ADផ្ទាំងផ្សព្វផ្សាយពាណិជ្ជកម្ម

ផ្សារធំៗក្នុងរាជធានីស្ងាត់ខ្លាំង មានតែអ្នកលក់ អត់អ្នកទិញ ក្រោយផ្ទុះកូវីដ-១៩

4 ឆ្នាំ មុន

ភ្នំពេញ
២០ ខែ មីនា ឆ្នាំ ២០២០ ម៉ោង ១៦:៤៥

រាជធានីភ្នំពេញ ៖ ក្រោយពីក្នុងប្រទេសកម្ពុជារកឃើញអ្នកផ្ទុកវីរុសកូវីដ-19 នោះ មានប្រជាពលរដ្ឋជាច្រើនបាននាំគ្នាដើរទិញអង្ករ ទឹកត្រី ទឹកស៊ីអុីវ និងរបស់របរហូបចុកក្រៀមៗស្តុកទុកហូបនៅផ្ទះរៀងៗខ្លួន ដោយសារតែមានការភ័យខ្លាចចំពោះការឆ្លងនូវជំងឺរលាកផ្លូវដង្ហើម(COVID-19) ។ ដោយហេតុនេះ បានធ្វើអោយផ្សារមួយចំនួននៅក្នុងរាជធានីភ្នំពេញ ដូចជាផ្សារអូឡាំពិក ផ្សារទួលទំពូង ផ្សារបឹងកេងកង មានសភាពស្ងាត់យ៉ាងខ្លាំង គឺមានតែអ្នកលក់ មិនមានអ្នកមករកទិញនោះទេ ហើយទៅតាមផ្សារនីមួយៗអាជីវករមួយចំនួននាំគ្នាបិទតូបចាប់ពី២០% ទៅ៣០% មិនបើកលក់ ដោយសារតែលក់មិនដាច់។

លោក យ៉ន យ៉ាន អនុគណៈកម្មាធិការផ្សារអូឡាំពិកបានប្រាប់ឱ្យដឹងថា ក្នុងពេលផ្ទុះវីរុស COVID-19 នេះមក អតិថិជនដើរផ្សារគឺមានការថយចុះច្រើនណាស់ ដោយអាជីវករនៅតែមកបើកតូបលក់ជារៀង រាល់ថ្ងៃ ជាធម្មតាទេ ដោយភាគច្រើននៅផ្សារនេះមានលក់សម្លៀកបំពាក់ខោអាវ បោះដុំ និងរាយ។

លោកអនុគណៈកម្មាធិការផ្សារអូឡាំពិកបានបន្តថា ជារៀងរាល់ថ្ងៃមានតូបប្រមាណជា៨០% ទៅ៨៥% បានបើកលក់ជាប្រចាំ តែតូបមួយចំនួនតូចប្រមាណពី១៥% ទៅ២០%បានបិទ ដោយសារតែការលក់ មិនដាច់ និងមិនមានអ្នកដើរផ្សាររកទិញហូរហែដូចកាលពីមិនទាន់ផ្ទុះជំងឺប្រភេទនេះ ។

លោកអនុគណៈកម្មាធិការផ្សារអូឡាំពិកបានបន្តថា ការបើកតូបលក់របស់ក្រុមអជីករនេះដែរ គឺពួកគាត់នាំគ្នាមកបើកលក់ដោយថ្ងៃ គឺថ្ងៃនេះពួកគាត់បិទ ប៉ុន្តែថ្ងៃស្អែកមកបើកលក់វិញក៏មាន គឺមិនទៀងទេ ដោយថ្ងៃណាលក់ដាច់ពួកគាត់នៅលក់ បើថ្ងៃណាមិនដាច់ពួកគាត់បិទតូបឈប់លក់នាំគ្នាទៅផ្ទះ។ ការស្ងាត់មិនមានអ្នកមកដើរផ្សារនេះដែរគឺដោយសារតែមានការភ័យខ្លាចឆ្លងជំងឺ COVID-19 តែខាងគណៈកម្មាធិការផ្សារអូឡាំពិក និងមជ្ឈមណ្ឌលពាណិជ្ជកម្មផ្សារ (ក្រុមហ៊ុនថៃប៊ុនរ៉ុង) ក៏បានដាក់អាល់កុល សាប៊ូ លាងដៃ នៅគ្រប់ទីកន្លែងទៅតាមការណែនាំរបស់ខាងក្រសួងសុខាភិបាលដែលបានណែនាំផងដែរ។

