រាជធានីភ្នំពេញ ៖ ចុងខែមីនានេះ ចំពេលផ្ទុះមេរោគកូវីដ-១៩ ធ្វើឱ្យមង្គលការស្មើនឹង៥០% បានពន្យារពេលទាំងបង្ខំ ដោយសារតែការបារម្ភពីជំងឺឆ្លងនេះ ទាំងនៅក្នុងរាជធានី ក៏ដូចនៅតាមបណ្តាខេត្តនានាដែរ។ មន្ត្រីអត្រានុកូលដ្ឋានរបស់រដ្ឋបាលរាជធានីវិធានការនានា…
រាជធានីភ្នំពេញ ៖ ចុងខែមីនានេះ ចំពេលផ្ទុះមេរោគកូវីដ-១៩ ធ្វើឱ្យមង្គលការស្មើនឹង៥០% បានពន្យារពេលទាំងបង្ខំ ដោយសារតែការបារម្ភពីជំងឺឆ្លងនេះ ទាំងនៅក្នុងរាជធានី ក៏ដូចនៅតាមបណ្តាខេត្តនានាដែរ។ មន្ត្រីអត្រានុកូលដ្ឋានរបស់រដ្ឋបាលរាជធានីវិធានការនានា ដើម្បីទប់ស្កាត់ ។ ដោយមានការបញ្ជាឱ្យបិទក្លិបកម្សាន្ត KTV រោងភាពយន្ត ការប្រគំតន្ត្រី និងការជួបជុំបែបសាសនាជាមួយនឹងវិធានការខាងលើស្រាប់តែប៉ុន្មានថ្ងៃកន្លងមកនេះ តាមរយៈហ្វេសប៊ុកក៏មានការប្រកាសពីការរំសាយមង្គលការជាបន្តបន្ទាប់ ព្រោះតែការបារម្ភពីជំងឺឆ្លងនេះ ។
ពិធីជប់លៀងមង្គលការ ក៏ដូចជាការជួបជុំគ្នាសម្រាប់ពិធីសូត្រមន្ត និងបុណ្យសព មិនត្រូវបានអនុញ្ញាតក្នុងកំឡុងពេល២សប្តាហ៍នៃការហាមឃាត់ ឱ្យមានប្រសិទ្ធភាពនៃការអនុវត្តចាប់ពីថ្ងៃទី១៨ ខែមីនាដល់ថ្ងៃទី៣១ ខែមីនានោះ ។ ចំណែកនៅប្រទេសកម្ពុជាយើងវិញដោយសារវីរុសកូវីដ-១៩ ក៏ធ្វើឲ្យប៉ះពាល់ដល់ថ្ងៃមង្គលសិរីរបស់គូស្វាមី-ភរិយាថ្មីថ្មោងប្រមាណជាងពាក់កណ្តាលផងដែរ ។ ជាក់ស្តែងពិធីមង្គលការដែលគ្រោងធ្វើឡើងរាប់ខែមកហើយនោះ ត្រូវរំសាយចោលជាបន្តបន្ទាប់ ខណៈជំងឺកូវីដ-១៩កំពុងវាយលុកកាន់តែខ្លាំងនៅក្នុងប្រទេសកម្ពុជាដែលគិតត្រឹមព្រឹកថ្ងៃទី១៨ មីនានេះគឺកម្ពុជាបានរកឃើញអ្នកផ្ទុកថ្មីៗជាបន្តបន្ទាប់រហូត ដល់ទៅ ៣៥ ករណី ហើយដែលសុទ្ធជាករណីនាំចូលពីក្រៅប្រទេស ។
អ្នកគ្រប់គ្រងនៅកន្លែងប្រារព្ធពិធីមង្គលការនៅរាជធានីភ្នំពេញបានបង្ហើបឲ្យដឹងថាបើទោះបីជាខែមីនា ជាខែដែលពេញនិយមពិធីមង្គលការកូនប្រុស-ស្រីយ៉ាងណាក៏ដោយ តែការកក់រោងជ័យត្រូវបានផ្អាកជាបន្តបន្ទាប់ ដោយសារតែការភ័យខ្លាចនៃការប្រមូលផ្តុំក្រុមមនុស្សច្រើននៅក្នុងពិធី