មនុស្សជាច្រើនជុំវិញពិភពលោក ប្រៀបដូចជាកំពុងតែរត់ប្រណាំងគ្នា ដើម្បីទៅទិញទំនិញស្តុកទុកតាមផ្ទះមិនថា ជាក្រដាសអនាម័យ ឬទឹកលាងដៃទេ ខណៈដែលវីរុសកូវីដ-១៩ កំពុងតែរាតត្បាតទៅបណ្តាប្រទេសកាន់តែច្រើន ។
ជាក់ស្តែង វាជារឿងមូលដ្ឋានដែលមនុស្សគ្រប់រូបគួរតែត្រៀមខ្លួនឲ្យបានគ្រប់គ្រាន់សម្រាប់ស្ថានការដែលមិនល្អនេះ ដូចជាទិញទុកនូវអាហារ ឬទឹកបរិសុទ្ធ ព្រមទាំងឱសថផ្សេងៗ ជាពិសេសសម្ភារៈសម្រាប់របួស ឬការគ្រិចដៃជើងជាដើម ។
យោងទៅតាមអ្នកស្រី រេជីណា ផេប (Regina Phelps) ដែលជាអ្នករៀបចំផែនការពេលមានជំងឺរាតត្បាត និងជាអ្នកជំនាញផ្នែកគ្រប់គ្រងរឿងអាសន្នបានប្រាប់មកថា ខាងក្រោម គឺជាអ្វីដែលមនុស្សមិនគួរខ្ជះខ្ជាយលុយ ៖
១. អាហារដែលអ្នកមិនដែលទទួលទាន ៖
អ្នកស្រីបានប្រាប់មកថា មនុស្សភាគច្រើនចូលចិត្តបោះនំចំណីដែលខ្លួនមិនដែលទទួលទានចូលក្នុងកន្ត្រក ដើម្បីមានអារម្មណ៍សុវត្ថិភាព ទោះជាពួកគេទិញវាទៅខ្ជះខ្ជាយក៏ដោយ ។ ផ្ទុយមកវិញ អ្នកគួរតែទិញនូវអ្វីដែលអ្នកនឹងទទួលទានពិតមែន ។
២. ម៉ាស់មុខ ៖
អ្នកជំនាញជាច្រើនវិស័យបានប្រាប់មកថា ជាក់ស្តែង ប្រសិនបើអ្នកមិនឈឺទេនោះ ឬកំពុងតែមើលថែមនុស្សដែលកំពុងឈឺ ឬត្រូវធ្វើដំណើរចេញចូលប្រទេសទេនោះ អ្នកមិនចាំបាច់ពាក់ម៉ាស់មុខទេ ។
៣. ឧបករណ៍សម្អាតផ្ទះថ្លៃៗ ៖
អ្នកប្រហែលជាមើលឃើញមនុស្សដែលដើរប្រមូលទិញទឹកសម្អាត និងទឹកលាងដៃកម្ចាត់មេរោគថ្លៃៗដើម្បីការពារខ្លួន ហើយដែលធ្វើឲ្យទំនិញទាំងនេះឡើងថ្លៃយ៉ាងលឿន ។ តែអ្នកស្រី ផេប បានប្រាប់មកថា អ្នកគ្រាន់តែត្រូវការថ្នាំ Bleach ឬសាប៊ូទូទៅក៏អាចកម្ចាំងមេរោគបានដែរ ។ ប្រសិនបើអ្នកមិនទុកចិត្ត អ្នកអាចប្រើអាល់កុល ដើម្បីជូតសម្អាតនូវអ្វីដែលអ្នកប្រើប្រាស់ជារៀងរាល់ថ្ងៃបានដូចជាទូរស័ព្ទ កុំព្យូទ័រ និងទ្វារជាដើម ៕ ដកស្រង់ចេញពីវេបសាយ ៖ cnbc (កែសម្រួលដោយ ៖ បុប្ផា)
ចែករំលែកព័តមាននេះ