ខេត្តពោធិ៍សាត់ ៖ ស្របពេលដែលប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ ក៏ដូចជាក្រុមហ៊ុនឯកជនទូទាំងប្រទេសកំពុងប្រារព្ធពិធីបុណ្យកាន់បិណ្ឌតាមទំនៀមទំលាប់ប្រពៃណីខ្មែរជារៀងរាល់ឆ្នាំតាំងពីដូនតាមកនោះ នៅព្រឹកថ្ងៃទី១៣ កញ្ញា ត្រូវនឹងថ្ងៃ៥រោជ ខែភទ្របទ លោកស៊ុយ សែមរដ្ឋមន្ត្រីក្រសួងរ៉ែ និងថាមពល និងលោកជំទាវជា ខេង ព្រមទាំងសហការីនៅក្នុងក្រសួងមួយចំនួនទៀត បាននាំយកគ្រឿងបរិក្ខារទៅប្រគេនដល់ព្រះសង្ឃចំនួន១៩វត្តនៅស្រុកបាកាន និងស្រុកកណ្ដៀងដើម្បីចូលរួមក្នុងពិធីបុណ្យកាន់បិណ្ឌវេណទី៥។
ក្នុងឱកាសនោះលោកខួយ សុខា ប្រធានក្រុមប្រឹក្សានិងលោកម៉ក់ រ៉ា អភិបាលរងខេត្តក៏បានអញ្ជើញចូលរួមផងដែរ ។
លោករដ្ឋមន្ត្រីស៊ុយ សែម និងលោកជំទាវព្រមទាំងប្រតិភូអមដំណើរទាំងអស់បានអញ្ជើញអុជទៀនធូប រាប់បាត្រ សូត្រមន្តចំរើនព្រះបរិត្ត និងវេរប្រគេនចង្ហាន់ដល់ព្រះសង្ឃទៅតាមទំនៀមទំលាប់ប្រពៃណីនៃព្រះពុទ្ធសាសនា។ បន្ទាប់មកបានប្រគេនគ្រឿងបរិក្ខារចូលរួមបុណ្យកាន់បិណ្ឌវេណទី៥ដល់វត្តចំនួន១៩ក្នុងនោះស្រុកបាកាន១០វត្ត មានវត្តបាកាន,វត្តក្ដាត,វត្តដូងជ្រុំ,វត្តតាលោ,វត្តផ្លូវមាន់,វត្តជ្រែ,វត្តឈូកសរ,វត្តស្វាយដូនកែវ,វត្តថ្មីនិងវត្តរំលេច។
ស្រុកកណ្ដៀង០៩វត្ត មានវត្តសន្សំកុសល្យ,វត្តពោធិវង្ស,វត្តកោះជុំ,វត្តក្ងាន,វត្តឯករង្សី,វត្តទេពសន្យា,វត្តក្ដីឧត្តម,វត្តធម្មសិរីមង្គលនិងវត្តលៀប ដោយក្នុងមួយវត្តៗទទួលបានអង្ករ១០០គក្រ,ស្កសរ៥០គក្រ,មី០៥កែស,ត្រីខ០១កែស,ទឹកដោះគោខាប់០១កែស,ទឹកក្រូច០៣កែស,ទឹកបរិសុទ្ធអូរ៉ាល់០៥កែស,ប្រេងឆា០១ធុង,ម្ស៉ៅសាប៊ូ០១កែសនិងថវិកា០១លានរៀល។ ជូនតាយាយ៤០០នាក់ម្នាក់អាវ០១ខោ ឫសំពត់០១,សាប៊ូម្ស៉ៅ០១ថង់ និងថវិកា១០.០០០រៀល។ ចំណែកពុទ្ធបរិស័ទនិងកងកម្លាំងសន្តិសុខសរុបប្រមាណ១០០០នាក់ម្នាក់ៗក៍ទទួលបានសាប៊ូម្ស៉ៅ០១ថង់ផងដែរ ៕
ចែករំលែកព័តមាននេះ