រាជធានីភ្នំពេញ៖ បើទោះបីជាពលរដ្ឋខ្មែរមួយចំនួនបម្រើការងារនៅវិស័យទេសចរណ៍
និងសណ្ឋាគារបានជួបបញ្ហានៃការព្យួរការងារដោយសារតែវិរុសកូវីដ១៩ នោះតំណាងចំការ
កៅស៊ូវៀតណាមនៅកម្ពុជាបានថ្លែងឲ្យដឹងថាសម្ព័ន្ធចំការកៅស៊ូរបស់វៀតណាមនៅខេត្តចំនួន ៣នៅប្រទេសកម្ពុជាកំពុងត្រូវការកម្លាំងពលកម្មជិតមួយម៉ឺននាក់ ។
គណៈប្រតិភូវៀតណាមដឹកនាំដោយលោកឧកញ៉ា ឡេង ឫទ្ធី ប្រធានសមាគមចំការកៅស៊ូវៀតណាមប្រចាំនៅកម្ពុជាបានថ្លែងប្រាប់នៅចំពោះមុខរដ្ឋមន្ត្រីក្រសួងការងារ លោក អ៊ិត សំហេងថាបច្ចុប្បន្ន សម្ពន្ធឧស្សាហកម្មកៅស៊ូ សម្ពន្ធថាឌី វៀតណាម និងក្រុមហ៊ុនចម្ការកៅស៊ូវៀតណាមនៅកម្ពុជា ដែលជាដៃគូមានចម្ការកៅស៊ូប្រមាណជាង ២ម៉ឺនហិកតា នៅខេត្ត
រតនគិរី មណ្ឌលគិរី និងខេត្តក្រចេះ ដែលកំពុងមានតម្រូវការកម្លាំងពលកម្ម ឆ្នាំ២០២០-២០២១ មានជាង១សែន៥ពាន់នាក់ ។
នៅក្នុងកិច្ចប្រជុំដែលមានវត្តមានតំណាងក្លឹបអ្នកធុរកិច្ចវៀតណាមប្រចាំកម្ពុជា ធនាគារកសិកម្មវៀតណាម (AGRI Bank) តំណាងស្ថានទូតវៀតណាមប្រចាំកម្ពុជាសម្ព័ន្ធក្រុមហ៊ុន ថាឌីវៀតណាម នាព្រឹកថ្ងៃទី១៨ ខែមីនា ឆ្នាំ២០២០ នៅទីស្ដីការក្រសួងការងារ លោកឧកញ៉ា ឡេង ឫទ្ធី បានឲ្យដឹងថានាពេលបច្ចុប្បន្នេះខាងចំការកៅស៊ូមួយចំនួនធំកំពុងត្រូវការជាបន្ទាន់នូវកម្លាំងពលកម្មភ្លាមៗប្រមាណ ៩០០០នាក់ ដែលបច្ចុប្បន្ន អ្នកដែលធ្វើការក្នុងចម្ការកៅស៊ូទាំងនោះ ទទួលបានប្រាក់ឈ្នួលទាបបំផុត ៨០ម៉ឺនរៀល (ប្រមាណ ២០០ ដុល្លារអាមេរិក) ហើយសម្រាប់អ្នកជៀរជ័រអាចរកចំណូលបានចាប់ពី ១លានរៀល (ប្រមាណ ២៥០ដុល្លារ អាមេរិក) ទៅ១លាន៥សែនរៀល (ប្រមាណ ៣៧៥ ដុល្លារអាមេរិក) ហើយបងប្អូនកម្មករមានកន្លែងស្នាក់នៅសមរម្យ មិនបាច់ចំណាយថ្លៃទឹក និងថ្លៃភ្លើង។
ជាការឆ្លើយតប លោក អ៊ិត សំហេង បានបញ្ជាក់ថា ជាទូទៅរាជរដ្ឋាភិបាលបានសំដែង
នូវការពេញចិត្តនឹងគាំទ្រយ៉ាងខ្លាំងចំពោះការចូលរួមក្នុងការបណ្តាក់ទុនវិនិយោគរបស់វៀតណាមលើគ្រប់វិស័យ នៅកម្ពុជា ជាពិសេសទៅលើវិស័យកសិកម្ម ដូចជាដំណាំកៅស៊ូជា
