ខេត្តប៉ៃលិន ៖ សង្កេតឃើញបុរសម្នាក់រួមជាមួយមិត្តភក្តិចំនួន២នាក់ទៀត បានបំបែកផ្លូវគ្នាបើកម៉ូតូរ៉ឺម៉ក ដើម្បីលក់សម្ភារចល័តនៅតាមភូមិ ដើម្បីបានប្រាក់សម្រាប់ផ្គត់ផ្គង់ជីវភាពគ្រួសារប្រចាំថ្ងៃ ។ ជួនកាលពួកគេទាំងនោះ បានបើកបរម៉ូតូ ចូលទៅលក់ដូរនៅតាមផ្សារ ក្នុងក្រុងប៉ៃលិន ដើម្បីឱ្យអាជីវករទិញសម្រាប់លក់បន្តឱ្យម៉ូយមកពីតាមភូមិនានា ជាវយកទៅប្រើប្រាស់ ។ បើទោះបីស្ថានភាពបច្ចុប្បន្ន កំពុងមានការរំខានខ្លាំងជាមួយវីរុសកូវីដ-១៩យ៉ាងណាក្តី តែសម្រាប់ពួកគាត់គឺនៅតែបន្តជិះលក់សម្ភារជារៀងរាល់ថ្ងៃ ។
ជាក់ស្តែង បានជួបជាមួយបុរសម្នាក់កំពុងបើកម៉ូតូរ៉ឺម៉កមានដឹកសម្ភារផ្ទះបាយលក់នេះ កាលពីវេលាម៉ោង៤និង៣០នាទីរសៀលថ្ងៃទី១៩ មីនា ស្ថិតនៅចំណុចភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ដោយគាត់បានប្រាប់កោះសន្តិភាពថា គាត់ឈ្មោះ សុខ មាន អាយុ២៨ឆ្នាំ រស់នៅក្នុងខេត្តស្វាយរៀង ។ គាត់ដឹកសម្ភារផ្សេងៗជាច្រើន ដូចជាអំបោសផ្កាស្មៅ អំបោសរោមមាន់ ជាល កន្ត្រក ល្អី ចង្អេរ កញ្ជើ អង្រុត ឈ្នាង កញ្ច្រែង ស៊ុំមាន់ និងទូផ្តៅ ជាដើម ជិះឆ្វែលលក់ដូរគ្រប់ច្រកល្ហកតាំងពីព្រឹករហូតដល់ល្ងាច ទើបរកកន្លែងឈប់សម្រាក ។
លោកបន្តទៀតថា ការលក់ដូរនៅតាមភូមិ គឺដាច់ជាហូរហែធម្មតាទេ ដោយសារប្រជាពលរដ្ឋទិញយកទៅប្រើប្រាស់ប្រចាំថ្ងៃ ដោយអ្នកខ្លះទិញ២ ទៅ៣ដើម ខ្លះទៀត លើកយកទុកលក់ដូរនៅក្នុងផ្សារ ។ ប៉ុន្តែ អ្នកខ្លះទៀត គ្រាន់តែសួរនាំ រួចអត់ទិញនោះទេ គេថាលក់ថ្លៃពេក តែការលក់ដូរនេះមិនលើសពីតម្លៃទីផ្សារនោះឡើយ ។ ចំពោះការចេញដំណើរលក់ដូរនេះ តាមផ្លូវវែងឆ្ងាយ ដោយឆ្លងពីខេត្តមួយទៅខេត្តមួយទៀត រហូតដល់លក់ដាច់ជិតអស់ ទើបនាំគ្នាបើកបរម៉ូតូលក់ដូរបែរត្រឡប់ឆ្ពោះទៅស្រុកកំណើតម្តងដើម្បីជួបជុំក្រុមគ្រួសារ ។ ចំណែកការស្នាក់នៅគឺ ជួនកាលសុំវត្តព្រះសង្ឃស្នាក់នៅ ដោយហូបបា យផ្សារ ពេលខ្លះទៀត សុំសាលាឃុំ ឬ សង្កាត់ក្បែរប៉ុស្តិ៍នគរបាលស្នាក់នៅផងដែរ ហើយក៏មិនធ្លាប់មានរឿងរ៉ាវអ្វីកើតឡើងចំពោះពួកគេនោះដែរ ព្រោះអីការបើកបរម៉ូតូលក់បែកគ្នាមែន ប៉ុន្តែរហូតដល់ល្ងាចគឺជួបជុំគ្នាជាក្រុម ។
ប្រភពដដែលបញ្ជាក់ទៀតថា ជារៀងរាល់ឆ្នាំ ឱ្យតែទំនេរពីការងារស្រែចម្ការនៅឯស្រុកកំណើត គឺពួកគេតែងតែនាំគ្នាទៅលើកឥវ៉ាន់ពីថៅកែយកមកដើរលក់គ្រប់ខេត្តក្រុងទាំងអស់ដូចជា ខេត្តកណ្តាល កំពង់ឆ្នាំង ពោធិ៍សាត់ បាត់ដំបង បន្ទាយមានជ័យ កំពត កែប និងខេត្តផ្សេងៗជាច្រើនទៀត ។ ចំពោះករណីល្បីថាមានជំងឺកូវីដ-១៩កំពុងឆ្លងរាលដាលនោះ រូបលោកតែងតែពាក់ម៉ាសការពារ ពេលជួបជាមួយអតិថិជន ហើយក៏មានការប្រុងប្រយ័ត្នជានិច្ចផងដែរ ។ លើសពីនេះ ក៏មានការព្រួយបារម្ភដែរ ប៉ុន្តែមិនដឹងធ្វើម៉េច បើមិនចេញលក់ដូរទេ គ្មានថវិកាសម្រាប់ផ្គត់ផ្គង់ជីវភាពគ្រួសារនោះឡើយ ។
ចែករំលែកព័តមាននេះ