រាជធានីភ្នំពេញ ៖ លោកឌឹម សុវណ្ណារុំ អ្នកនាំពាក្យសាលាក្តីខ្មែរក្រហម បានឱ្យដឹងកាលពីព្រឹកថ្ងៃទី៣ មីនា ២០១១ ថា មានគ្រូបង្រៀន សិស្ស និងប្រជាពលរដ្ឋ៥១០នាក់ មកពីឃុំវាលរេញ ស្រុកព្រៃនប់ ខេត្តព្រះសីហនុ បានចូលទស្សនាគុកទួលស្លែង និងសាលាក្តីខ្មែរក្រហមជាលើកដំបូងនៅថ្ងៃទី៣ មីនា ២០១១ ។
លោកឌឹម សុវណ្ណារុំ បន្តថា សាលាក្តីបានទទួលពលរដ្ឋខ្មែរនៅទូទាំងប្រទេស ដើម្បីមកទស្សនកិច្ច គិតមកដល់ថ្ងៃទី៣ មីនា ២០១១ សរុបជាង៧ម៉ឺននាក់ហើយ។ វាជាជោគជ័យមួយរបស់សាលាក្តីក្នុងការស្វែងរកយុត្តិធម៌ដល់ជនរងគ្រោះដោយរបបខ្មែរក្រហម ។ ដោយឡែក កាលពីពេលថ្មីៗនេះ មានដំណើរទស្សនកិច្ចរបស់សមាជិកក្រុមប្រឹក្សាឃុំ សង្កាត់ផងដែរ ត្រូវបានរៀបចំឡើងដោយមានកិច្ចសហការរវាងសាលាក្តីខ្មែរក្រហម និងសមាគមក្រុមប្រឹក្សាឃុំ សង្កាត់ ក្នុងទិសដៅផ្សព្វផ្សាយព័ត៌មានដល់សាធារណជនអំពីដំណើរការជម្រះក្តីអតីតមេដឹកនាំខ្មែរក្រហមចំនួន៤រូបដែលកំពុងជាប់ឃុំឃាំងសព្វថ្ងៃ ។
អតីតមេដឹកនាំជាន់ខ្ពស់ខ្មែរក្រហមចំនួន៤រូប រួមមានលោកនួន ជា, ខៀវ សំផន, អៀង សារី និងលោកស្រីអៀង ធីរិទ្ធ ជាប់ចោទក្នុងបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងមនុស្សជាតិ និងឧក្រិដ្ឋកម្មសង្គ្រាមដែលបានប្រព្រឹត្តឡើងចន្លោះពីខែមេសា ឆ្នាំ១៩៧៥ ដល់ខែមករា ឆ្នាំ១៩៧៩ ។ ករណីរបស់មេដឹកនាំជាន់ខ្ពស់ខ្មែរក្រហមចំនួន៤រូបនេះ នឹងត្រូវគេលើកយកទៅជំនុំជម្រះនៅខែឧសភា ឬមិថុនា ២០១១ នេះ ៕
ចែករំលែកព័តមាននេះ