ដែលអាចបង្កហានិភ័យនៃការឆ្លងនូវជំងឺរលាកសួតថ្មីបង្កឡើងដោយវីរុសកូវីដ១៩ នោះឯង ។ខណៈពិធីមង្គលការនិងពិធីជប់លៀងផ្សេងៗទៀត ត្រូវបានរំសាយចោលជាបន្តបន្ទាប់ ម្ចាស់កម្មវិធីមួយចំនួនបានបង្ហោះតាមបណ្តាញសង្គមហ្វេសប៊ុកថាមង្គលការមួយចំនួនដែលបានរៀបចំកាលពីចុងខែកុម្ភះនិងដើមខែមីនានេះ គឺមិនមានអ្នកចូលរួម ឬមានអ្នកចូលរួមដែរ តែក្នុងកម្រិតតិចបំផុត ដែលធ្វើឱ្យម្ចាស់ដើមការដែលចំណាយច្រើន បានធ្វើឱ្យខាតកាន់តែខ្លាំង ។
យោងតាមបណ្ដាញសង្គមហ្វេសប៊ុកមួយឃើញថាម្ចាស់ដើមការមួយចំនួនទាំងក្នុងរាជធានីភ្នំពេញ និងតាមបណ្ដាខេត្តនានា បានប្រកាសរំសាយនិងលុបចោលពិធីរបស់ខ្លួន ដោយហេតុផលដើម្បីទប់ស្កាត់ការឆ្លងរាលដាលទៅកាន់ភ្ញៀវកិត្តិយសចូលរួម ក្នុងករណីមានអ្នកណាម្នាក់ក្នុងចំណោមភ្ញៀវទាំងអស់មានផ្ទុកមេរោគនេះ ។ជាក់ស្តែងលោក តុប ឈៀងហៀង ដែលគ្រោងនឹងរៀបចំពិធីមង្គលការកូន នៅថ្ងៃទី៣០ ខែមីនា ២០២០នៅ ស្រុកភ្នំស្រួច ខេត្តកំពង់ស្ពឺ ក៏បានរំសាយពិធីមង្គលការនេះ ដើម្បីទប់ស្កាត់ការឆ្លងរាលដាលនៃជំងឺកូវី-១៩ទៅកាន់ប្រជាពលរដ្ឋចូលរួមក្នុងពិធីនោះ និងខ្លាចគ្មានអ្នកចូលរួម ។ លោកបាននិយាយថា «ដោយសារតែវង់តន្ត្រី រោង ភ្លេងការជាដើម សុទ្ធតែអ្នកស្គាល់គ្នា ដូច្នេះនៅពេលដែលយើងរំសាយពិធីនេះ ពួកគេក៏មិនបានខឹងសម្បា ឬទាមទារលុយពីយើងដែរ ព្រោះពួកគេក៏យោគយល់ហើយក៏មិនចង់ចូលរួមមានមនុស្សច្រើនដែរ ដោយសារតែពួកគេបានមើលប្រកាសនានារបស់រដ្ឋាភិបាល ក្នុងការទប់ស្កាត់ការឆ្លងរាលដាលជំងឺនេះ » ។
គណនីហ្វេសប៊ុកឈ្មោះថា Lim Seng ដែលគ្រោងនឹងរៀបចំពិធីមង្គលការអោយប្អូនប្រុសស្រី ក៏បានបង្ហោះពីការផ្អាករៀបចំពិធីមង្គលការប្អូនប្រុសស្រីរបស់ខ្លួនផងដែរ ដោយសារជំងឺកូវីដ១៩ ។ ពិធីមង្គលការនេះ បានគ្រោងធ្វើឡើងនៅថ្ងៃទី២៨ និង២៩ ខែមីនា ២០២០ខាងមុខនេះហើយ ។ លោកថា៖«ការផ្អាកពិធីមង្គលការនេះ គឺដើម្បីចូលជាមួយរដ្ឋាភិបាលក្នុងការទប់ស្កាត់ការចម្លងទៅកាន់សហគមន៍ ជាពិសេសនោះរដ្ឋាភិបាលក៏បានប្រកាសមិនឱ្យមានការជួបជុំក្នុងពិធីសាសនានានា ហើយពិធីមង្គលការនេះ ក៏ជាការជួបជុំមួយមានមនុស្សច្រើនកុះករផងដែរ» ។
