ខេត្តព្រះវិហារ ៖ គិតមកដល់ព្រឹកថ្ងៃទី១៩ ខែមីនា ឆ្នាំ២០២០នេះ គេសង្កេតឃើញថា ទីប្រជុំជនក្រុងព្រះវិហារមានសភាពស្ងប់ស្ងាត់បន្តិច រីឯផ្លូវមួយចំនួនក្នុងក្រុងដែលតែងតែមានការធ្វើចរាចរណ៍ច្រើនក៏មានសភាពស្ងប់ស្ងាត់ជាងមុនដែរ បន្ទាប់ពីរកឃើញមនុស្សចំនួន២នាក់មានផ្ទុកវីរុសកូវីដ-១៩ ដែលធ្វើឲ្យប្រជាពលរដ្ឋមានការព្រួយបារម្ភ…
ខេត្តព្រះវិហារ ៖ គិតមកដល់ព្រឹកថ្ងៃទី១៩ ខែមីនា ឆ្នាំ២០២០នេះ គេសង្កេតឃើញថា ទីប្រជុំជនក្រុងព្រះវិហារមានសភាពស្ងប់ស្ងាត់បន្តិច រីឯផ្លូវមួយចំនួនក្នុងក្រុងដែលតែងតែមានការធ្វើចរាចរណ៍ច្រើនក៏មានសភាពស្ងប់ស្ងាត់ជាងមុនដែរ បន្ទាប់ពីរកឃើញមនុស្សចំនួន២នាក់មានផ្ទុកវីរុសកូវីដ-១៩ ដែលធ្វើឲ្យប្រជាពលរដ្ឋមានការព្រួយបារម្ភ ។
ថ្លែងប្រាប់អ្នកយកព័ត៌មាន លោក សារ៉ាយ ចាន់នី ជាប្រជាពលរដ្ឋរស់នៅក្នុងក្រុងព្រះវិហារបានសម្តែងនូវការព្រួយបារម្ភ បន្ទាប់ពីមានរកឃើញមនុស្ស២នាក់មានផ្ទុកវីរុសកូវីដ-១៩នៅក្នុងក្រុងព្រះវិហារ ។ លោកបន្តថា បន្ទាប់ពីរកឃើញភ្លាម ធ្វើឲ្យគាត់ក៏ដូចជាពលរដ្ឋ មួយចំនួននៅក្នុងក្រុងព្រះវិហារមានការភ័យខ្លាច មិនសូវហ៊ានចេញមកខាងក្រៅផ្ទះទេ ម្យ៉ាងវិញទៀត ពួកគាត់នៅតែក្នុងផ្ទះរក្សាអនាម័យជាប្រចាំ ។
ទោះជាបែបនេះក្តី លោកសំណូមពរដល់អាជ្ញាធរធ្វើយ៉ាងណាមានវិធានការទប់ស្កាត់នឹងការពារវីរុសនេះកុំឲ្យមានការឆ្លងរាលដាលជាបន្តទៀត ដើម្បីការពារសុខភាព សុវត្ថិភាព ប្រជាពលរដ្ឋទាំងអស់ ចៀសឱ្យផុតពីជំងឺដ៏កាចសាហាវនេះ ។
ជាមួយគ្នានេះ លោកវេជ្ជបណ្ឌិត សុក វាសនា ប្រធានមន្ទីរពេទ្យបង្អែកខេត្ត១៦មករាក្រុងព្រះវិហារ បានឲ្យដឹងថា ស្ថានភាពអ្នកផ្ទុកវីរុសកូវីដ១៩ទាំង២នាក់កំពុងស្ថិតក្នុងការថែទាំ នៅបន្ទប់ដាច់ដោយឡែកយ៉ាងយកចិត្តទុកដាក់ពីក្រុមគ្រូពេទ្យ ម្យ៉ាងវិញទៀត បើទោះបី ជាពួកគាត់ទាំង២នាក់មានផ្ទុកវីរុសកូវីដ-១៩ក៏ពិតមែន ប៉ុន្តែមកដល់ពេលនេះសុខភាពរបស់ពួកគាត់មានភាពល្អប្រសើរជាធម្មតា ពុំមានរោគសញ្ញាណាមួយគួរឱ្យកត់សម្គាល់ឡើយ ។ ទោះបីជាយ៉ាងនេះក្តី ក្រុមគ្រូពេទ្យបានណែនាំឲ្យពួកគាត់លាងសម្អាតដៃជាមួយសាប៊ូ និងអាល់កុល ឬជែល ឲ្យបានញឹកញាប់ នឹងធ្វើលំហាត់ប្រាណជាប្រចាំផងដែរ ។
សូមបញ្ជាក់ថា គិតមកដល់ថ្ងៃទី១៩ ខែមីនា ឆ្នាំ២០២០នេះ ខេត្តព្រះវិហារមានករណីឆ្លងវីរុសកូវីដ-១៩ចំនួន២ករណីប៉ុណ្ណោះ គឺបុរស២នាក់ ក្នុងនោះម្នាក់អាយុ៣៥ឆ្នាំ និងម្នាក់ទៀតអាយុ៣៩ឆ្នាំ ពួកគេទាំង២នាក់ស្ថិតក្នុងចំណោមមនុស្ស៧៩នាក់ ដែលបានត្រឡប់មកពីប្រទេសម៉ាឡេស៊ីវិញ កាលពីថ្ងៃទី៣ ខែមីនា ឆ្នាំ២០២០កន្លងទៅ ៕ (កែសម្រួលដោយ ៖ ធីតា)
ចែករំលែកព័តមាននេះ