ្ណោះ ដែលតស៊ូបង្ខំចិត្តដាក់លក់ទាំងត្អូញត្អែរលក់មិនដាច់ ប្រឈមនឹងការខាតបង់ ព្រោះគ្មានអ្នកទិញ។ នៅតាមបណ្ដាសាលារៀន ក្លឹបកំសាន្តរាត្រីនានា និងតាមបណ្ដាអាហារដ្ឋាន ឬភោជនីយដ្ឋានមួយចំនួនក៏ត្រូវបង្ខំបិទទ្វារយ៉ាងស្ងាត់ជ្រងំផងដែរ ព្រោះតែខ្លាច «កូវីដ.១៩» យាយីដល់អាយុជីវិត។
យើងក្រឡេកទៅមើលផ្សារធំបាត់ដំបង (ផ្សារណាត់) ដែលជាទីផ្សារធ្លាប់តែមមាញឹកបំផុត ស្ថិតចំកណ្ដាលបេះដូងនៃខេត្តនេះ ពេលនេះកំពុងក្លាយជាទីផ្សារដ៏ស្ងាត់ជ្រងំ។ គេឃើញមានអាជីវករតិចតួចណាស់ដែលបានបើកតូបលក់ តែហាក់គ្មានអតិថិជនចូលទិញឡើយ ខណៈតូបលក់ភាគច្រើនបានបិទទ្វារ។ អាជីវករលក់មាស និងប្ដូរប្រាក់នៅក្នុងផ្សារនេះម្នាក់ បានថ្លែងប្រាប់កោះសន្តិភាពថា អ្នកលក់មួយចំនួននៅតែបន្តបើកតូបលក់ដូរ តែមិនសំបូរអ្នកទិញទេ។
អាជីវកររូបនេះ បាននិយាយដូច្នេះថា «ខ្ញុំនៅតែមកបើកកន្លែងលក់មាស និងប្ដូរប្រាក់ តែខ្ញុំលក់មិនដាច់ទេ។ គ្មានអ្នកទិញគ្រឿងអលង្ការ ឬប្ដូរប្រាក់ទេ តែសំបូរអ្នកយកមាសមកលក់ ដើម្បីយកប្រាក់ទៅទិញគ្រឿងបរិភោគ ឧបភោគនានាសម្រាប់ទុកនៅផ្ទះ»។ ស្ថិតក្នុងស្ថានភាពបែបនេះ គាត់បានប្រាប់ថា អាជីវករភាគច្រើនបានបង្ខំចិត្តបិទទ្វារតូបលក់ដូរ អាចបណ្ដាលមកពីពួកគេខ្លាចជំងឺ «កូវីដ ១៩» នេះឯង ហើយបើបើកតូបលក់ដូរក៏គ្មានអ្នកទិញដែរ ព្រោះអ្នកទិញក៏ខ្លាចជំងឺនេះដូចគ្នា។
រីឯអ្នកលក់មាន់ម្នាក់នៅ «ផ្សារណាត់» នេះដែរ បានប្រាប់ថា ស្ថានភាពស្ងប់ស្ងាត់នេះ បានកើតឡើងជាងមួយសប្ដាហ៍កន្លងមកហើយ។ ស្ត្រីរូបនេះបានត្អូញត្អែរបែបនេះថា «កន្លងទៅ ខ្ញុំធ្លាប់លក់មាន់ក្នុងមួយថ្ងៃៗអស់រាប់សិបក្បាល តែពេលនេះបាត់ម៉ូយអស់..។ ម្សិលម៉ិញខ្ញុំលក់អស់តែ១ក្បាលគត់ ហើយថ្ងៃនេះមិនទាន់លក់ដាច់១ក្បាលទេ។ មិនមែនមានតែខ្ញុំទេ ដែលលក់មិនដាច់ អ្នកលក់បន្លែ ត្រី សាច់ ដទៃទៀត ក៏ជួបបញ្ហានេះដូចគ្នាដែរ។ មួយថ្ងៃៗមានតែការខាតបង់ មើលទៅដាច់បាយហើយ..»។
ដោយឡែកបើពិនិត្យមើលទិដ្ឋភាពនៅឯ «ផ្សារបឹងឈូក» ឯណោះវិញ ដែលជាទីផ្សារបន្ដុំទៅដោយទំនិញគ្រប់មុខ ក៏មិនខុសពីផ្សារណាត់នេះដែរ។ តូបលក់ដូរភាគច្រើននៅក្នុងផ្សារនេះ ក៏ត្រូវបានបិទផង ដែរ ប៉ុន្តែអ្នកលក់បន្លែ ត្រី សាច់ មួយចំនួន នៅតែបន្តដាក់លក់នៅជុំវិញផ្សារនេះ ស្ងាត់តែអតិថិជនទេ ដែលមិនឃើញដើរទិញ។
