ខេត្តមណ្ឌលគិរី ៖ ដោយសារតែបញ្ហាវីរុសកូវីដ-១៩ បាននិងកំពុងអុកឡុកឆ្លងរាតត្បាតទូទាំងពិភពលោក ក្នុងនោះបូករួមទាំងព្រះរាជាណាចក្រកម្ពុជាយើងផង ដោយត្រូវបានរកឃើញអ្នកឆ្លងជាបន្តបន្ទាប់ បង្កឱ្យមានការរំខានជាទីបំផុត ។ ជាក់ស្តែង មានពិធីមង្គលការមួយ…
ខេត្តមណ្ឌលគិរី ៖ ដោយសារតែបញ្ហាវីរុសកូវីដ-១៩ បាននិងកំពុងអុកឡុកឆ្លងរាតត្បាតទូទាំងពិភពលោក ក្នុងនោះបូករួមទាំងព្រះរាជាណាចក្រកម្ពុជាយើងផង ដោយត្រូវបានរកឃើញអ្នកឆ្លងជាបន្តបន្ទាប់ បង្កឱ្យមានការរំខានជាទីបំផុត ។ ជាក់ស្តែង មានពិធីមង្គលការមួយ ត្រូវបានរំសាយចោល ដើម្បីបង្ការនិងការពារនៃជំងឺកូវីដ-១៩នេះ ។
ពិធីមង្គលការដែលត្រូវបានផ្អាកនោះ គឺគ្រោងធ្វើនៅថ្ងៃទី២៣ មីនា ខាងមុខនេះ ដែលគេដឹងថា កូនកំលោះគឺជាអ្នកក្រុងកំពង់សោម ឯកូនក្រមុំជាអ្នកស្រុកកែវសីមា ខេត្តមណ្ឌលគិរី ដោយត្រូវបានសម្រេចចិត្តយ៉ាងល្អិតល្អន់ក្នុងការលុបចោលថ្ងៃពិសេសរបស់ខ្លួនវិញ ក៏ព្រោះតែមិនចង់ឱ្យមានករណីចម្លងនូវជំងឺកូវីដ-១៩ ពីម្នាក់ទៅម្នាក់នោះ ក្នុងពេលមានភ្ញៀវជាច្រើនបានជួបជុំគ្នា ។
ជួបជាមួយលោកចាន់ ធី ជាឪពុកខាងកូនក្រមុំបានឱ្យកោះសន្តិភាពដឹង កាលពីទី១៩ មីនា ថា លោកពិតជាមានការសោកស្តាយណាស់ ដែលកម្មវិធីកូនប្រុស-ស្រីរបស់លោកត្រូវរំសាយ ស្របពេលដែលជំងឺឆ្លងនោះកំពុងសាយភាយក្នុងប្រទេសកម្ពុជា ។ លោកបន្តថា ទោះជាខេត្តមណ្ឌលគិរី គ្មានអត្រាឆ្លងយ៉ាងណាក្តី តែដើម្បីសុខសុវត្ថិភាពមនុស្សរាប់រយនាក់ដែលចូលរួមកម្មវិធី លោកពេញចិត្តនិងរំសាយចោល រង់ចាំស្ងប់ស្ងាត់និងធ្វើពិធីសារជាថ្មី។
ថ្ងៃមង្គលរបស់កូនស្រីគ្រោងធ្វើនៅថ្ងៃទី២៣ មីនា ដោយមានភ្ញៀវកិត្តិយសប្រមាណ៤៥០នាក់មកពីខេត្តកំពង់ចាម,ត្បូងឃ្មុំ,រាជធានីភ្នំពេញនិងមណ្ឌលគិរី ហើយធៀបការគឺបានចែករួចហើយដែរ។ លោកចាន់ទី បញ្ជាក់ថា លោកនិងផ្ញើសារសុំទោសចំពោះភ្ញៀវ ដើម្បីចូលរួមទប់ស្កាត់ការឆ្លងរីករាលដាលជំងឺកូវីដ-១៩ទាំងអស់គ្នា ។
សូមបញ្ជាក់ថា កម្ពុជាគិតត្រឹមយប់ថ្ងៃទី១៩ មីនា គឺបានរកឃើញអ្នកឆ្លងមានចំនួន៣៧ករណីហើយ ។
ចែករំលែកព័តមាននេះ