ស្ត្រីជាអាជីវករលក់ខោអាវនៅជាន់ផ្ទាល់ដីក្នុងផ្សារអូឡាំពិកម្នាក់បានប្រាប់ឱ្យដឹងថា ការលក់របស់គាត់រាល់ថ្ងៃនេះមានការថយចុះ គឺលក់មិនដាច់រហូតទៅដល់៩០%ឯណោះ ។ ដោយលក់តាំងពីព្រឹករហូតមកទល់នឹងពេលនេះ គឺអត់មានអ្នកមកទិញម្នាក់សោះ និងគ្មានបានលុយមួយរៀលឡើយ សូម្បីតែម៉ូយនៅតាមខេត្តក៏មិនឡើងមកយកអីវ៉ាន់ពីគាត់ដែរ ដោយសារតែគេក៏លក់មិនដាច់ដែរនោះ។

ស្ត្រីជាអាជីវករដដែលបានប្រាប់ឱ្យដឹងបន្តថា ការធ្លាក់ចុះលក់មិនសូវដាច់នេះ វាចាប់ផ្តើមតាំងពីថ្ងៃបុណ្យចូលឆ្នាំចិនមកម្លេះ ប៉ុន្តែនៅត្រឹម៣០%ដែរ តែចាប់ពីចូលក្នុងខែមីនានេះ គឺការលក់ខោអាវរបស់គាត់ គឺមិនដាច់ទាល់តែសោះ ហើយក៏មិនមានអ្នកដើរផ្សារដូចមុនៗដែរ ។ អ្នកខ្លះមកបើកតូបលក់ដែរ តែលក់មិនដាច់ក៏បិទតូបឈប់លក់នាំគ្នាទៅផ្ទះវិញ ប៉ុន្តែសម្រាប់គាត់មានការខ្វះខាតក្នុងការចំណាយក្នុងគ្រួសារជាប្រចាំថ្ងៃ និងមិនមានលុយបង់ធនាគារនោះទេ ទើបសុខចិត្តនៅតស៊ូ អង្គុយលក់តាំងពីព្រឹករហូតដល់ល្ងាចទើបត្រឡប់ទៅផ្ទះវិញ បើទោះជាមិនមានអ្នកមកទិញក្តី។

លោក ចំរើន សុខលីម ប្រធានផ្សារទួលទំពូងបានប្រាប់ឱ្យដឹងថា ជាទូទៅផ្សារទួលទំពូងក៏ដូចជាផ្សារមួយចំនួននៅក្នុងរាជធានីភ្នំពេញ គឺមានសភាពស្ងប់ស្ងាត់ជាងមុនបន្តិច ដោយក្រុមអាជីវករពួកគាត់មកបើកតូបលក់ជាធម្មតា តែចំនួនអ្នកមកដើរផ្សារមានការថយចុះជាងមុនៗ។

លោកប្រធានផ្សារទួលទំពូងបានបន្តថា សំរាប់ផ្សាររបស់លោកគឺជាផ្សារដែលមានភ្ញៀវភាគច្រើនជាភ្ញៀវបរទេស ក្នុងមួយថ្ងៃៗជាធម្មតាមានពី៨០០ ទៅ១០០០នាក់ចូលមករកទិញ តែពេលនេះមានការធ្លាក់ចុះមកនៅត្រឹមតែ១០០ ទៅ១០០នាក់ជាងប៉ុណ្ណោះ ។ លោកក៏បានប្រាប់បន្តទៀតថា ក្នុងផ្សារទួលទំពូងភាគច្រើនជាតូបលក់ ខោអាវ វត្ថុអនុស្សាវរីយ៍ និងរូបចម្លាក់ផ្សេងៗ ដែលសុទ្ធតែជារបស់របរដែលមិនសូវចាំបាច់ តែបើកន្លែងលក់ចំណីអាហារដូចជា ម្ហូប ត្រី សាច់ បន្លែវិញ គឺនៅលក់ដាច់ជាធម្មតា និងមានតូបចំនួន៧០%នៅបើកលក់ និងតូបចំនួន ៣០%បានបិទ។ ដោយតូបមួយចំនួនដែលបានបិទមិនលក់នោះ មានមួយចំនួនជាតូបលក់ខោអាវ គ្រឿងចម្លាក់ វត្ថុអនុស្សាវរីយ៍ គ្រឿងបន្លាស់ផ្សេងៗ និងគ្រឿងដែកជាដើម ដែលកាលពីប៉ុន្មានថ្ងៃមុននេះ ពួកគាត់បាននាំគ្នាផ្អើលរកទិញរបស់របរម្ហូបអាហារក្រៀមៗយកទៅទុកយ៉ាងច្រើននផងដែរ។