អាជីវករផ្សារនេះ បានប្រាប់ថា បើតាមការកត់សម្គាល់ មានតែទំនិញម្ហូបអាហារ ត្រី សាច់ ឬ បន្លែប៉ុណ្ណោះដែលលក់ដាច់ខ្លះៗ ព្រោះជាតម្រូវការចាំបាច់រាល់ថ្ងៃ តែទំនិញក្រៅពីនេះ គ្មានអ្នកចូលទិញទេ។ ម្យ៉ាងទាំងអ្នកលក់ ទាំងអ្នកទិញសុទ្ធតែកំពុងភ័យខ្លាចមេរោគ «កូវីដ ១៩» នេះដូចគ្នា ដូច្នេះហើយទើបនាំគ្នាបង្ខំចិត្តបិទតូប សម្ងំនៅតាមផ្ទះរៀងៗខ្លួន។
មិនមែនមានតែអាជីវករ ឬអ្នកលក់ចំណីអាហារទេ ដែលរអ៊ូរទាំពីការបាត់បង់អតិថិជន បាត់បង់ចំណួលប្រចាំថ្ងៃ សូម្បីតែអ្នករត់ម៉ូតូឌុប ក៏ត្អូញត្អែរពីការបាត់បង់ប្រាក់ចំណុលដែរ ព្រោះគ្មានម៉ូយឌុប។ អ្នករត់ម៉ូតូឌុបប្រចាំផ្សារនេះម្នាក់ បាននិយាយយ៉ាងដូច្នេះថា «កុំថាឡើយអ្នកលក់ដូរបាត់ម៉ូយ សូម្បីតែខ្ញុំរត់ម៉ូតូឌុប ក៏បាត់ម៉ូយអស់ដែរ ប្រហែលមកពីអា កូវីដ ១៩ នេះហើយ »។ គាត់គ្រវីក្បាល ហើយឆ្លើយយ៉ាងខ្លីថា «អត់ទេ» នៅពេលសួរថា តើលោកពូរត់ម៉ូតូឌុប ដាច់ដែរឬទេ ?។ គាត់បានពោលថា «ពេលនេះ អ្នកទិញទំនិញក៏គ្មាន អ្នកជិះម៉ូតូឌុបក៏គ្មាន គឺចប់ហើយ»។
គ្រប់ទីកន្លែង ប្រជាពលរដ្ឋបានចាត់ទុកមេរោគ «វីរុស កូរ៉ូណា ឬ កូវីដ១៩» នេះថា ជាសត្រូវដ៏ធំដែលគួរឲ្យភ័យខ្លាចបំផុត រហូតធ្វើឲ្យមនុស្សមិនហ៊ានចេញក្រៅផ្ទះ មិនហ៊ានជួបជុំគ្នា មិនបានចេញទៅធ្វើការងារ ប្រកបមុខរបរទទួលទាន និងធ្វើឲ្យបាត់បង់ប្រាក់ចំណូលប្រចាំថ្ងៃយ៉ាងធ្ងន់ធ្ងរបំផុត។
ពាក់ព័ន្ធនឹងមេរោគ «កូវីដ ១៩» ដ៏កាចសាហាវ និងគួរឲ្យខ្លាចបំផុតនេះ បើតាមការប្រកាសឲ្យដឹងជាបឋមរបស់ក្រសួងសុខាភិបាល សម្រាប់ខេត្តបាត់ដំបង គឺមានអ្នកឆ្លងមេរោគដ៏កំណាចនេះបានកើនដល់ចំនួន០៨នាក់ហើយ បើគិតត្រឹមថ្ងៃទី២១ មីនា ២០២០ ដែលចំនួននេះ បាននិងកំពុងធ្វើឲ្យប្រជាពលរដ្ឋគ្រប់ទីកន្លែងនៅក្នុងខេត្តបាត់ដំបង មានការភ័យខ្លាច និងបារម្ភយ៉ាងខ្លាំងអំពីសុខភាព។
ប៉ុន្តែយ៉ាងណាក៏ដោយ បច្ចុប្បន្ននេះ គេសង្កេតឃើញ ទាំងអាជ្ញាធរ ទាំងមន្ត្រីសុខាភិបាល បាននិងកំពុងរួមដៃគ្នាប្រឹងប្រែងយ៉ាងខ្លាំង ក្នុងការចាត់វិធានការទប់ស្កាត់ និងវិធានការព្យាបាល៕ (កែសម្រួលដោយ ៖ បុប្ផា)
ចែករំលែកព័តមាននេះ