រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នារសៀលថ្ងៃទី២១ ខែមីនា ឆ្នាំ២០២០ កម្លាំងសមត្ថកិច្ចនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ក្រោមការដឹកនាំបញ្ជាដោយលោកប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច បានចុះបង្ក្រាបបទល្មើសករណីនាំចូលស្ដុក និងចែកចាយមេតាណុល…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា នារសៀលថ្ងៃទី២១ ខែមីនា ឆ្នាំ២០២០ កម្លាំងសមត្ថកិច្ចនគរបាលប្រឆាំងបទល្មើសសេដ្ឋកិច្ចក្រសួងមហាផ្ទៃ ក្រោមការដឹកនាំបញ្ជាដោយលោកប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ច បានចុះបង្ក្រាបបទល្មើសករណីនាំចូលស្ដុក និងចែកចាយមេតាណុល (ផលិតជាអាកុល) ប្រមាណ៤ ២០០ លីត្រ នៅចំណុចទីតាំងមួយកន្លែង ស្ថិតតាមបណ្តោយផ្លូវ៣២៨ សង្កាត់ទួលស្វាយព្រៃ១ ខណ្ឌបឹងកេងកង ។
សេចក្តីរាយការណ៍បន្តថា កិច្ចប្រតិបត្តិការបង្ក្រាបនោះដោយមានការចូលពីមន្ដ្រីក្រសួងសុខាភិបាល និងមន្ដ្រីស្ដង់ដាជាតិកម្ពុជា នៃក្រសួងឧស្សាហ៍កម្ម និងសិប្បកម្ម រួមទាំងមន្ដ្រីអាជ្ញាធរមូលដ្ឋាន ក្រោមការសម្របសម្រួលពីលោក សាយ ណូរ៉ា ព្រះរាជអាជ្ញារងអមសាលាដំបូងរាជធានីភ្នំពេញ ។
ទាក់ទិនករណីខាងលើនេះ លោកឧត្តមសេនីយ៍ទោ ឡុង ស្រេង អនុប្រធាននាយកដ្ឋាននគរបាលប្រឆាំងបទល្មើសសេដ្ឋកិច្ចបានឲ្យដឹងថា កម្លាំងជំនាញនៃនាយកដ្ឋាននគរបាលប្រឆាំងបទល្មើសសេដ្ឋកិច្ច បានទទួលព័ត៌មានថា មានឈ្មួញទុច្ចរិតមួយក្រុមបាននិងកំពុងដឹកជញ្ជូននាំចូលនូវសារធាតុ (មេតាណុល) ពីក្រៅប្រទេសមកស្តុកទុក ដើម្បីលក់ចែកចាយលើទីផ្សារសេរី ក្នុងព្រះរាជាណាចក្រកម្ពុជា ដោយគ្មានច្បាប់អនុញ្ញាតិពីក្រសួងសុខាភិបាល ។ ជាពិសេសឈ្មួញបាននិងកំពុងនាំចូលមេតាណុលពីប្រទេសជិតខាងសម្រាប់យកមកកែឆ្នៃធ្វើជាអាកុលដោយខុសបច្ចេកទេស ដើម្បីលក់ចេញយកចំណេញកប់ពពក ខណៈប្រទេសជាតិលើសកលលោកកំពុងជួបបញ្ហាវីរុសកូវីដ.១៩ នេះ ។
លោក ឡុង ស្រេង បន្តថា (មេតាណុល) គឺជាថ្នាំពុល មេតាណុល ហើយក៏ជាសារធាតុគីមីដែលបម្រើឲ្យវិស័យឧស្សហ៍កម្ម (អេតាណុល) នឹងជាអាកុលបម្រើឲ្យវិស័យសុខាភិបាល។ អ៊ីចឹងហើយជនខិលខូច ឬក៏ជនឈ្លៀតឱកាសបានយកមេតាណុលនេះ ទៅផលិតទៅជាអាកុល ដោយសារប្រទេសយើងកំពុង ឬក៏ពិភពលោកជួបបញ្ហានូវមេរោគកូវីដ ១៩ ដែលរាលដាលឆ្លងដ៍កាចសាហាវបំផុតនេះ ។
ប្រភពដដែលបន្តថា ប៉ុន្តែជនខិលខូចទាំងនោះ មិនបានយក អេតាណុល នោះមកលក់ឲ្យប្រជាពលរដ្ឋនោះទេ គឺពួកគេបែរជាយក មេតាណុល នេះ មកលាយជាទឹកបន្លំជាអាកុល មកលក់ឱ្យប្រជាពលរដ្ឋវិញ អញ្ចឹងមេតាណុលវាអត់មានសារធាតុសកម្មណាទៅសម្លាប់មេរោគបាននោះទេ។
ប្រភពដដែលបន្តទៀតថា ដើម្បីទប់ស្កាត់ការនាំចូលមេតាណុលដោយគ្មានច្បាប់អនុញ្ញាតិនេះ នាយកដ្ឋាននគរបាលប្រឆាំងបទល្មើសសេដ្ឋកិច្ច តម្រូវឲ្យមានការចុះបង្ក្រាបឈ្មួញទុច្ចរិតនោះជាបន្ទាន់ ។ ដូច្នេះសូមបងប្អូនប្រជាពលរដ្ឋត្រូវមានការប្រុងប្រយ័ត្នឱ្យបានខ្ពស់ ដើម្បីសុខភាព ពីព្រោះ មេតាណុល គឺជាថ្នាំពុលទេ ។ ហើយចំពោះវត្ថុតាងមេតាណុលចំនួន៤ ២០០ លីត្រនេះ ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមផ្លូវច្បាប់ ៕ (កែសម្រួលដោយ ៖ បុប្ផា)
ចែករំលែកព័តមាននេះ