ខេត្ដបាត់ដំបង ៖ មន្ដ្រីកងរាជអាវុធហត្ថស្រុកសំពៅលូនបានឱ្យដឹងថា ក្រុមចោរប្រដាប់ដោយកាំភ្លើងអាកាចំនួន២នាក់ក្នុងនោះស្លៀកពាក់ឯកសណ្ឋានប៉ារ៉ាម្នាក់ និងពណ៌ត្រេអ៊ីម្នាក់ បានធ្វើសកម្មភាពប្លន់លំនៅឋានជាថ្មីទៀត នៅភូមិអូរត្រាវជូរ ឃុំសេរីមានជ័យ ស្រុកសំពៅលូន កាលពីវេលាម៉ោង៨ និង៤០នាទីយប់ថ្ងៃទី១៤ កក្កដា ។ តាមព័ត៌មានឱ្យដឹងថា ពួកចោរបានបាញ់ គំរាមមួយគ្រាប់ រួចប្លន់យកទ្រព្យសម្បត្ដិតែម្ដង ។លោកអញ កាម៉ាល់ មេបញ្ជាការរងកងរាជអាវុធហត្ថស្រុកសំពៅលូន បានប្រាប់កោះសន្ដិភាពតាមទូរស័ព្ទថា លំនៅឋានដែលរង អំពើប្លន់នោះម្ចាស់ឈ្មោះយោន វណ្ណដេ អាយុ២៩ឆ្នាំ ប្រពន្ធឈ្មោះហ៊ាន រ៉ាហ៊ុន អាយុ២៨ឆ្នាំ មានមុខរបរលក់គ្រឿងទេស នៅភូមិ-ឃុំខាងលើ ។
លោកមេបញ្ជាការរង រូបនេះបានថ្លែងថា ពួកចោរបានធាក់ប្រពន្ធម្ចាស់ផ្ទះ រួចប្រើកាំភ្លើងអាកាភ្ជង់បុរសជាប្ដី ដើម្បីប្លន់យកទ្រព្យសម្បត្ដិ ។ តាមបុរសឈ្មោះយោន វណ្ណដេ បានប្រាប់សមត្ថកិច្ចថា ពួកចោរបានចូលមកធាក់ ប្រពន្ធគាត់ទាំងកំរោល ខណៈអង្គុយលើគ្រែ ខាងមុខផ្ទះដែលកំពុងបើកទ្វារលក់ដូរនៅឡើយ ។ លោកវណ្ណដេ បានបន្ដទៀតថា គ្មានអតិថិជនចូលទិញទំនិញគាត់ទេនាពេលនោះក្រៅពីពួកចោរប្លន់២នាក់នោះ ។ ពួកវាម្នាក់ភ្ជង់គាត់ដោយកាំភ្លើងអាការុញចូលទៅក្នុងផ្ទះរួចបាញ់គំរាម១គ្រាប់ភ្លាមៗ ដើម្បីឱ្យគាត់ ប្រមូលទ្រព្យសម្បត្ដិឱ្យវា ហើយគាត់ក៏បាន ប្រមូលប្រាក់ និងគ្រឿងអលង្ការទាំងអស់ ឱ្យទៅពួកវា ។ លុះក្រោយមកវាបានភ្ជង់គាត់ ឱ្យជូនចេញតាមចំការខាងក្រោយផ្ទះ ។
ជនរងគ្រោះបានប្រាប់ថា ទ្រព្យដែលបាត់បង់រួមមានគ្រឿងបា្លទីនចំនួន៣ជី ក្រវិលគ្រីស្ដាល់១គូ តំលៃ៤.០០០បាត កាតទូរស័ព្ទខ្មែរ-ថៃសរុប១ម៉ឺនបាត ប្រាក់ខ្មែរ៥លានរៀល និងប្រាក់សៀម២៥.០០០បាត ។ លោកអញ កាម៉ាល់ បានបញ្ជាក់ថា កំលាំងនគរបាលមូលដ្ឋានបានបាញ់ពីក្រោយពួកចោរជាច្រើនគ្រាប់ ខណៈដែលពួកចោរ គេចខ្លួនចូលព្រៃចំការខាងក្រោយភូមិ។ លោកបានបន្ដទៀតថា ក្រោយពីកើតហេតុ យើងបានរកឃើញវត្ថុតាងមួយចំនួនដែលពួកចោរជ្រុះធ្លាក់ចោលរប៉ាត់រប៉ាយតាមផ្លូវ។ លោកអញ កាម៉ាល់ បានបញ្ជាក់បន្ថែមថា បើតាមគ្រួសាររងគ្រោះនេះប្រាប់ថា មុនពេលកើតហេតុបន្ដិច ប្អូនប្រុសពួកគាត់បាន មកទិញកាតទូរស័ព្ទចំនួន២ លុះចេញផុត បន្ដិចពួកចោរក៏ចូលប្លន់តែម្ដង ហើយយើងកំពុងសាកសួរអំពីដំណើររឿងនេះ ៕
ចែករំលែកព័តមាននេះ