ជើងហោះហើរដើមទុនទាប «អ៊ែរអាស៊ី អេក្ស» ជាជើងហោះហើររបស់សាខាក្រុមហ៊ុន «អ៊ែរអាស៊ី» និងហោះហើរផ្លូវឆ្ងាយពីក្រុងគូឡាឡាំពួរទៅតូក្យូ ក្នុងខែធ្នូ ដោយមានតំលៃពិសេស៣១ដុល្លារ ។ នេះបើតាមការឱ្យដឹងរបស់អ្នកគ្រប់គ្រងក្រុមហ៊ុនកាលពីថ្ងៃទី២១ កញ្ញា ។
«អ៊ែរ អាស៊ី អេក្ស»នឹងដំណើរការជើងហោះហើរពីក្រុងគូឡាឡាំពួរ ទៅព្រលានយន្តហោះហាមណេដាប្រទេសជប៉ុន ចំនួន៣លើកក្នុងមួយសប្តាហ៍ដោយចាប់ផ្តើមពីថ្ងៃទី៩ ធ្នូ តទៅ ។
លោកអាសារ៉ាន់ អូស្មាន រ៉ានី អ្នកគ្រប់គ្រងជើងហោះហើរ «អ៊ែរ អាស៊ី អេក្ស» ឱ្យដឹងថា «យើងត្រេកអរដែលគោលដៅរបស់យើងបានទទួលជោគជ័យ និងក្នុងនាមជាទីក្រុងដ៏ធំបំផុតមួយនៅលើពិភពលោក ។ យើងជឿជាក់ថា តូក្យូនឹងក្លាយជាទីផ្សារសំខាន់ធ្វើឱ្យគំរោងការហោះហើរអន្តរជាតិរបស់យើងរីកចំរើនកាន់តែខ្លាំង» ។
លោកអាសារ៉ាន បញ្ជាក់ថា ជើងហោះហើរឆ្ពោះទៅក្រុងតូក្យូ នឹងជួយលើកស្ទួយមុខជំនួញ និងទេសចរណ៍រវាងម៉ាឡេស៊ី និងជប៉ុន រួមទាំងជាជម្រើសមួយដែលមានដើមទុនទាបសំរាប់អ្នកដំណើរ ។ បច្ចុប្បន្ន «អ៊ែរ អាស៊ី អេក្ស» ដំណើរការហោះហើររវាងម៉ាឡេស៊ី ជាមួយអូស្ត្រាលី ឥណ្ឌា តៃវ៉ាន់ ចិន អឺរ៉ុប និងកូរ៉េខាងត្បូង ៕
ចែករំលែកព័តមាននេះ