ចំណែកលោក អ៊ូច ចិត្រ ដែលគ្រោងនឹងរៀបចំពិធីបុណ្យគម្រប់ខួប៣ឆ្នាំជូនលោកឪពុកដែលបានចែកឋាន ក៏បានប្រកាសរំសាយពិធីផងដែរ ដើម្បីកុំឱ្យមានការភ័យខ្លាចជួបជុំក្នុងពិធីបុណ្យទាំងនោះ ។
លោក អ៊ូច ចិត្រ បាននិយាយថា «រាល់ការចំណាយដែលបានចំណាយទៅហើយ ដូចជាកក់រោង កក់អីវ៉ាន់នានា គឺត្រូវចោលទាំងអស់ តែពេលនេះ យើងកំពុងចរចាសងបន្ថែមទៅកាន់ម្ចាស់អីវ៉ាន់ ដោយមិនទាន់ដឹងថា គេយកប៉ុន្មាននោះទេ ឬក៏មិនយកក៏មិនទាន់ដឹង » ។ ការប្រកាសរំសាយពិធីជួបជុំជប់លៀងនានា នឹងធ្វើឱ្យខាតបង់ទៅលើចុងភៅ រោងការ សេវាកម្មបម្រើនានា ក្នុងពេលមង្គលការនោះមានភេសជ្ជៈ និងម្ហូបអាហារជាដើម ។ អ្នកបម្រើសេវាកម្មទាំងនេះ នឹងត្រូវខាតបង់បាត់បង់ចំណូលកាន់តែច្រើន ក្នុងពេលការរំសាយកាន់តែច្រើន ដើម្បីទប់នឹងការរាលដាលជំងឺកូវីដនេះ ។
សូមបញ្ជាក់ថា ក្នុងពេលកម្ពុជារកឃើញអ្នកផ្ទុកជំងឺកូវីដ-១៩ កាន់តែច្រើនឡើង រដ្ឋាភិបាលបានសម្រេចបិទមិនឱ្យមានការជួបជុំសាសនាណាមួយឡើយ ហើយក៏បានប្រកាសសាលារៀនទូទាំងប្រទេសឈប់សម្រាកវិស្សមកាលតូច មុនកាលកំណត់ និងប្រកាសបិទកន្លែងកម្សាន្តនានា ដូចជាក្លិប កម្សាន្ត ខារ៉ាអូខេ និងរោងកុនទូទាំងប្រទេស ដើម្បីទប់ទល់ការចម្លងកាន់តែច្រើនថែមទៀត ។ បើតាមរបាយការណ៍ធ្វើតេស្តបង្ហាញដោយក្រសួងសុខាភិបាល បានឱ្យដឹងថាជនជាតិខ្មែរដែលផ្ទុកជំងឺកូវីដ-១៩នេះ គឺភាគច្រើនជាជនជាតិខ្មែរកាន់សាសនាអ៊ិស្លាម ដែលទើបត្រលប់មកពីចូលរួមពិធីសាសនាអ៊ិស្លាមនៅប្រទេសម៉ាឡេស៊ី ។
លោកជំទាវ កុយ ពិសី ពន្យារពេលមង្គលការ
ពិធីមង្គលសិរីដែលគួរឱ្យចាប់អារម្មណ៍មួយហើយត្រូវបានប្រកាសពន្យារពេលចូលរោងជ័យនោះគឺលោកជំទាវកុយ ពិសី ដ៏ស្រស់ស្អាត ។ លោកជំទាវក៏បានលើកពេលដែរ ដោយលោកជំទាវសរសេរលើហ្វេសប៊ុកថា «បើយើងចេះតែអាត្មានិយមគ្រប់គ្នា គិតតែប្រយោជន៍ផ្ទាល់ខ្លួន មិនលះបង់សម្រាប់សង្គមជាតិខ្លះនោះ តើស្រុកទេសយើងសង្ឃឹមអី ? យើងគួររួមគ្នាទៅតាមលទ្ឋភាពដែលយើងអាចធ្វើបាន ដើម្បីបង្ក្រាបវាកុំឲ្យជំងឺ Covid-19 នេះបានចិត្តខ្លាំងពេក »។
