ខេត្តស្វាយរៀង ៖ ប្រជាពលរដ្ឋជាង៦០គ្រួសារនៅភូមិពោធិ៍ក្រូច ឃុំបន្ទាយក្រាំង ស្រុកកំពង់រោទ៍ បានផ្តិតមេដៃប្តឹងទៅអាជ្ញាធរនិងមន្ត្រីជំនាញ សូមឲ្យធ្វើអន្តរាគមន៍ដោះស្រាយបញ្ហាឈ្មួញនាំជ្រូករស់ សង្ស័យគ្មានច្បាប់យកមកទម្លាក់ក្នុងភូមិរបស់ពួកគាត់ និងសាងជ្រូកនាំចេញទៅប្រទេសវៀតណាម ។…
ខេត្តស្វាយរៀង ៖ ប្រជាពលរដ្ឋជាង៦០គ្រួសារនៅភូមិពោធិ៍ក្រូច ឃុំបន្ទាយក្រាំង ស្រុកកំពង់រោទ៍ បានផ្តិតមេដៃប្តឹងទៅអាជ្ញាធរនិងមន្ត្រីជំនាញ សូមឲ្យធ្វើអន្តរាគមន៍ដោះស្រាយបញ្ហាឈ្មួញនាំជ្រូករស់ សង្ស័យគ្មានច្បាប់យកមកទម្លាក់ក្នុងភូមិរបស់ពួកគាត់ និងសាងជ្រូកនាំចេញទៅប្រទេសវៀតណាម ។ លុះពេលមានជ្រូកងាប់វៀតណាមមិនទទួលទិញ គឺពួកឈ្មួញដឹកយកទៅទម្លាក់ចោលរាប់សិបក្បាលពាសវាលពាសកាលធ្វើឲ្យប្រជាពលរដ្ឋមានការព្រួយបារម្ភអំពីផលប៉ះពាល់ដល់សុខភាពរបស់ពួកគាត់ ។
ទាក់ទិននឹងករណីឈ្មួញដឹកជ្រូកងាប់ទៅទម្លាក់ចោលនេះ នៅព្រឹកថ្ងៃទី១៧ ខែមីនា ដោយទទួលបានការណែនាំពីលោក សុច ពិសី អភិបាលស្រុកកំពង់រោទ៍ បានចាត់កម្លាំងសហការជាមួយមន្ត្រីជំនាញទៅពិនិត្យជាបន្ទាន់ ដែលរួមដំណើរដោយលោក ឃុត គីម នាយករងរដ្ឋបាលសាលាស្រុក ។
នៅទីតាំងប្រឡាយបណ្ដែត ស្ថិតក្នុងភូមិចន្ទ្រានិងនៅផ្ទះលោក សៅ ប្រុស អាយុ៥១ឆ្នាំ នៅភូមិពោធិ៍ក្រូច ឃុំបន្ទាយក្រាំង ស្រុកកំពង់រោទ៍ ក្រុមការងារបានសហការជាមូយលោក សុខ ពុទ្ធាវុធ អនុប្រធានមន្ទីរកសិកម្មខេត្ត បានទៅពិនិត្យដល់ទីកន្លែងទម្លាក់ចោលជ្រូកងាប់ស្អុយចំនួន៤បាវជិត១០ក្បាល រួចដុតនិងកប់ចោល ។ ជាមួយនេះ បានធ្វើការអប់រំណែនាំម្ចាស់ផ្ទះស្តុកជ្រូកឲ្យធ្វើការសម្អាតបាញ់ថ្នាំសម្លាប់មេរោគប្រភេទTH.4ជាប្រចាំ ហើយធ្វើកំណត់ហេតុនិងកិច្ចសន្យាដើម្បីទុកជាឯកសារ ។ អ្នកស្រុកឆ្ងល់ហេតុអីមានជ្រូករស់ជ្រូកងាប់ដឹកឆ្លងដែនពីថៃចូលទៅស្រុកយួនបាន ស្រួលម្ល៉ឹងៗ ? ឱ ! ខេត្តស្វាយរៀងអើយ…។
ចំណែកប្រជាពលរដ្ឋលើកឡើងថា ពួកគាត់នៅតែព្រួយបារម្ភអំពីសុខភាព ពិសេសអ្នករស់នៅជិតទីកន្លែងស្តុកជ្រូកមុនពេលសាងដឹកចេញ និងប៉ះពាល់ខូចផ្លូវលំតាមជនបទ ដែលច្បាប់កំណត់ឲ្យរថយន្តដឹកទំនិញធ្វើចរាចរណ៍បានត្រឹមចំណុះ១៥តោន ។ ចំណែករថយន្តដឹកជ្រូក គឺរថយន្តភ្លៅ៥ឬភ្លៅ៦ ដឹកជ្រូកចាប់ពី២៨០ក្បាលទៅ៣០០ក្បាលក្នុង១គ្រឿង បើគិតជាទម្ងន់គឺចាប់២៥តោនទៅ៣០តោនឯណោះ ដែលជាហេតុនាំឲ្យខូចផ្លូវអស់ហើយ ។ អ្នកស្រុកនិយាយថា រឿងល្មើសច្បាប់បែបនេះ កោតមន្ត្រីបិទភ្នែកអស់ ដែលគេសង្ស័យថា ទំនងបានទទួលផលប្រយោជន៍ ហើយមើលទៅ ៕
ចែករំលែកព័តមាននេះ