រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ២នាក់ប្តីប្រពន្ធ ត្រូវបានកម្លាំងសមត្ថកិច្ចការិយាល័យទី៦ នៃរបស់មន្ទីរប្រឆាំងបទល្មើសគ្រឿងញៀន បើកប្រតិបត្តិការស្រាវជ្រាវ បង្ក្រាបការជួញដូរគ្រឿងញៀន រហូតឈានដល់ឃាត់ខ្លួន និងចាប់យកវត្ថុតាងរួមមានសារធាតុញៀនប្រភេទម៉េតំហ្វេតាមីន (ICE) ទម្ងន់១០២៥.៥៦ ។
សេចក្តីរាយការណ៍បន្តថា ប្រតិបត្តិការខាងលើធ្វើឡើងកាលពីម៉ោង៤និង៣០នាទី ថ្ងៃទី១៦ ខែមីនា ឆ្នាំ២០២០ នៅចំណុចបន្ទប់ជួលលេខ០៤ ផ្លូវបេតុង សង្កាត់ទួលសង្កែ ខណ្ឌប្ញស្សីកែវ ។
បើតាមសមត្ថកិច្ចបានឱ្យដឹងថា៖ កិច្ចប្រតិបត្តិការបង្ក្រាបករណីរក្សាទុក-ជួញដូរគ្រឿងញៀនខុសច្បាប់ក្នុងរាជធានីភ្នំពេញ គឺកម្លាំងជំនាញរបស់មន្ទីរប្រឆាំងបទល្មើសគ្រឿងញៀន (ក៦) ដឹកនាំដោយលោកនាយករង ដាំ ឈឿន និងមានការសំរបសំរួលពីលោក សឿន មុន្នីរ័ត្ន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ ការបើកកិច្ចប្រតិបត្តិការ ស្រាវជ្រាវ និងបង្ក្រាបករណីរក្សាទុកជូញដូរគ្រឿងញៀនខុសច្បាប់ក្នុងបទល្មើសជាក់ស្តែង។
ប្រភពដដែលបន្តថា ជាលទ្ធផលសមត្ថកិច្ចបានឃាត់ខ្លួនជនសង្ស័យប្តីប្រពន្ធ២នាក់ ១-ឈ្មោះ ចុង សំអុល ភេទប្រុស អាយុ៣៧ឆ្នាំ (ជាប្តី) និង២-ឈ្មោះ ឡេ ធីចិន ភេទស្រី អាយុ៣៨ឆ្នាំ ជនជាតិវៀតណាម (ជាប្រពន្ធ)។ ដោយឡែកចាប់យកវត្ថុតាងមានជាសារធាតុញៀនប្រភេទម៉េតំហ្វេតាមីន(ICE) ទម្ងន់១០២៥.២៥ក្រាម ។
ក្រោយពេលឃាត់ជនសង្ស័យទាំង២នាក់ហើយ សមត្ថកិច្ចបានកសាងសំណុំរឿងបញ្ជូនខ្លួនជនសង្ស័យទៅសាលាដំបូងរាជធានីភ្នំពេញ ដើម្បីចាត់ការតាមនីតិវិធី ៕ (កែសម្រួលដោយ ៖ បុប្ផា)
ចែករំលែកព័តមាននេះ