លោកជំទាវកុយ ពិសី រដ្ឋលេខាធិការក្រសួងទេសចរណ៍ និងជាអនុប្រធានគណៈកម្មការព្រំដែនកម្ពុជា បានសម្រេចលើកពេលរៀបអាពាហ៍ពិពាហ៍ ដើម្បីចូលរួមកាត់បន្ថយការរីករាលដាលជំងឺកូវីដ១៩ ។ តាមរយៈការលើកពេលចូលរោងជ័យនេះ នាំឱ្យគេមើលឃើញពីកាយវិការទទួលខុសត្រូវលើកសុខទុក្ខ មើលឃើញពីបញ្ហារួម ជាជាងមើលតែតម្រូវការផ្ទាល់ខ្លួនរបស់លោកជំទាវ ។
បន្ទាប់ពីបានរង់ចាំអស់រយៈពេលយ៉ាងយូរលោកជំទាវកុយ ពិសី គ្រោងចូលរោងជ័យក្រាបសំពះផ្ទឹមនៅថ្ងៃទី២៤ និង២៥ ខែមីនា ឆ្នាំ២០២០ តែពេលវេលាដ៏មានអត្ថន័យសម្រាប់ជីវិតរបស់លោកជំទាវ ត្រូវបានពន្យារពេលទៅវិញ ហើយរង់ចាំរហូតដល់ស្ថានភាពរីករាលដាលនៃជំងឺកូវីដ១៩ បានស្ងប់ស្ងាត់ទៅវិញ ។
លោកជំទាវកុយ ពិសី បានបញ្ជាក់លើទំព័រFacebook នៅថ្ងៃទី១៧ ខែមីនា ថា «ដើម្បីសុវត្ថិភាពរួម និងដើម្បីកាត់បន្ថយការរីករាតត្បាតជំងឺ Covid-19 យើងខ្ញុំ និងក្រុមគ្រួសារសូមពន្យារពេលពិធីថ្ងៃ២៤ និង២៥ ខែមីនានេះ ទៅធ្វើនៅពេលក្រោយវិញ»។
លោកជំទាវបានសូមអភ័យទោសដល់ភ្ញៀវកិត្តិយសទាំងអស់ ចំពោះការលើកពេលនេះផងដែរ ។
តាមរយៈកាយវិការនេះបង្ហាញឱ្យឃើញពីការលះបង់នូវសេចក្តីសុខផ្ទាល់ខ្លួនរបស់លោកជំទាវ ដើម្បីធានាទៅដល់សុវត្ថិភាពរបស់ភ្ញៀវដែលត្រូវចូលរួមក្នុងពិធីមង្គលរបស់លោកស្រីនោះ ។ មួយវិញទៀតដោយសារលោកជំទាវកុយ ពិសី ជាមន្ត្រីជាន់ខ្ពស់ក្នុងជួររាជរដ្ឋាភិបាល ដូច្នេះភ្ញៀវចូលរួមក្នុងពិធីច្បាស់ណាស់ថា នឹងជាថ្នាក់ដឹកនាំរាជរដ្ឋាភិបាល ក្រសួងស្ថាប័ន និងជាមន្ត្រីរាជការ កងកម្លាំងប្រដាប់អាវុធភាគច្រើន។ ការសម្រេចផ្អាកនេះក៏ជាការកាត់បន្ថយនូវការលំបាករបស់ថ្នាក់ដឹកនាំរាជរដ្ឋាភិបាល ថ្នាក់ដឹកនាំតាមក្រសួង ស្ថាប័ន មន្ត្រីរាជការ កងកម្លាំងប្រដាប់អាវុធ ដែលកំពុងជាប់ដៃរួមគ្នាប្រយុទ្ធនឹងជំងឺកូវីដ១៩ ក៏ដូចជាដោះស្រាយទុក្ខលំបាកទាំងឡាយបង្កឡើដោយជំងឺកូវីដ១៩នេះ ៕
ចែករំលែកព័តមាននេះ