ប្រទេសម៉ាឡេស៊ី ៖ សហគមន៍ចិនប្រចាំប្រទេសម៉ាឡេស៊ី ត្រូវបានជម្រុញឱ្យពន្យារពេលពិធីបុណ្យឆេងម៉េងនៅឆ្នាំនេះ និងអធិដ្ឋានពីផ្ទះជំនួសវិញ ដើម្បីចៀសវាងការជុំគ្នាមិនចាំបាច់ ដែលអាចជួយជម្រុញដល់ការឆ្លងរីករាលដាលរបស់ជំងឺកូវីដ១៩។ អគ្គលេខាធិការនៃបណ្ឌិត Wu Lien-Teh…
ប្រទេសម៉ាឡេស៊ី ៖ សហគមន៍ចិនប្រចាំប្រទេសម៉ាឡេស៊ី ត្រូវបានជម្រុញឱ្យពន្យារពេលពិធីបុណ្យឆេងម៉េងនៅឆ្នាំនេះ និងអធិដ្ឋានពីផ្ទះជំនួសវិញ ដើម្បីចៀសវាងការជុំគ្នាមិនចាំបាច់ ដែលអាចជួយជម្រុញដល់ការឆ្លងរីករាលដាលរបស់ជំងឺកូវីដ១៩។
អគ្គលេខាធិការនៃបណ្ឌិត Wu Lien-Teh ប្រចាំកោះ Penang ប្រទេសម៉ាឡេស៊ី និង ជាអ្នកស្រាវជ្រាវផ្នែកគ្លីនិកនៃវិទ្យាស្ថានស្រាវជ្រាវផ្នែកវេជ្ជសាស្ត្រ វិទ្យាស្ថានសុខភាពជាតិរបស់ម៉ាឡេស៊ី បាននិយាយថា ប្រជាជនម៉ាឡេស៊ី គួរតែព្យាយាមកាត់បន្ថយការទាក់ទងមនុស្សទល់នឹងមនុស្សផ្ទាល់ក្នុងពេលខាងមុខនេះ។ បុណ្យឆេងម៉េងប្រចាំឆ្នាំ ដែលត្រូវបានគេរំពឹងថា នឹងមានការកើនឡើងនៃចំនួនគ្រួសារដែលវិលត្រឡប់មកស្រុក ដើម្បីគោរពដល់មនុស្សជាទីស្រឡាញ់ដែលបានចាកចេញទៅនៅទីបញ្ចុះសព។
លោក Wu បានមានប្រសាសន៍ថា៖ «នៅក្នុងការរីករាលដាលនៃជំងឺរាតត្បាតនេះ យើងគួរតែមានទំនួលខុសត្រូវខ្ពស់ ដើម្បីការពារខ្លួនយើង មនុស្សជាទីស្រឡាញ់ និងសហគមន៍ទាំងមូល។ យើងត្រូវប្រកាន់ខ្ជាប់នូវវិធានការការពារយ៉ាងតឹងរឹង ដើម្បីទប់ស្កាត់ការរីករាលដាលនៃជំងឺដ៏មហន្តរាយនេះ។ ការហាមមិនឱ្យចេញដើរផ្តេសផ្តាស ដែលត្រូវបានរឹតត្បិតទូទាំងប្រទេស គឺមានគោលបំណងធ្វើឱ្យការរីករាលដាលនៃជំងឺនេះមានការថយចុះ»។
លោកបាននិយាយនៅក្នុងសេចក្តីថ្លែងការណ៍មួយថា៖ «យើងជម្រុញឱ្យមានការរួមគ្នាការពារពីបុគ្គល និងសហគមន៍ ដោយមានសកម្មភាពរួមគ្នាប្រឆាំងនឹងកូវីដ១៩»។
ក្រៅពីនេះ លោកក៏បានជម្រុញឱ្យមេដឹកនាំសាសនាអំពាវនាវឱ្យរៀបចំព្រឹត្តិការណ៍សាធារណៈ ឬការជួបជុំនៅខាងក្រៅ ឱ្យធ្វើទៅជាការជួបជុំតាមឌីជីថលវិញ។
គួរបញ្ជាក់ផងដែរថា បុណ្យឆេងម៉េងជារៀងរាល់ឆ្នាំ គឺធ្វើឡើងនៅថ្ងៃទី៤ ខែមេសា ដោយអាចធ្វើមុនឬក្រោយហ្នឹង១០ថ្ងៃជាក់ស្តែង៕ ដកស្រង់ចេញពីវេបសាយ ៖ thestar (កែសម្រួលដោយ ៖ បុប្ផា)
ចែករំលែកព័តមាននេះ