រាជធានីភ្នំពេញ ៖ កាលពីព្រឹកថ្ងៃទី២១ មីនា នេះ ផ្ទះ២ល្វែងរបស់មន្ត្រីនគរបាលត្រូវបានអាជ្ញាធរខណ្ឌប្ញស្សីកែវ ប្រើកម្លាំងការពារគ្រឿងចក្រវាយកម្ទេចចោលតែមួយពព្រិចភ្នែក ដោយចោទប្រកាន់ សំណង់នោះ បានសាងសង់ដោយខុសច្បាប់…
រាជធានីភ្នំពេញ ៖ កាលពីព្រឹកថ្ងៃទី២១ មីនា នេះ ផ្ទះ២ល្វែងរបស់មន្ត្រីនគរបាលត្រូវបានអាជ្ញាធរខណ្ឌប្ញស្សីកែវ ប្រើកម្លាំងការពារគ្រឿងចក្រវាយកម្ទេចចោលតែមួយពព្រិចភ្នែក ដោយចោទប្រកាន់ សំណង់នោះ បានសាងសង់ដោយខុសច្បាប់ ។ ទោះបីជាយ៉ាងណា តាមព័ត៌មានអោយដឹងថា ការវាយកម្ទេចផ្ទះនេះជាការបង្ខំអោយទទួលយកដីឡូត៍ ជាថ្នូរនឹងការដោះស្រាយ និងម្យ៉ាងទៀតដោយខឹងមន្ត្រីនគរបាលរូបនោះនាំគ្នាបះបោរតវ៉ា ដោយមិនទទួលយកឡូត៍ ដែលបែងចែកដោយអាជ្ញាធរ ។
ផ្ទះដែលអាជ្ញាធរវាយកម្ទេចនោះ មានទំហំ១០ម៉ែត្រ គុណ១៥ម៉ែត្រ នៅលើដីទំហំ២៦ម៉ែត្រ គុណ៥២ម៉ែត្រក្នុងតំបន់អភិវឌ្ឍន៍ប្ញស្សីកែវ ស្ថិតនៅតាមបណ្តោយផ្លូវ១៨០០ក្នុងភូមិទួលពពែ សង្កាត់ទួលសង្កែ២ ខណ្ឌប្ញស្សីកែវ ដែលមានម្ចាស់ឈ្មោះភារម្យ អាយុ៤២ឆ្នាំ ជាមន្ត្រីនគរបាល ដែលមានប្តីឈ្មោះឃាម ឡុង ដែលជាមន្ត្រីនគរបាលនៃស្នងការដ្ឋានរាជធានីផងដែរ ។ តាមអាជ្ញាធរខណ្ឌប្ញស្សីកែវ បានអោយដឹងថា ការអនុវត្តវិធានការរដ្ឋបាល ដោយសារតែសំណង់នោះសាងសង់អត់ច្បាប់ ។ កន្លងមកអាជ្ញាធរ បានចុះទៅឃាត់ជាច្រើនលើកហើយ តែម្ចាស់មិនស្តាប់តាមការណែនាំនៅតែបន្តសាងសងដោយអត់ច្បាប់ ទើបអាជ្ធរប្រើកម្លាំងវាយកម្ទេចចោលតែម្តង ។
តាមព័ត៌មានអោយដឹងថា នៅព្រឹកនោះ អាជ្ញាធរ បានប្រើកម្លាំងប្រមាណជាង១០០នាក់ ដោយមានការចូលរួមពីនគរបាលអន្តរាគមន៍ នៃស្នងការដ្ឋានរាជធានីភ្នំពេញការពារគ្រឿងចក្រ ដើម្បីវាយនិងបុកកម្ទេច ផ្ទះ២ល្វែងនេះ ក្រោមការចូលរួមសម្រួលពីព្រះរាជអាជ្ញារងសាលារាជធានីភ្នំពេញ។ នៅក្នុងឱកាសនោះអាជ្ញាធរ ក៏បានត្រៀមរថយន្តពន្លត់អគ្គិភ័យមួយគ្រឿង ខ្លាចកើតមានអំពើហិង្សាឡើង និងបានបិទច្រកហាមអ្នកយកព័ត៌មានចូលទៅឡាយព័ត៌មានការវាយកម្ទេចនេះ។ ទន្ទឹមការរុះរើនិងវាយកម្ទេចនោះគេឃើញស្ត្រីជាម្ចាស់ផ្ទះព្រមទាំងក្រុមគ្រួសារបានធ្វើការតវ៉ា តែត្រូវបានកម្លាំងសណ្តាប់ធ្នាប់និង សមត្ថកិច្ច ចាប់យកចេញ។
តាមស្ត្រីជាផ្ទះ បានអោយដឹងថា ការវាយកម្ទេចផ្ទះរបស់គាត់ដើម្បីបង្ខំអោយគាត់ទទួលយកការដោះស្រាយដីមួយឡូតិ៍ ទំហំ៤ម៉ែត្រគុណ១៥ម៉ែត្រ ដែលអាជ្ញាធរឈូសឆាយដីរបស់លោកព្រំ បូរ មកចែកអោយពួកគាត់១៧៧គ្រួសារ ។ ការអះអាងថា ផ្ទះរបស់គាត់អត់ច្បាប់គីគ្រាន់ជាលេសតែប៉ុណ្ណោះ ។
តាមស្ត្រីជាម្ចាស់ផ្ទះអោយដឹងទៀតថា លោកស្រីរួមទាំងប្រជាពរដ្ឋ ទាំងអស់១៧៧គ្រួសារ ត្រូវបានអាជ្ញាធរចោទប្រកាន់ថា រស់នៅដោយមិនស្របច្បាប់ជាន់លើដី អ្នកដែលទិញសាលារាជធានីភ្នំពេញ។ដើម្បីដោះស្រាយសាលារាជធានីភ្នំពេញ ក៏បានឈូសឆាយយកដីរបស់លោកព្រំ បូរ មកបែងចែកអោយពួកគាត់ដែលក្នុងនោះ មាន១០០គ្រួសារ បានទទួលយកគោលនយោបាយ ហើយ ភាគច្រើនបានលក់អស់ហើយ នៅសល់៧៧គ្រួសារទៀតមិនទទួលដោយទាមទារសុំរស់នៅកន្លែងដើម។
តាមម្ចាស់ផ្ទះនោះ បានអោយដឹងទៀតថា អាជ្ញាធរ បានប្រើកម្លាំងវាយកម្ទេចផ្ទះរបស់គាត់បែបនេះតើអោយទៅរស់នៅកន្លែងណា? បើបង្ខំអោយគាត់ទទួលយកដីឡូតី៍នោះ អោយគាត់ទៅរស់នៅយ៉ាងមេច បើកអត់ទឹកអត់ភ្លើង បែបនោះ។លោកស្រីបញ្ជាក់ទៀតថាបើ ត្រូវរុះបង្ខំអោយទទួលយកដីឡូតី៍គឺរុះទាំងអស់គ្នា នៅពេលណាមួយដែលអាជ្ញាធរ រៀបចំប្រព័ន្ធទឹកភ្លើង រួចហើយ មិនគួរ រុះតែគាត់ម្នាក់ នោះទេ ។ តាមព័ត៌មានអោយដឹងថា ការប្រើកម្ទេចវាយកម្ទេចផ្ទះ២ល្វែងរបស់មន្ត្រីនគរបាលនេះ គឺដោយសារតែខឹងបះបោរ មិនទទួលយកដីឡូតិ៍ តែអាជ្ញាធរ បានចោទប្រកាន់ថា ដោយសាតែសំណង់នោះអត់ច្បាប់៕
ចែករំលែកព័តមាននេះ