រាជធានីភ្នំពេញ ៖ ក្មេងប្រុស២នាក់បងប្អូនជីដូនមួយបានលង់ទឹក ហើយលិចបាត់នៅក្នុងរណ្តៅក្បែរវត្តសំរោងកណ្តាល អស់រយៈពេលជាច្រើនម៉ោង ទើបក្រុមគ្រួសារ និងអ្នកស្រុកបាននាំគ្នារាវរកសពឃើញ ។ ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១និង៣០នាទីរសៀលថ្ងៃទី១៦ ខែមីនា…
រាជធានីភ្នំពេញ ៖ ក្មេងប្រុស២នាក់បងប្អូនជីដូនមួយបានលង់ទឹក ហើយលិចបាត់នៅក្នុងរណ្តៅក្បែរវត្តសំរោងកណ្តាល អស់រយៈពេលជាច្រើនម៉ោង ទើបក្រុមគ្រួសារ និងអ្នកស្រុកបាននាំគ្នារាវរកសពឃើញ ។
ហេតុការណ៍ខាងលើនេះបង្កអោយមានការភ្ញាក់ផ្អើលកាលពីវេលាម៉ោងប្រមាណ១និង៣០នាទីរសៀលថ្ងៃទី១៦ ខែមីនា ឆ្នាំ២០២០ នៅចំណុចទឹករណ្តៅខាងកើតភូមិសំរោងកណ្តាល សង្កាត់សំរោង ខណ្ឌព្រែកព្នៅ រាជធានីភ្នំពេញ។
ក្មេងប្រុសរងគ្រោះទាំង២នាក់ខាងលើត្រូវបានក្រុមគ្រួសារអោយដឹងថា ម្នាក់ឈ្មោះឆេង ភានិត អាយុ៧ឆ្នាំ មានឪពុកឈ្មោះមឿង ឆេង អាយុ៣៥ឆ្នាំ មុខរបរកម្មករ និងម្តាយឈ្មោះឡូញ សារិន អាយុ៣៦ឆ្នាំ មុខរបរកម្មការិនី និងម្នាក់ទៀតឈ្មោះស៊ុយ ប៊ុនថេង អាយុ៦ឆ្នាំមានឪពុកឈ្មោះសាំង វុទ្ធី អាយុ៣៣ឆ្នាំ មុខរបរកម្មករ និងម្តាយឈ្មោះមឿង សុខគា អាយុ៣៧ឆ្នាំ មុខរបរកម្មការិនី ។ ក្មេងប្រុសរងគ្រោះទាំង២នាក់នេះជាបងប្អូនជីដូនមួយនឹងគ្នាស្នាក់នៅក្នុងភូមិឃុំកើតហេតុខាងលើ ។
តាមប្រភពព័ត៌មានបានអោយដឹងថា នៅមុនពេលកើតហេតុ ក្មេងប្រុសទាំង២នាក់បានទៅបិណ្ឌបាត្រជាមួយព្រះសង្ឃ លុះពេលត្រឡប់មកវិញ នៅវេលាម៉ោងប្រមាណ១១ព្រឹក ខណៈពេលដែលព្រះសង្ឃកំពុងតែឆាន់ ស្រាប់តែក្មេងប្រុសរងគ្រោះទាំង២នាក់នោះនាំគ្នា ទៅលេងទឹករណ្តៅនៅខាងកើតវត្ត ហើយក៏លង់ទឹកលិចបាត់។
តាមប្រភពព័ត៌មានបានឱ្យដឹងបន្តថា ដោយសាតែបាត់កូន ទើបស្ត្រីជាម្តាយរបស់ក្មេងរងគ្រោះឈ្មោះឆេង ភានិត និងក្មួយក៏បាននាំគ្នាផ្អើលឆោឡោដើររក និងសួរនាំក្មេងៗក៏ដឹងថា ទៅលេងទឹករណ្តៅ ខណៈនោះក្រុមគ្រួសារក៏បានប្រទះឃើញខោអាវក្មេងប្រុសរងគ្រោះនៅមាត់រណ្តៅ ហើយក៏នាំគ្នាចុះរាវរករហូតឃើញនៅវេលារសៀលថ្ងៃដដែល រួចយកមកផ្ទះដើម្បីរៀបចំធ្វើបុណ្យតាមប្រពៃណី៕ (កែសម្រួលដោយ ៖ ធីតា)
ចែករំលែកព័តមាននេះ