រាជធានីភ្នំពេញ ៖ ទីតាំងសង្វៀនបញ្ជល់មាន់ និងបាញ់អាប៉ោងមួយកន្លែង ស្ថិតនៅចំណុចខាងក្រោយឡឥដ្ឋ ក្នុងភូមិសំបក់មាស សង្កាត់បាក់ខែង ត្រូវបានគណៈបញ្ជាការឯកភាពខណ្ឌជ្រោយចង្វារ ចុះបង្ក្រាបដោយឃាត់ខ្លួនអ្នកញៀនល្បែងបាន៧នាក់ ព្រមទាំងមាន់និងដកហូតបានម៉ូតូជាច្រើនគ្រឿង ។
ប្រតិបត្តិការខាងលើនេះបង្កអោយមានការផ្អើលកាលពីវេលាម៉ោងប្រមាណ២រសៀលថ្ងៃទី១៨ ខែមីនា ឆ្នាំ ២០២០ ដឹកនាំផ្ទាល់ដោយលោក កៅ សារ៉ាវុធ អភិបាលរងខណ្ឌជ្រោយចង្វារ ដោយមានបញ្ជាពីលោកឃ្លាំង ហួត អភិបាលខណ្ឌជ្រោយចង្វារ ។
តាមព័ត៌មានបានឱ្យដឹងថា ទីតាំងសង្វៀនបញ្ជល់មាន់និងបាញ់អាប៉ោងខាងលើនេះបានបើកដំណើរការយ៉ាងរលូនជាយូរមកហើយ និងត្រូវបានលោកឃ្លាំង ហួត បញ្ជាអោយចុះបង្ក្រាបតែម្តង។
តាមព័ត៌មានអោយដឹងថា នៅមុនពេលចុះបង្ក្រាប គេឃើញក្រុមអ្នកលេងល្បែងបញ្ជល់មាន់កំពុងតែពពាក់ពពួន ភ្នាល់ និងចាក់អាប៉ោង ដោយហ៊ោកញ្ចៀវយ៉ាងសប្បាយ ហើយ ត្រូវបានកម្លាំងសមត្ថកិច្ចចុះទៅបង្ក្រាប ពេលនោះក្រុមអ្នកលេងល្បែងទាំងនោះនាំគ្នាបានរត់ប្រសាចគេចខ្លួនយកតែរួចខ្លួន ។
តាមនគរបាលអោយដឹងថា នៅក្នុងការចុះបង្ក្រាបល្បែងស៊ីសងនេះ សមត្ថកិច្ច បានឃាត់ខ្លួនអ្នកលេងល្បែងចំនួន៧នាក់ ដកហូតម៉ូតូចំនួន១៥គ្រឿង, មាន់ចំនួន៤ក្បាល, ព្រមទាំងសម្ភារៈរួមមានទ្រុង កៅអី ជាច្រើនផងដែរ ។
ក្រុមអ្នកលេងល្បែងរួមទាំងវត្ថុតាងត្រូវបាននគរបាលបញ្ជូនមកកាន់អធិការដ្ឋានខណ្ឌជ្រោយចង្វារ ដើម្បីសាកសួរ ៕ (កែសម្រួលដោយ ៖ ធីតា)
ចែករំលែកព័តមាននេះ