រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ខឹងសុំស្នេហ៍អ្នកមេម៉ាយកូន២ម្តងទៀតមិនបាន ស្រាប់តែយកដែកកែឆ្នៃចាក់ទៅលើស្ត្រីរងគ្រោះជាច្រើនជាច្រើនកន្លែងប៉ុនប៉ងផ្តាច់ជីវិត ប៉ុន្តែមិនបានសំរេច ព្រោះត្រូវបានបងប្អូនស្ត្រីរងគ្រោះឃាត់ទាន់ រួចប្រគល់ឱ្យសមត្ថកិច្ចភ្លាមៗផងដែរ បង្កឲ្យមានការភ្ញាក់ផ្អើលកាលពីម៉ោង៥និង៥៦នាទីល្ងាច ថ្ងៃទី១៨…
រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា បុរសម្នាក់ខឹងសុំស្នេហ៍អ្នកមេម៉ាយកូន២ម្តងទៀតមិនបាន ស្រាប់តែយកដែកកែឆ្នៃចាក់ទៅលើស្ត្រីរងគ្រោះជាច្រើនជាច្រើនកន្លែងប៉ុនប៉ងផ្តាច់ជីវិត ប៉ុន្តែមិនបានសំរេច ព្រោះត្រូវបានបងប្អូនស្ត្រីរងគ្រោះឃាត់ទាន់ រួចប្រគល់ឱ្យសមត្ថកិច្ចភ្លាមៗផងដែរ បង្កឲ្យមានការភ្ញាក់ផ្អើលកាលពីម៉ោង៥និង៥៦នាទីល្ងាច ថ្ងៃទី១៨ ខែមីនា ឆ្នាំ២០២០ នៅផ្ទះជនរងគ្រោះ ស្ថិតក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
សេចក្តីរាយការណ៍បន្តថា បុរសជាជនសង្ស័យខាងលើឈ្មោះ ហូរ លីលីន អាយុ៣០ឆ្នាំ មុខរបរជាងជួសជុលរថយន្ត ស្នាក់នៅភូមិត្រពាំងល្វា សង្កាត់អូបែកក្អម ខណ្ឌសែនសុខ មានស្រុកកំណើតនៅខេត្តកំពង់ចាម ពោះម៉ាយកូន១ ។ ចំណែកស្ត្រីរងគ្រោះឈ្មោះ ម៉ាលីណា ហៅល័ក្ខ អាយុ២៩ឆ្នាំ មុខរបរបញ្ចាំម៉ូតូ ស្នាក់នៅភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ ជាមេម៉ាយកូន២ ។
បើតាមចម្លើយជនសង្ស័យខាងលើបានរៀបរាប់ប្រាប់ថា ជនរងគ្រោះជាស្ត្រីមេម៉ាយមានកូន២នាក់ ក្នុងនោះស្រីម្នាក់ និងប្រុសម្នាក់ ចំណែករូបគាត់ជាបុរសពោះម៉ាយ មានកូនម្នាក់។ ហើយស្ត្រីរងគ្រោះ និងរូបគាត់ធ្លាប់ទំនាក់ទំនងស្រលាញ់គ្នាអស់រយៈពេលជិត១ឆ្នាំមកហើយ តែមានជំលោះឈ្លោះប្រកែកគ្នា ក្រោយក៏បានបែកបាក់គ្នាមួយរយៈពេលកន្លងមកនេះ ។
ប្រភពដដែលបន្តថា នៅមុនពេលកើតហេតុ ជនសង្ស័យបានចេញពីកន្លែងធ្វើការនៅម្តុំផ្លូវម៉ៃដា (ផ្លូវ២០០៤) មកផ្ទះជនរងគ្រោះនៅភូមិកើតហេតុខាងលើ ដោយជនរងគ្រោះកំពុងអង្គុយជិតទ្វារខាងមុខ បន្ទាប់មកជនសង្ស័យបានឈរនិយាយជាមួយជនរងគ្រោះថា «បងយកម៉ូតូមកបញ្ចាំ» ជនរងគ្រោះក៏បាននិយាយប្រាប់ថា «អត់ទទួលទេ» ។
ប្រភពដដែលបន្តទៀតថា ក្រោយមកជនសង្ស័យបាននិយាយបន្តទៀតថា «អូនហូបបាយរួចនៅ ហើយរាល់ថ្ងៃអូនមាននឹកបងដែរទេ» តែជនរងគ្រោះអត់និយាយជាមួយជនសង្ស័យនោះទេ គឺបានដើរចេញ ស្រាប់តែក៏ត្រូវជនសង្ស័យយកដែកកែឆ្នៃមកចាក់ទៅលើស្ត្រីរងគ្រោះចំពោះជាច្រើនកន្លែង។ ភ្លាមៗនោះបងប្អូនជនរងគ្រោះក៏រត់ចេញមក រួចក៏ចាប់ឃាត់ជនសង្ស័យបានហើយ ក៏ទាក់ទងទៅសមត្ថកិច្ចឱ្យអន្តរាគមន៍ឃាត់ខ្លួនយកមកប៉ុស្តិ៍នគរបាលភ្លាមៗផងដែរ ដើម្បីសួរនាំ ចំណែកឯជនរងគ្រោះត្រូវបានបងប្អូននាំយកទៅសង្គ្រោះនៅមន្ទីរពេទ្យជិតកន្លែងកើតហេតុផងដែរ ។
ក្រោយពេលកើតហេតុ បន្ទាប់ពីសមត្ថកិច្ចបានសាកសួរ ហើយជនសង្ស័យបានសារភាពថាខ្លួនពិតជាបានប្រព្រឹត្តទៅលើជនរងគ្រោះពិតប្រាកដមែន ក្រោយមកសមត្ថកិច្ចនគរបាលប៉ុស្តិ៍ ក៏បញ្ជូនជនសង្ស័យទៅផ្នែកជំនាញព្រហ្មទណ្ឌខណ្ឌ ដើម្បីចាត់ការតាមនីតិវិធីបន្ត ៕ (កែសម្រួលដោយ ៖ បុប្ផា)
ចែករំលែកព័តមាននេះ