ស្ត្រីជាអាជីវករលក់ខោអាវ និង កាបូបក្នុងផ្សារទួលទំពូងម្នាក់បានត្អូញត្អែថា ស្ងាត់អត់មានអ្នកទិញទាល់តែសោះ គាត់បើកលក់ជាប្រចាំ តែមិនមានអ្នកមករកទិញញម្នាក់ឡើយ និងដាច់បាយហើយ ដោយក្នុងរយៈពេលមួយអាទិត្យនេះ គឺលក់មិនដាច់ទេ និងស្ងាត់យ៉ាងខ្លាំង បន្ទាប់ពីផ្ទុះវីរុស COVID-19 នេះមក វាកាន់តែស្ងាត់អ្នកដើរផ្សារខ្លាំងឡើងៗតែម្តង ទាំងភ្ញៀវខ្មែរ និងជនបរទេស ដោយធ្វើអោយពួកគាត់ជួបការលំបាកផ្នែកសេដ្ឋកិច្ចគ្រួសារយ៉ាងខ្លាំង ។ ម្យ៉ាងការចំណាយប្រចាំថ្ងៃ បង់ទឹក បង់ភ្លើង លុយបង់តុងទីន បង់ធនាគារ និងលុយប្រាក់ខែសំរាប់បុគ្គលិក២ទៅ៣នាក់ផងដែរ បើក្នុងមួយថ្ងៃៗលក់អត់បានលុយមួយរៀលបែបនេះ។

លោក ឯក និមល ប្រធានផ្សារបឹងកេងកងបានប្រាប់ឱ្យដឹងថា កាលពីពេលកន្លងទៅនេះ មានអ្នកមកផ្សារយ៉ាងច្រើនដើរទើសគ្នា តែក្នុងរយៈពេលជាង១០ថ្ងៃកន្លងមកនេះ ហាក់បីដូចជាមានសភាពស្ងាត់ជាងមុនបន្តិច មិនសូវមានអ្នកដើរទេ ចំណែកក្នុងផ្សារទូលាយស្រួលដើរ ហើយកាលពី៥ទៅ៦ថ្ងៃមុននេះ ពួកគាត់បាននាំគ្នាដើររកទិញអង្ករ ទឹកត្រី និងទឹកស៊ីអ៊ីវទុកហូប ធ្វើអោយតម្លៃអង្ករប្រភេទល្អៗមួយចំនួនឡើងថ្លៃផងដែរ ។ ចំណែកឯរបស់របរមួយចំនួនផ្សេងទៀតគឺលក់នៅតម្លៃដដែលមិនឡើងថ្ងៃនោះទេ ។ លោកក៏បានប្រាប់បន្តទៀតថា មានតូបលក់ដូរតិចតួចបំផុតដែលបានបិទមិនលក់ដូរ ដោយមានត្រឹមតែ១០ទៅ ២០%ប៉ុណ្ណោះ ចំណែកឯតូបពី៨០ទៅ៨៥%ទៀតគេនៅបើកលក់ជាធម្មតា តែសំរាប់អ្នកដើរផ្សារវិញ គឺមានការថយចុះយ៉ាងខ្លាំងគួរឱ្យកត់សម្គាល់ បើប្រៀបធៀបមុនពេលផ្ទុះវីរុស COVID- 19នោះ។

ស្ត្រីជាអ្នកលក់សាច់ចង្កាក់ម្នាក់នៅក្នុងផ្សារបឹងកេងកងបានរៀបរាប់ថា តាំងពីផ្ទុះវីរុសកូវីដ-១៩មក ក្នុងរយៈពេលជិត១ខែហើយគឺស្ងាត់ លក់មិនដាច់តែម្តង ដែលកាលពីពេលមុនវិញតែត្រឹមពេលនេះ(ម៉ោងជាង ១២ថ្ងៃត្រង់) គឺគាត់លក់ជិតអស់ហើយ និងលក់ដាច់យ៉ាងខ្លាំង ដោយសារតែមានមនុស្សដើរផ្សារច្រើន ។តែឥឡូវនេះ លក់មិនដាច់ទាល់តែសោះ មានតែអ្នកលក់ និងតុ កៅអីបញ្ឈរចោលមិនមានអ្នកណាម្នាក់អង្គុយហូបឡើយ ភ្ញៀវមានការថយចុះរហូតទៅដល់៧០% គឺខុសពីពេលមុនៗឆ្ងាយណាស់ ៕ (កែសម្រួលដោយ ៖ ធីតា)