ដើម។ ក្នុងជំនួបលោករដ្ឋមន្ត្រី បានវាយតម្លៃខ្ពស់ចំពោះការចូលរួម របស់អ្នកធុរកិច្ច និងវិនិ
យោគិនវៀតណាម ដែលនៅតែបន្តការបណ្តាក់ទុន និងផ្តល់ឱកាសការងារជូនបងប្អូន កម្មករ
និយោជិតកម្ពុជា បើទោះជាប្រទេសយើងទាំងពីរកំពុងប្រឈមនឹងជំងឺកូវិដ១៩ ក៏ដោយ។
លោករដ្ឋមន្ត្រីបានបង្ហាញក្ដីរីករាយយ៉ាងខ្លាំងចំពោះការលើកឡើង និងសំណើររបស់ភាគីវៀតណាម ដោយបានណែនាំឱ្យក្រុមហ៊ុនធ្វើការសហការជាមួយទីភ្នាក់ងារជាតិមុខរបរ និងការងារ (NEA) ដើម្បីចុះទៅផ្សព្វផ្សាយ និងជ្រើសរើសកម្លាំងពលកម្មទៅតាមមូលដ្ឋាន ឬកម្លាំងពលកម្មដែលបងប្អូនយើងបាត់បង់ការងារដោយសារតែសហគ្រាស គ្រឹះស្ថានរបស់ខ្លួនមិនអាចដំណើរការងារបានដោយបញ្ហាជំងឺកូវិដ១៩ជាដើម។ លោកបានលើកឡើងពីកម្លាំងពលកម្មដែលកម្ពុជាមានបច្ចុប្បន្ន សរុបទាំងអស់ ១០លាននាក់ ក្នុងនោះវិស័យកសិកម្មមាន ៤លាននាក់ វិស័យឧស្សាហកម្ម និងសិប្បកម្មមាន ១.៥លាននាក់ វិស័យសេដ្ឋកិច្ចក្រៅប្រព័ន្ធមាន ២.៤លាននាក់ ពលករទៅធ្វើការនៅក្រៅប្រទេសមានជាង ១.២លាននាក់ និងមន្ត្រីរាជការមាន ៥សែននាក់ ដែលទាំងនេះជាប្រភពដែលយើងអាចចល័តកម្លាំងពលកម្មទៅតាមតម្រូវការនៃវិស័យ។
យ៉ាងណាមិញលោករដ្ឋមន្ត្រីក្រសួងការងារនិងបណ្តុះបណ្តាលវិជ្ជាជីវៈ បានស្នើដល់ខាងសមាគមធ្វើការសហការជាមួយទីភ្នាក់ងារជាតិមុខរបរ និងការងារ (NEA) ដែលមានមជ្ឈ មណ្ឌលការងារចំនួន១២ខេត្តរួមនឹងមណ្ឌលការងារការងារចល័តផងដែរនោះចុះទៅធ្វើ
ការផ្សព្វផ្សាយផ្ទាល់តែម្តងដល់មូលដ្ឋានតាមបណ្តាខេត្តនានា ដោយធ្វើការសហការជាមួយ
អាជ្ញាធរខេត្ត អញ្ជើញប្រជាពលរដ្ឋអោយចូលរួមចុះឈ្មោះតែម្តង។ ទន្ទឹមនោះលោលរដ្ឋមន្ត្រី ក៏បានអោយសមាគមនេះគិតគូរបន្ថែមទៀតក្នុងការផ្តល់នូវគោលនយោបាយពិសេសដើម្បីផ្តល់ការទាក់ទាញដល់បងប្អូនកម្មករទៅបំរើការងារនៅទីនោះ ទាំងប្រាក់បៀវត្សន៍សមរម្យ អត្ថប្រយោជន៍ផ្សេងៗ កន្លែងស្នាក់នៅ សាលារៀន ផ្សារ សេវាសុខភាព ៕កែសម្រួលដោយ ៖ សុឃាក់
ចែករំលែកព័តមាននេះ