ខេត្តស្វាយរៀង ៖ ជនជាតិអាល់ហ្សេរី និងស្ត្រីខ្មែរម្នាក់ ដែលធ្វើដំណើរទៅប្រទេសវៀតណាម តាមច្រកទ្វារព្រំដែនអន្តរជាតិបាវិត កាលពីថ្ងៃទី១៤ ខែមីនា ឆ្នាំ២០២០ ត្រូវបានសមត្ថកិច្ចវៀតណាមបញ្ជូនមកកម្ពុជាវិញ…
ខេត្តស្វាយរៀង ៖ ជនជាតិអាល់ហ្សេរី និងស្ត្រីខ្មែរម្នាក់ ដែលធ្វើដំណើរទៅប្រទេសវៀតណាម តាមច្រកទ្វារព្រំដែនអន្តរជាតិបាវិត កាលពីថ្ងៃទី១៤ ខែមីនា ឆ្នាំ២០២០ ត្រូវបានសមត្ថកិច្ចវៀតណាមបញ្ជូនមកកម្ពុជាវិញ ហើយត្រូវបញ្ជូនមកសម្រាកព្យាបាលនៅមន្ទីរពេទ្យ ខេត្តស្វាយរៀង។
ដោយមានការតាមដានយ៉ាងយកចិត្តទុកដាក់ពីមន្ទីរសុខាភិបាលខេត្តស្វាយរៀង ទៅលើការទប់ស្កាត់ និងការបង្ការនៃការឆ្លងរាលដាល។ ហើយនៅល្ងាចថ្ងៃទី១៥ ខែមីនា ឆ្នាំ២០២០ លោកវេជ្ជបណ្ឌិត កែរ រដ្ឋា បានបញ្ជាក់ថា ក្រោយពីយកកំហាករបស់ជនជាតិអាល់ហ្សេរី និងស្ត្រីខ្មែរម្នាក់ទៀត ទៅពិនិត្យនៅវិទ្យាស្ថានប៉ាស្ទ័រកម្ពុជា ជាលទ្ធផល គឺពួកគេទាំងពីរនាក់អវិជ្ជមានវីរុសកូវីដ១៩។ នេះជាការបញ្ជាក់ពីលោកវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្តស្វាយរៀង បានឲ្យអ្នកសារព័ត៌មានយើងដឹងនៅថ្ងៃទី១៦ ខែមីនានេះ។
លោកវេជ្ជបណ្ឌិតបានបញ្ជាក់ថា សមត្ថកិច្ចវៀតណាមរកឃើញជនជាតិអាល់ហ្សេរី និងស្ត្រីខ្មែរមានកំដៅឡើងក៏រុញមកកម្ពុជាវិញ មន្ត្រីចត្តាឡីសក្ក័យើងក៏បានពិនិត្យឃើញមានកំដៅ៣៨.៥c° ក្តៅ ហើយក្អក មានហៀរសំបោរ ទើបបញ្ជូនទៅដាក់បន្ទប់ដាច់ដោយឡែក ដើម្បីតាមដានជំងឺ។
លោកវេជ្ជបណ្ឌិត បានឲ្យដឹងទៀតថា នៅយប់ថ្ងៃទី១៥ ខែមីនា បុរសជនជាតិអាល់ហ្សេរីនិងមិត្តស្រី បានអនុញ្ញាតឱ្យចេញពីមន្ទីរពេទ្យខេត្តស្វាយរៀង បន្ទាប់ពីលទ្ធផលពីវិទ្យាស្ថានបាស្ទ័រ បញ្ជាក់ថា អវិជ្ជមាន រីឯអ្នករួមដំណើរក្នុងរថយន្ត៤នាក់ទៀត ក៏បានអនុញ្ញាតឱ្យចេញពីសណ្ឋាគារផងដែរ។
លោកវេជ្ជបណ្ឌិត បានអំពាវនាវដល់ប្រជាពលរដ្ឋ និងអ្នកចែកចាយព័ត៌មានពាក់ព័ន្ធនឹងជំងឺកូវីដ១៩ ត្រូវយោងទៅលើសេចក្តីប្រកាសរបស់ក្រសួងសុខាភិបាលជាមុនសិន ចៀសវាងការផ្សាយនូវព័ត៌មានមិនពិតអាចនឹងប្រឈមចំពោះមុខច្បាប់៕ (កែសម្រួលដោយ ៖ បុប្ផា)
ចែករំលែកព័តមាននេះ