ខេត្តកោះកុង ៖ នាព្រឹកថ្ងៃទី១៦ ខែមីនា ឆ្នាំ២០២០នេះ ក្រុមមន្ត្រីជំនាញនៃមន្ទីរសុខាភិបាលខេត្តកោះកុង បាននិងកំពុងបញ្ជូនសំណាកជនជាតិខ្មែរអ៊ិស្លាម៣នាក់ ទៅពិនិត្យនៅវិទ្យាស្ថានប៉ាស្ទ័រ នៅរាជធានីភ្នំពេញ ដើម្បីធ្វើតេស្តស្វែងរកវីរុសកូវីដ-១៩ បន្ទាប់ពីពួកគាត់ទាំង៣នាក់បានចូលរួមកម្មវិធីបុណ្យសាសនាមួយ នៅប្រទេសម៉ាឡេស៊ី ហើយវិលត្រឡប់មកកម្ពុជាវិញ ។
បើយោងតាមទំព័រហ្វេសប៊ុកផេក របស់មន្ទីរសុខាភិបាលខេត្តកោះកុង អោយដឹងថា «សូមបងប្អូនប្រជាពលរដ្ឋតាមដានព័ត៌មានដែលមានប្រភពច្បាស់លាស់ មកដល់បច្ចុប្បន្ននេះ ខេត្តកោះកុង មិនទាន់រកឃើញករណី វិជ្ជមាន កូវីដ-១៩ នៅឡើយទេ» ។
ជាមួយគ្នានេះដែរ នៅប្រទេសម៉ាឡេស៊ីឯណោះវិញ ផ្ទុះឡើងនូវករណីថ្មី នៅវិហារអ៊ីស្លាមមួយ នាំឲ្យម៉ាឡេស៊ី មានអ្នកឆ្លង COVID-19 ខ្ពស់បំផុតក្នុងអាស៊ាន
រដ្ឋមន្ត្រីក្រសួងសុខាភិបាលម៉ាឡេស៊ី លោក Datuk Seri Dr Adham មានប្រសាសន៍ថា នាយករដ្ឋមន្ត្រីលោក Muhyiddin Yassin កំពុងជួបជាមួយក្រសួងសុខាភិបាល និងក្រសួងការពារជាតិ នាថ្ងៃទី១៦ មីនានេះ ដើម្បីពិភាក្សា ពីវិធានការណ៍បន្ថែមទៀតសម្រាប់ដោះស្រាយជំងឺរាតត្បាត បង្កឡើងដោយវីរុសកូវីដ-១៩នេះ បន្ទាប់ពីមានការរីករាលដាលយ៉ាងខ្លាំងកាលពីម្សិលមិញ ។
ប្រទេសម៉ាឡេស៊ី កាលពីថ្ងៃទី១៥ មីនា ម្សិលមិញនេះ បានរកឃើញករណីថ្មី មានអ្នកឆ្លងវីរុសកូវីដ-១៩ ដល់ទៅ១៩០នាក់ ដែលភាគច្រើនទាក់ទងនឹងវិហារអ៊ីស្លាមមួយនៅម៉ាឡេស៊ី ធ្វើឲ្យប្រទេសនេះ មានចំនួនអ្នកឆ្លងវីរុសខ្ពស់បំផុត ក្នុងតំបន់អាស៊ាន ។
លោករដ្ឋមន្ត្រីក្រសួងសុខាភិបាលម៉ាឡេស៊ី បាននិយាយថា “ផ្អែកលើការស៊ើបអង្កេតដំបូង ភាគច្រើននៃករណីថ្មីនេះ ត្រូវបានផ្សារភ្ជាប់ទៅនឹងការប្រមូលផ្តុំគ្នានៅវិហារអ៊ីស្លាមមួយ ក្នុងរយៈពេលតែមួយថ្ងៃ មានអ្នកឆ្លងវីរុសដល់១៩០នាក់” ។
ក្រសួងសុខាភិបាល ក៏បានប្រកាសកាលពីថ្ងៃសៅរ៍ សប្តាហ៍មុន ដែរថា មានមនុស្ស ៧៧នាក់ បានបញ្ជាក់ថា ពួកគេបានឆ្លងវីរុស Covid-19 ពាក់ព័ន្ធជាមួយនឹងព្រឹត្តិការណ៍សាសនា ដែលធ្វើឡើងនៅវិហារអ៊ីស្លាមមួយ ក្នុងទីក្រុង Selangor ។ ការជួបជុំនេះ មានអ្នកចូលរួមប្រមាណ ១៦.០០០ នាក់ មកពីប្រទេសមួយចំនួន ៕
ចែករំលែកព័តមាននេះ